လါစပထ့ဘၢၣ်(၁၆)သီ,၂၀၂၄နံၣ်
ခီဖျိလၢ Yagiတဲၣ်ဖိကလံၤမုၢ်အဃိ မူခိၣ်စူၤဒိၣ်ဒီးထံဒိၣ်နိယွၤကဲထီၣ်လၢ ဘံၣ်ယဲးနၣ်,လၣ်အိၣ်, ကၠီၣ်တဲၣ်ဒီးကီၢ်ပယီၤပူၤ၀ံၤ တၢ်ဟးဂုၤဟးဂီၤတဖၣ်အိၣ်ထီၣ်၀ဲအါမးန့ၣ်လီၤ.
လၢကီၢ်ဘံၣ်ယဲးနၣ်ပူၤ တၢ်ဘၣ်မၤ၀ဲပတီၢ်ထီတၢ်မၤပူၤဖျဲးတၢ်မၤတဖၣ်၀ံၤတၢ်ဘၣ်ကးတံၥ်ဃၣ်၀ဲကၠိတဖၣ်အသိး ဘၣ်ဒိဘၣ်ထံးစ့ၢ်ကီးတၢ်အိၣ်ဆူၣ်အိၣ်ချ့တၢ်ကဟုးကယၤတၢ်ဖံးတၢ်မၤတဖၣ်န့ၣ်လီၤ.ထံဒိၣ်လၢကီၢ်ဘံၣ်ယဲးနၣ်အပူၤအဃိဘၣ်ဟးဂီၤကွံၥ်၀ဲဟံၣ်ဃီ(၁)ကလီၢ်တခီဒီးဘၣ်ဒိ၀ဲပှၤနီၣ်ဂံၢ်(၂)ကထိဃၣ်ဃၣ်န့ၣ်လီၤ.
မ့မ့ၢ်လၢကီၢ်ပယီၤပူၤတခီမူခိၣ်စူၤဒိၣ်အဃိဘၣ်ဒိဘၣ်ထံး၀ဲအါအါဂီၢ်ဂီၢ်လၢန့ၣ်ပၠံၣ်တီၣ်,မါတလ့,ပဲကိးဟီၣ်က၀ီၤတဖၣ်တကးဘၣ် ကလုၥ်ဒူၣ်ဟီၣ်က၀ီၤတဖၣ်လၢအမ့ၢ် ယိၤဒိၣ်,တလၢၤ,ကညီ ဒီး ကရ့ၣ်နံၣ်ဟီၣ်က၀ီၤပူၤန့ၣ်လီၤ. ကီၢ်ပယီၤဒီတဘ့ၣ်အပူၤ ပှၤဘၣ်သံ၀ဲ(၁၁၃)ဂၤ, ပှၤလီၤမၢ်(၆၄)ဂၤ, ပှၤဘၣ်ဒိအိၣ်၀ဲ(၁၄)ဒီး တၢ်ဂုၥ်ကျဲးစၢးဃု၀ဲ ပှၤလၢလီၤမၢ်တဖၣ်အဂ့ၢ် သုးကီၣ်ကးထုးထီၣ်ပၥ်ဖျါဃၣ်၀ဲန့ၣ်လီၤ.
ဒ်န့ၣ်အသိး ကီၢ်လၣ်အိၣ်တခီ ထံဒိၣ်နိယွၤကဲထီၣ်လၢ ကီၢ်ရ့ၣ်(၁၄)ဘ့ၣ်ပူၤ၀ံၤ ဘၣ်ဒိဘၣ်ထံးတ့ၢ်၀ဲ ပှၤနီၣ်ဂံၢ်(၅)ကလးဃၣ်ဃၣ်အဂ့ၢ် တၢ်သ့ၣ်ညါဘၣ်န့ၣ်လီၤ. ကျဲမုၢ်ကျဲဘိ,ပှၤအိၣ်ဟံၣ်ဃီတဖၣ်, တၢ်သူၣ်တၢ်ဖျးဟီၣ်ခိၣ်လီၢ်တဖၣ်, တၢ်ဆါဟံၣ်တဖၣ်, ကၠိဒီး လီမ့ၣ်အူ၀ဲၤကျိၤတဖၣ်ပၥ်ဃုၥ် ပှၤတ၀ၢတၢ်သူၣ်ထီၣ်လၢအရ့ဒိၣ်တဖၣ် ဘၣ်ဒိဘၣ်ထံးဟးဂီၤကွံၥ်၀ဲအဂ့ၢ် တၢ်သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါ ကီၢ်ကၠီၣ်တဲၣ်, ကီၢ်ရ့ၣ်တနီၤအပူၤစ့ၢ်ကီး ထံဒိၣ်နိယွၤအဃိ ပှၤဘၣ်မူဘၣ်ဒါတဖၣ် မၤ၀ဲဂ့ၢ်ဂီၤအူတၢ်မၤပူၤဖျဲးတၢ်မၤတဖၣ်န့ၣ်လီၤ.
Ref: VOA
