လါစပထ့ဘၢၣ်(၁၇)သီ,၂၀၂၄နံၣ်
ဖဲလါစပထ့ဘၢၣ်(၁၅)သီအနံၤ, သုးကီၣ်ကးအသုးကျိၤ ဟဲနုၥ်လီၤဖဲပလီၢ်ကီၢ်ဆၣ်, ငါမဲၣ်သ၀ီပူၤ၀ံၤ ဖီၣ်န့ၢ်ဆူၣ်လီၢ်က၀ီၤကမျၢၢ်အိၣ်၀ဲအသိး ဒွဲၣ်အူမၤဟးဂီၤကွံၥ် ကမျၢၢ်ဟံၣ်ဃီတဖၣ်အဂ့ၢ် တၢ်သ့ၣ်ညါဘၣ်လၢ လီၢ်က၀ီၤကမျၢၢ်တဖၣ်အအိၣ်န့ၣ်လီၤ.
သုးကီၣ်ကးအသုးဟဲနုၥ်လီၤသုးကျိၤအဆၢကတီၢ် ဖီၣ်န့ၢ်ဆူၣ်ဃၣ်၀ဲ ငါမဲၣ်သ၀ီဖိ(၅၀)ဘျဲၣ်လၢထံၣ်၀ဲတဖၣ်၀ံၤ ဒွဲၣ်အူမၤဟးဂီၤကွံၥ်၀ဲစ့ၢ်ကီး ဟံၣ်ဃီ(၉)ဖျၢၣ်အဂ့ၢ် တၢ်သ့ၣ်ညါဘၣ်လၢ လီၢ်က၀ီၤကမျၢၢ်တဖၣ်အအိၣ်န့ၣ်လီၤ.
“စးထီၣ်ဒွဲၣ်အူကွံၥ် ကျး(၁)ဖျၢၣ်ဒီးဟံၣ်(၃)ဖျၢၣ်လၢ ဟါလီၤခီကတီၢ်လီၤ. မုၢ်နၤယိၥ်မး ဒွဲၣ်အူကဒီး၀ဲန့ၣ်လီၤ.” အဂ့ၢ် လီၢ်က၀ီၤကမျၢၢ်တဂၤ တဲ၀ဲန့ၣ်လီၤ.
ကတီၢ်ခဲအံၤ သုးကီၣ်ကးသုးကျိၤလၢ ဟူးဂဲၤလ့ၤလိၤဖဲငါမဲၣ်သ၀ီအံၤ မ့ၢ်သုးကျိၤလၢဟူးဂဲၤသုးဂ့ၢ်၀ီတဖၣ်လၢ လ့းသီၣ်ဒီးလဲၢ်ဖဲၣ်သ၀ီတဖၣ်အပူၤအဂ့ၢ် လီၢ်က၀ီၤတၢ်ပၢၢ်ဆၢသိၣ်ဒူတဖၣ် တဲ၀ဲန့ၣ်လီၤ.
သုးကီၣ်ကးအသုးကျိၤအံၤ ဖဲလါစပထ့ဘၢၣ်(၁၄)သီအနံၤ, ဘၣ်တၢ်သဂၢၢ်ခးလိၥ်သးအိၣ်ထီၣ်၀ဲဒီး တၢ်ပၢၢ်ဆၢသိၣ်မှံကရၢသုးပၥ်ဖှိၣ်အဘၢၣ်စၢၤ လၢစှၤမံးနံးအတီၢ်ဒံးအဂ့ၢ် လီၢ်က၀ီၤကမျၢၢ်တၢ်ဒီသဒၢသုး သုးဖိတဖၣ်တဲ၀ဲန့ၣ်လီၤ.
တၢ်ခးလိၥ်သးကဲထီၣ်လၢ ဖီးသ၀ီကျဲသဂၢၢ်၀ံၤအလီၢ်ခံ ဟဲနုၥ်လီၤလၢသုးကျိၤလၢငါမဲၣ်သ၀ီပူၤ၀ံၤ ဒွဲၣ်အူၤဟးဂီၤကွံၥ် ဟံၣ်ဃီတဖၣ်ဒီး ဖီၣ်န့ၢ်ဆူၣ်၀ဲလီၢ်က၀ီၤကမျၢၢ်တဖၣ်အဂ့ၢ် စံး၀ဲန့ၣ်လီၤ.
ဖဲမဟါအနံၤန့ၣ် သုးကီၣ်ကးသုးကျိၤအံၤဟဲက့ၤနုၥ်လီၤလၢဖီးသ၀ီအပူၤ၀ံၤ တၢ်ခးလိၥ်သးကဲထီၣ်လၢသ၀ီပူၤအဂ့ၢ် စံး၀ဲန့ၣ်လီၤ. ငါမဲၣ်လီၢ်က၀ီၤကမျၢၢ်တဖၣ်လၢဖီၣ်န့ၢ်ဆူၣ်ဃၣ်၀ဲတဖၣ် တၢ်ပျၢ်က့ၤအီၤလံဧါ ဒီး တပျၢ်က့ၤဒံးဘၣ်ဧါန့ၣ် တၢ်မၤလီၤတံၢ်အီၤအဖၢမုၢ်န့ၣ်လီၤ.
ဖီး, သ့းလးတီ, ငါမဲၣ်ဒီးသ၀ီလၢအဘူးဒီးဖဲန့ၣ်တဖၣ်လၢ သုးကီၣ်ကးသုးကျိၤလဲၤနုၥ်လီၤအပူၤ လီၢ်က၀ီၤကမျၢၢ်အါအါဂီၢ်ဂီၢ် ဘၣ်ဃ့ၣ်ပူၤဖျဲးသးအဂ့ၢ် တၢ်သ့ၣ်ညါဘၣ်န့ၣ်လီၤ.
“ကမျၢၢ်လၢဃ့ၢ်သုးတဖၣ် ဟဲအိၣ်ကဒုလၢဖီးသ၀ီပူၤတစှၤဘၣ်. ဘၣ်ယိၣ်လၢ ကအိၣ်ကးတံၥ်သးလၢတၢ်ဒုးပူၤ၀ံၤ တၢ်လၢတဆၢမုၢ်လၢ်တဖၣ် ကကဲထီၣ်လီၤအဂ့ၢ်” ပှၤလၢအမၤစၢၤပှၤဃ့ၢ်သုးပှၤလီၢ်အိၣ်ကမှံဖိတဂၤ တဲ၀ဲန့ၣ်လီၤ.
တကတီၢ်ဃီအဆၢကတီၢ် သုးကီၣ်ကးအသုးတဖၣ် ဟဲဆီၣ်လီၤပၥ်သးလၢ ပလီၢ်ကီၢ်ဆၣ်, ရှးပိၣ်(ရှပ်ပုံ)သ၀ီပူၤစ့ၢ်ကီး၀ံၤ တၢ်ဖ့ၣ်စၢအိၣ်ထီၣ်လၢ ခံခီခံကပၤအဘၢၣ်စၢၤအဂ့ၢ် တၢ်သ့ၣ်ညါဘၣ်လၢ လီၢ်က၀ီၤကကမျၢၢ်တဖၣ်အအိၣ်န့ၣ်လီၤ.
Ref: The Tanintharyi Times
