လါအီးကထိဘၢၣ်(၃)သီ,၂၀၂၄နံၣ်
ကီၫ်ပယီၤလၢထံလီၫ်ကီၫ်ပူၤ တၫ်ဒုးတၫ်ယၤကဲထီၣ်အံၤတကပၤ တၫ်ဖီၣ်န့ၫ်တၫ်မူၤတၫ်ဘှီးအါအါဂီၫ်ဂီၫ်အဂ့ၫ် ကၠီၣ်တဲၣ်တၫ်ဒုးဖျိးကွံာ်တၫ်မူၤတၫ်ဘှီးကရၢ တဲလီၤ၀ဲလီၤ.
Methamphetamine တၫ်သးကတၢထီၣ်ကသံၣ်ဒီး Iceလၢပှၤသ့ၣ်ညါဒ် Crystal Methကသံၣ်တဖၣ် ပှၤကူၣ်လဲၤမၤကၤတၫ်မူၤတၫ်ဘှီတဖၣ် ဆှၢခူသူၣ်၀ဲဆူ ကလံၤစိးဟီၣ်က၀ီၤသ့ၣ်ပှၫ်တီၣ်အလီၫ်(မ့တမ့ၫ်) လၢမဲခီၣ်ထံကျိကျဲတဆီ၀ံၤ ဆှၢ၀ဲဆူကီၫ်ကၠီၣ်တဲၣ်ပူၤအဂ့ၫ် တၫ်ပၢဆှၢရဲၣ်ကျဲၤတၫ်မူၤတၫ်ဘှီးကရၢ(ONCB) အနဲၣ်ရွဲၣ်ခိၣ်ကျၢၫ်(၂) Apikit Ch. Rojprasert တဲ၀ဲလီၤ.
ပှၤမၤကၤတၫ်မူၤတၫ်ဘှီး(ကဲ)လၢအဂံၫ်ဆူၣ်တဖၣ်အံၤ ပာ်ဖှိၣ်လိာ်သးဒီးလီၫ်က၀ီၤပှၤဖီၣ်စုက၀ဲၤတဖၣ်၀ံၤ လၢကီၫ်ပယီၤယိၤဒိၣ်ကီၫ်စဲၣ်ဒီးကခၠ့ၣ်ကီၫ်စဲၣ်တဖၣ်အပူၤ တ့ထီၣ်ဃာ်၀ဲတၫ်ထုးထီၣ်တၫ်မူၤတၫ်ဘှီးအလီၫ်တဖၣ်အဂ့ၫ် ကၠီၣ်တဲၣ်ဘၣ်မူဘၣ်ဒါတဖၣ်တဲ၀ဲလီၤ.
သုးကီၣ်ကးပှၤတဲတၫ်ပၢတခီ ဘၣ်ထွဲဒီးတၫ်ဂ့ၫ်အံၤန့ၣ် ဂ့ၫ်လိာ်ဃာ်၀ဲလီၤ.ဘၣ်ဆၣ်သနာ်က့ တၫ်ဒုးဖျိးကွံာ်တၫ်မူၤတၫ်ဘှီးအပူၤ ပာ်ဖှိၣ်မၤသကိးတၫ်ဒီးထံကီၫ်လၢအိၣ်ဘူးတဖၣ်အဂ့ၫ် အပူၤကွံာ်တဲတ့ၫ်၀ဲလီၤ.
ကီၫ်ပယီၤပူၤ စုက၀ဲၤတၫ်သဘံၣ်သဘုၣ်တဖၣ်အဃိ တၫ်လိၣ်ဘၣ်စုက၀ဲၤတဖၣ်အါထီၣ်အဃိ မ့ၫ်တၫ်ဂ့ၫ်ခိၣ်သ့ၣ်လၢ တၫ်ထုးထီၣ်အါထီၣ်တၫ်မူၤတၫ်ဘှီးတဖၣ်အဂ့ၫ် ကၠီၣ်တဲၣ်ဘၣ်မူဘၣ်ဒါတဖၣ် ပဲာ်ထံနီၤဖး၀ဲလီၤ.
၂၀၂၄နံၣ် အဆိကတၢၫ်(၈)လါအတီၫ်ပူၤ ကၠီၣ်တဲၣ်ကလံၤစိး ကံၫ်မဲ,ခၠ့ရဲၣ်ဒီးမဲးဟီၣ်ဆီၣ်ကီၫ်စဲၣ်တဖၣ်ပူၤ တၫ်ဖီၣ်န့ၫ်တၫ်မူၤတၫ်ဘှီးအါထီၣ်(၁၇၂)မျးကယၤန့ၣ်လီၤ.ဖဲ၂၀၂၃နံၣ်အပူၤတခီ ဖီၣ်န့ၫ်တၫ်မူၤတၫ်ဘှီး အဖျၢၣ်(၃၄၆)ကကွဲၫ်အဂ့ၫ် ONCBစရီတၫ်ပာ်ဖျါအပူၤ ပာ်ဖျါဃာ်၀ဲလီၤ.
Ref: VOA
