လါစဲးပထ့ဘၢၣ်(၁၆)သီ,၂၀၂၄နံၣ်
ကီၫ်ပယီၤဒီဘ့ၣ် ကွၫ်ဆၢၣ်မဲာ်ဘၣ်ထံတၫ်ဂ့ၫ်ကီ၀ံၤ ဖဲကမျၢၫ်ဘၣ်ကီဘၣ်ခဲအကတီၫ် သုးကီၣ်ကးန့ၣ် တမၤစၢၤတၫ်အမဲာ်ညါ လူၤတ့ၫ်လီၤမ့ၣ်ပိၫ်လၢကဘီယူၤအဃိ ပှၤတ၀ၢတၫ်ကရၢကရိတဖၣ် ဘၣ်ယိၣ်၀ဲလၢ သုးကီၣ်ကး မၤက့ၤတၫ်က့ၤသူၣ်ထီၣ်ဆီလီၤတၫ်ဖံးတၫ်မၤတဖၣ် တန့ၫ်လၢၤဘၣ်အဂ့ၫ်န့ၣ်လီၤ.
သုးကီၣ်ကးတကပၤ ဘၣ်ထွဲဒီးခိၣ်ဃၢၤန့ဆၢၣ်တၫ်လီၤဘၣ်ယိၣ်အဂီၫ် တအိၣ်ကတီၤသးဘၣ်အမဲာ်ညါ ဖဲကမျၢၫ်ဘၣ်ကွၫ်ဆၢၣ်မဲာ် ထံတၫ်ဘၣ်ယိၣ်အကတီၫ် တမၤစၢၤ၀ဲဘၣ်ဒီး အတၫ်လီၫ်လၢဘၣ်ပျၫ်ကွံာ်၀ဲတဖၣ် လဲၤတ့ၫ်လီၤမ့ၣ်ပိၫ်တဖၣ်အဃိ တၫ်မ့ၫ်ကွၫ်န့ၣ် ကဲထီၣ်တၫ်ဘၣ်ယိၣ်လၢ တၫ်က့ၤသူၣ်ထီၣ်ဆီလီၤအဂီၫ်အဂ့ၫ် ပှၤမၤထံရူၫ်ကီၫ်သဲးတဂၤ တဲ၀ဲလီၤ.
“ကမျၢၫ်ဘၣ်သံလၢထံလုၫ်ဘၢတၫ်အဃိန့ၣ် ပှၤမၤသံတၫ်မ့ၫ်သုးကီၣ်ကးလီၤ.မူခိၣ်ကလံၤသီၣ်ဂီၤ၀ဲၤကျိၤ ဟ့ၣ်ပလီၫ် ဒုးသ့ၣ်ညါဆိတၫ်တအိၣ်ဘၣ်.ထံဒိၣ်အကတီၫ် သုးခိၣ်နၫ်တဖၣ်တအိၣ်တပူၤဃီဒီး ကမျၢၫ်ဘၣ်.အ၀ဲသ့ၣ် အခိၣ်ပူၤ အိၣ်ဒၣ်ထဲ တၫ်လီၫ်လၢဘၣ်ပျၫ်ကွံာ်၀ဲတဖၣ် ကလဲၤတ့ၫ်လီၤမ့ၣ်ပိၫ်လီၤ”အဂ့ၫ်တဲ၀ဲလီၤ.
သုးကီၣ်ကးတကပၤ ဖဲလါစဲးပထ့ဘၢၣ်(၁၄)သီနံၤ ဘိးဘၣ်ရၤလီၤတ့ၫ်၀ဲလၢ ပှၤလီၤအုးထံ၀ံၤသံဒီးတၫ်ဟးဂုၤဟးဂီၤစရီတဖၣ်ကမၣ်အဃိ ကဲထီၣ်တၫ်ဘၣ်ဒိဘၣ်ထံးလၢ ပှၤတူၫ်ဘၣ်ထံတၫ်ဂ့ၫ်ကီတဖၣ်အဂီၫ်အဂ့ၫ် ပှၤမၤစၢၤဆီၣ်ထွဲ တၫ်တဂၤတဲ၀ဲလီၤ.
