လါစဲးပထ့ဘၢၣ်(၁၆)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ကီၢ်ရ့ၣ်ချၢၣ်လွံၣ်ထူၣ်,ကီၫ်ဆၣ်လၢၫ်ဒိၣ်ဒီးကီၫ်ဆၣ်ဖၠူအကပိာ်ကပၤသ၀ီတဖၣ်အပူၤ ပရဲလိာ်ကျိထံကျိထံဒိၣ်အဃိ လိၣ်ဘၣ်တၫ်မၤပူၤဖျဲးထီၣ်တၫ်ဖံးတၫ်မၤတဖၣ်အဂ့ၫ် လီၫ်က၀ီၤဖိတဖၣ်တဲ၀ဲလီၤ.
စးထီၣ်ဖဲလါစဲးပထ့ဘၢၣ်(၁၂)သီအနံၤ ပရဲလိာ်ကျိထံဒိၣ်ထီၣ်၀ံၤ တုၤဖဲလါစဲးပထ့ဘၢၣ်(၁၅)သီအနံၤဒၣ်လဲၣ် ပှၤမၤစၢၤတၫ်တဖၣ် တလဲၤတုၤဒံးလၢပှၤကွၫ်ဆၢၣ်မဲာ်ဘၣ်ထံတၫ်ဂ့ၫ်ကီအလီၫ်အဃိ အီၣ်အီအိၣ်ဆိးအဂီၫ် ကီခဲ၀ဲအဂ့ၫ်တဲ၀ဲလီၤ.
ပရဲလိာ်ကျိကၢၫ်နံၤဒီတကျိၤ လဲးပၣ်ခိၣ်(လက်ပံခုန်),အ့ရှ့ၣ်(အင်းရှည်),ကၠီးစီ(ကျောက်စောင်း), ကည့ဒဲ(ကညှင်ဒိုင်း) ,ညီၣ်ပ့ၣ်ဆ့း(ညောင်ပင်ဆိပ်),ငထွ့ၣ်စိး(ငထွေစုတ်),ယွၣ်မးကၠံ(ရွာမကြီး) သ၀ီအါတက့ၫ် ထံလုၫ်ဘၢကွံာ်၀ံၤ လိၣ်ဘၣ် တၫ်မၤစၢၤတဖၣ်အဂ့ၫ်တဲ၀ဲလီၤ.
ပရဲလိာ်ကျိကၢၫ်နံၤ,ကီၫ်ဆၣ်ဖၠူဒီးကီၫ်ဆၣ်လၢၫ်ဒိၣ်အဆၢ ဒိတါသ၀ီ(ဒိုးတန်းရွာ)လၢအိၣ်ဖဲ အိးဖၠးတတါ(အုတ်ဖြတ်တံတား)အဆၢလာ်တကပၤအံၤ ဟံၣ်ခိၣ်အိၣ်(၃၀၀)ဘျဲၣ်၀ံၤ လိၣ်ဘၣ်တၫ်မၤစၢၤအဂ့ၫ် လီၫ်က၀ီၤဖိတဂၤတဲ၀ဲလီၤ.
“ကဘၣ်ဟဲခီဂာ်၀ဲ ပရဲလိာ်ကျိအဃိ အ၀ဲသ့ၣ်အချံတဖၣ် ဟဲ၀ဲတဘူၣ်ဘၣ်.ပှၤဟဲမၤပူၤဖျဲးထီၣ်တၫ်ဟဲတတုၤ နီတဖု ဘၣ်.အခဲအံၤမ့ၣ်အူတဟဲဘၣ်.ထံဟဲဒိၣ်ထီၣ်လီၤ.ဘၣ်ယိၣ်လၢတနၤအံၤ ထံကဟဲဒိၣ်ထီၣ်လီၤ.ထံမ့ၫ်ဟဲဒိၣ်ထီၣ်န့ၣ် အိၣ်ဆိးအဂီၫ် ကီခဲ၀ဲလီၤ.ခဲအံၤဘၣ်အီၣ်ဒၣ်ဟုသးလၢအိၣ်တ့ၫ်တဖၣ်လီၤ.ပှၤလၢတၫ်တအိၣ်တဖၣ်စ့ၫ်ကီး နီၤဟ့ၣ်လီၤ သးအိၣ်၀ဲလီၤ”အဂ့ၫ်တဲ၀ဲလီၤ.
အပူၤကွံာ်စှၤသီ,ကီၫ်ရ့ၣ်တီအူမုၫ်ထီၣ်အပူၤထံဒိၣ်အဃိ လီၫ်က၀ီၤ(၈)ကလးဘျဲၣ် ဘၣ်တၫ်သုးန့ၫ်တၫ်လီၫ်တၫ်ကျဲဆူ တၫ်ပူၤဖျဲးအလီၫ်န့ၣ်လီၤ.ပရဲလိာ်ကျိကပၤ က၀ီၤဒ့လၢတၫ်လီၫ်လီၤဘံတဖၣ်အပူၤ ထံလုၫ်ဘၢကွံာ်အဃိ တူၫ်ဘၣ်ထံတၫ်ဂ့ၫ်ကီဒ်သိးအံၤလီၤ.
ပရဲလိာ်ကျိအဆၢလာ်လၢအမ့ၫ် ကီၫ်ရ့ၣ်ချၢၣ်လွံၫ်ထူၣ်,၀့ၫ်မဒီး(မဒေါက်မြို့)ပာ်ဃုာ် ပရဲလိာ်ကျိကပၤ သ၀ီတဖၣ်စ့ၫ်ကီး ထံစးထီၣ်လုၫ်ဘၢ၀ဲ၀ံၤ ကရၢလၢမၤစၢၤတၫ်တဖၣ်စ့ၫ်ကီး မၤစၢၤတၫ်ကန့ၫ်အဂီၫ် ကျဲးစၢးသကိး၀ဲလီၤ.
Ref: RFA
