လါစပထ့ဘၢၣ်(၁၇)သီ,၂၀၂၄နံၣ်
သုးကီၣ်ကးအကဘီယူၤ Y-12 လဲၤတ့ၢ်လီၤမ့ၣ်ပိၢ် ဖဲယိၤဒိၣ်ကီၢ်စဲၣ်ကလံၤစိး, တအီသုးမုၢ်ဒိၣ်သုးက့(၂)ဟီၣ်က၀ီၤ, သံၣ်ပီကီၢ်ဆၣ်ပူၤ၀ံၤ ခးလီၤ၀ဲကျိဖးဒိၣ်တဖၣ်တပယူၥ်ဃီစ့ၢ်ကီးအဂ့ၢ် တၢ်သ့ၣ်ညါဘၣ်န့ၣ်လီၤ.
တအီဒီကလုၥ်တၢ်ထူၣ်ဖျဲးသုးမုၢ်ဒိၣ်(TNLA) တၢ်ကစီၣ်ပၥ်ဖျါဃၣ်၀ဲလၢ လါစပထ့ဘၢၣ်(၁၆)သီအနံၤ, (၉)တုၤ(၁၀)နၣ်ရံၣ်အဆၢကတီၢ် သုးကီၣ်ကးအကဘီယူၤ Y-12 လဲၤတ့ၢ်လီၤမ့ၣ်ပိၢ်(၅၀)ဖျၢၣ်ဘျဲၣ်အဃိ လဲၤလီၤတဲၥ်ပိၥ်ဖးထီၣ်၀ဲဒၣ်ဖဲ သံၣ်ပီ၀့ၢ်မုၢ်နုၥ်က၀ီၤဒ့ဒီး စ့ၣ်မၣ်လၣ်ကမျၢၢ်ဖီကရၢၢ်ပူၤအဂ့ၢ်န့ၣ်လီၤ.
မ့ၣ်ပိၢ်လဲၤလီၤတဲၥ်ပိၥ်ဖးထီၣ်၀ဲဒၣ်ဖဲ က၀ီၤဒ့ပူၤအဃိ ပှၤအိၣ်ဟံၣ်ဃီတဖၣ်လၢအိၣ်ဖဲ က၀ီဒ့ပူၤတဖၣ်ဘၣ်ဟးဂီၤကွံၥ်၀ဲအသိး တကးဘၣ် လီၢ်က၀ီၤကမျၢၢ်တဂၤ ဘၣ်သံ၀ဲလၢ မ့ၣ်ပိၢ်အက့အခီဘၣ်အီၤ၀ံၤ ဘၣ်ဒိ၀ဲစ့ၢ်ကီးအဂၤတဂၤအဂ့ၢ် တၢ်သ့ၣ်ညါဘၣ်န့ၣ်လီၤ.
လါစပထ့ဘၢၣ်(၁၅)သီအနံၤ, (၉)နၣ်ရံၣ်ဘျဲၣ်အဆၢကတီၢ်စ့ၢ်ကီး သုးကီၣ်ကးအသုး ခးလီၤ၀ဲကျိဖးဒိၣ်အဃိ လဲၤလီၤတဲၥ်ပိၥ်ဖးထီၣ်၀ဲဒၣ်ဖဲ သံၣ်ပီ၀့ၢ်, စးစူး(ဇတ်စု)က၀ီၤဒ့ပူၤအဃိ ဘၣ်ဟးဂီၤကွံၥ်၀ဲ ကမျၢၢ်ဟံၣ်(၁)ဖျၢၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
TNLA စံး၀ဲလၢ သုးကီၣ်ကးအသုးပညိၣ်ကမျၢၢ်ဒီး ဟးတ့ၢ်လီၤမ့ၣ်ပိၢ်လၢကလံၤကျါအဃိ လီၢ်က၀ီၤကမျၢၢ်တၢ်ဘၣ်ဒိဘၣ်ထံးဒီးတၢ်သံတၢ်ပှၢ်အိၣ်ထီၣ်၀ဲအါအါဂီၢ်ဂီၢ်အသိး ဘၣ်ဟးဂုၤဟးဂီၤကွံၥ်၀ဲ သီခါဖၠၣ်တဖၣ်, တၢ်သိၣ်လိကၠိတဖၣ်, တၢ်ဘူၣ်တၢ်ဘါတၢ်သူၣ်ထီၣ်တဖၣ်ဒီး လီၢ်က၀ီၤကမျၢၢ်အိၣ်ဟံၣ်ဃီတဖၣ်အါအါဂီၢ်ဂီၢ်လီၤအဂ့ၢ်န့ၣ်လီၤ.
