လါစပထ့ဘၢၣ်(၅)သီ,၂၀၂၄နံၣ်
သုးကီၣ်ကးစွဲၣ်တီၣ်ကိကျိဖးဒိၣ်သုးကလၢၤတဖျၢၣ်လၢ အိၣ်ဆီလီၤအသးဖဲ ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ဒူပျၥ်ယၥ်, လ့က့ၤကိၤ၀့ၢ်သီအကပၤအံၤ ခီဖျိလၢခီၣ်ဘရၣ်သုးကျိၤဒီး တၢ်ပၢၢ်ဆၢသုးပၥ်ဖှိၣ်တဖၣ် က၀ီၤကးတံၥ်အီၤအဃိ တၢ်ဒုးကဲထီၣ်သးအဂ့ၢ် တၢ်သ့ၣ်ညါဘၣ်လၢ တၢ်ပၢၢ်ဆၢသုးတဖၣ်အအိၣ်လီၤ.
စးထီၣ်လၢလါစပထ့ဘၢၣ်(၃)သီအနံၤ, ဟါလီၤခီလံၤလံၤန့ၣ် တၢ်နၢ်ဟူဘၣ်၀ဲကျိဖးဒိၣ်,ကျိဆံးအကလုၢ်တဖၣ်၀ံၤ တၢ်ဒုးကဲထီၣ်၀ဲဒီတနၤဃၣ်ဃၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
“တၢ်ဒုးတဖၣ်ကဲထီၣ်သး အိၣ်လံ(၂)သီ(၃)သီလံ. အိၣ်ဖဲလဲၣ်ဒီး ခးစိဃီၤဖဲလဲၣ်တပၤတခီ တသ့ၣ်ညါဘၣ်. တၢ်နၢ်ဟူဘၣ်၀ဲ လီၤဂၥ်ဒ်ကျိဖးဒိၣ်အကလုၢ် မ့တမ့ၢ် တၢ်ဟဲတ့ၢ်လီၤမ့ၣ်ပိၢ်အကလုၢ်လီၤ. (၂၇၅)သုးလၢ အိၣ်ဖဲ၀့ၢ်ရၤမတံပူၤတဖၣ် တဟးထီၣ်လၢတၢ်ချၢယံၤလံဘၣ်ဆၣ် ခဲအံၤတၢ်ထံၣ်ဘၣ်လၢ အ၀ဲသ့ၣ်ဟးဒီးမီၣ်တီၣ်တုၤလၢ ၀့ၢ်ပူၤန့ၣ်လီၤ. လီၤဆီဒိၣ်မးန့ၣ်လီၤ. တမ့ၢ်ဒ်ညီနုၥ်အသိးဘၣ်.”အဂ့ၢ် ပှၤ၀့ၢ်ရၤမတံဖိတဂၤ တဲ၀ဲန့ၣ်လီၤ.
“လီၤဂၥ်ဒ်တၢ်ဒုးကဲထီၣ်သးလီၤ. သုးကီၣ်ကးအသုး ဟံးန့ၢ်ခီၣ်တဃၣ်လၢ စွဲၣ်တီၣ်ကိ၀ံၤ ထၢဖှိၣ်တၢ်အီၣ်တၢ်အီ ဒီး မၤပှဲၤအါထီၣ်အသုးအဂံၢ်အဘါတဖၣ်အဃိ ခီၣ်ဘရၣ်သုးကျိၤပၥ်ဃုၥ် တၢ်ပၢၢ်ဆၢသုးတဖၣ်ကးတံၥ်အီၤလၢ ဟီၣ်ခီၣ်မဲၥ်ဖံးခိၣ်၀ံၤ ဒုး၀ဲလၢဒြိန့ၣ်လီၤ. တၢ်ဘၣ်ဒိဘၣ်ထံးတခီတသ့ၣ်ညါဘၣ်ဒံးဘၣ်. စွဲၣ်တီၣ်ကိသုးကလၢၤပူၤ ဆီလီၤပၥ်ကျိဖးဒိၣ်၀ံၤ ခးစိဃီၤဆူသ၀ီလၢအဘူးဒီးဖဲန့ၣ်တဖၣ်အပူၤလီၤ. လၢစပထ့ဘၢၣ်(၂)သီအနံၤလံၤလံၤန့ၣ် တၢ်ဒုးကဲထီၣ်သးအဂ့ၢ်” ဟီၣ်ခီၣ်မဲၥ်ဖံးခိၣ်တၢ်ပၢၢ်ဆၢသိၣ်ဒူတဂၤ စ့ၢ်ကီးတဲကဒီး၀ဲန့ၣ်လီၤ.
သုးကီၣ်ကး ဟံးန့ၢ် BGFတၢ်မၤစၢၤဒီး ကန့ၢ်ပၢဘၣ် ကညီကီၢ်စဲၣ်, လီၢ်က၀ီၤတနီၤအဂီၢ် ဂုၥ်ကျဲးစၢ၀ဲ၀ံၤ တၢ်ဒုးတဖၣ်ကဲထီၣ်သးဒီး KNLAတီခိၣ်ရိၣ်မဲတၢ်ပၢၢ်ဆၢသုးတဖၣ် ခဲအံၤခဲအံၤန့ၣ်လီၤ.
Ref: မောင်း