“သုးကီၣ်ကးန့ၣ် လၢထံကီၢ်ဒီတဘ့ၣ် ပှၤသံ(၃၀)ဂၤအဂ့ၫ်ဘိးဘၣ်ရၤလီၤ၀ဲတဘျီဘျီ,သံ(၇၅)အဂ့ၫ် ဘိးဘၣ်ရၤလီၤ၀ဲ တလီၫ်လီၫ်န့ၣ်လီၤ.တၫ်ဘိးဘၣ်ရၤလီၤကမၣ်ဒ်သိးအံၤအဃိ တၫ်မ့ၫ်မၤတၫ်က့ၤသူၣ်ထီၣ်ဆီလီၤတၫ်ဖံးတၫ်မၤန့ၣ် ပှၤလၢကဘၣ်ဒိန့ၣ် မ့ၫ်ကမျၢၫ်လၢကွၫ်ဆၢၣ်မဲာ်ဘၣ်ထံတၫ်ဂ့ၫ်ကီန့ၣ်လီၤ.ပ၀ဲဒု ကမၤစၢၤတၫ်အဃိ ကရၢလၢမၤစၢၤတၫ် ကဒဲကဒဲ ဆဲကျိးသံကွၫ်လိာ်သးန့ၫ်လီၤ.ရမဲသ့(ရမည်းသင်း),ကလီ(ကလော)ဒီးကရ့ၣ်နံၣ်(ကယား)အပူၤ ပှၤသံတၫ်မ့ၫ် ပာ်ဖှိၣ်န့ၣ် အိၣ်လၢအကယၤဂၤအဂ့ၫ် ”တဲ၀ဲန့ၣ်လီၤ.
ကီၫ်ပယီၤပူၤ လါစဲးပထ့ဘၢၣ်(၁၀)သီဒီး(၁၃)သီနံၤအတီၫ်ပူၤ ယိၤဒိၣ်ကလံၤထံး,ယိၤဒိၣ်မုၫ်ထီၣ်,ကညီ, ကရ့ၣ်နံၣ်, န့ၣ်ပၠံၣ်တီၣ်,မတလ့ဒီးပကိတဖၣ်ပူၤ ထံဒိၣ်တ့ၫ်၀ံၤ ကမျၢၫ်ဘၣ်သံလၢကကယၤဂၤ၀ံၤ ဟံၣ်ဃီ(၁)ကလီၫ်ဃၣ်ဃၣ် ဘၣ်ဟးဂီၤ၀ဲအဂ့ၫ် တၫ်သ့ၣ်ညါဘၣ်လၢ ကမျၢၫ်တၫ်ကရၢကရိတဖၣ် တၫ်မၤနီၣ်အဖီခိၣ်န့ၣ်လီၤ.
ဖဲလါစဲးပထ့ဘၢၣ်(၁၄)သီနံၤ သုးကီၣ်ကးအတၫ်ဘိးဘၣ်ရၤလီၤစရီအပူၤ ကလံၤမုၫ်အဃိ ကီၫ်ဆၣ်(၆၄)ဘ့ၣ်အပူၤ ပှၤ(၇၉)ဂၤဘၣ်သံဒီး ဟံၣ်ဃီ ၆၅,၇၅၉ဖျၢၣ် ဟးဂီၤ၀ံၤ စရီအပူၤ စံၣ်ပျီ,တၫ်သူၣ်တၫ်ဖျးလီၫ်လၢထံလုၫ်ဘၢတဖၣ် ပာ်ဃုာ်၀ဲတအိၣ်ဘၣ်အဂ့ၫ် တၫ်သ့ၣ်ညါဘၣ်လီၤ.
Ref: DVB
