လါစဲးပထ့ဘၢၣ်(၅)သီ,၂၀၂၄နံၣ်
ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA )သုးပာ်ဖှိၣ်သုးကျိၤတဖၣ် ထီၣ်ဒုးဃီၤ၀ဲ သုးကီၣ်ကးသုးကလၢၤတဖၣ်လၢအိၣ်ဖဲ လၢၢ်ကတံၤ-ဃိၣ်သၢဖျၢၣ်ကျဲမုၫ်ဖီခိၣ်၀ံၤ က၀ီၤဒုး၀ဲ အနါကွ့တၣ်တိာ်ကူၣ်ကျဲၤသုးကလၢၤအဂ့ၫ် တၫ်မဲာ်ညါတၫ်ဒုးပျီဂ့ၫ်ခီၣ်ထံး တၫ်ကစီၣ်တဲ၀ဲလီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၆)ဟီၣ်က၀ီၤ, လၢၢ်ကတံၤ-ဃိၣ်သၢဖျၢၣ်ကျဲမုၫ်ဖီခိၣ် အနါကွ့တၫ်တိာ်ကူၣ်ကျဲၤသုးကလၢၤဒီးသုးရ့ၣ်သုးကလၢၤတဖၣ်အံၤ စးထီၣ် ဖဲလါအီကူး(၂၅)သီနံၤန့ၣ် KNLA သုးပာ်ဖှိၣ်တဖၣ် ခး၀ဲဒီးကျိဖးဒိၣ်၀ံၤ ထီၣ်ဒုးဃီၤ၀ဲလီၤ.
လါအီကူး(၂၉)သီနံၤ ,ဂီၤအကတီၫ်(စကခ-၁၉)လၢအိၣ်ဆီလီၤအသးဖဲ၀့ၫ်၀ီၫ်ရီ အစုတီၤဖီလာ်(ခမရ-၅၈၃,ခမရ-၅၈၇ ပာ်ဖှိၣ်ထီၣ်သးဂံၫ်ဘါ(၁၀၀)ဂၤဃၣ်ဃၣ် ဟဲထီၣ်လၢသုးကျိၤဒ်သိး ကမၤပှဲၤဂံၫ်ဘါဖဲအနါကွ့တၫ်တိာ်ကူၣ် ကျဲၤသုးကလၢၤအကတီၫ် ဘၣ်တၫ်ခိးခးအ၀ဲသ့ၣ်လၢတၫ်ဘၢၣ်စၢၤန့ၣ်လီၤ.
တၫ်ခိးခးအီၤအပူၤ သုးကီၣ်ကးတကပၤ ဘၣ်ဒိဘၣ်ထံးနး၀ံၤ ဂံၫ်ဘါလၢအိၣ်တ့ၫ်(၇၀)ဂၤဃၣ်ဃၣ် ပာ်ဖှိၣ်ထီၣ်သးဒီး အနါကွ့တၣ်တိာ်ကူၣ်ကျဲၤသုးကလၢၤန့ၣ်လီၤ. တၫ်ဘၣ်ဒိဘၣ်ထံးသုတအိၣ်ဒိၣ်ဒိၣ်မုၢ်မုၢ်တဂ့ၤအဂီၫ် ကတီၤမၤ၀ဲဒီး ကိးမုၫ်နံၤဃၣ်ဃၣ်ဒုး၀ဲအဂ့ၫ် တၫ်မဲာ်ညါတၫ်ဒုးပျီဂ့ၫ်ခီၣ်ထံးတၫ်ကစီၣ်တဲ၀ဲလီၤ.
“အခဲအံၤဒု အိၣ်ဒၣ်က့ၤနီနုာ်လီၤအီၤဆူ သုးကလၢၤပူၤလီၤ. မ့ၫ်တဲန့ၣ် လၢသ၀ီပူၤအိၣ်ရၤလီၤအသးအဃိ ပပာ်ဖှိၣ်အီၤ အယီကယီ၀ံၤ နီနုာ်လီၤအီၤဆူ သုးကလၢၤပူၤလီၤ.အပှၤလၢ ဟဲထီၣ်လၢခံတဖၣ် အိၣ်ကးတံာ်အသးအိၣ်၀ဲလီၤ. အ၀ဲ သ့ၣ်သူ၀ဲကျိဖးဒိၣ်ဒီးကဘီယူၤတဖၣ်တပယူာ်ဃီအဂ့ၫ်” တဲ၀ဲလီၤ.
သုးကီၣ်ကးအသုးကလၢၤတကပၤ ခးစိကဒါက့ၤတၫ်လၢကျိဖးဒိၣ်တဖၣ်အဃိ လီၤတဲာ် ဖဲသ၀ီလၢအိၣ်ဘူးတဖၣ် အပူၤ၀ံၤ လီၫ်က၀ီၤကမျၢၫ် ဟံၣ်ဃီတဖၣ်ဘၣ်ဟးဂီၤ၀ဲလီၤ.
ပှၤစံၣ်သုးပှၤလီၫ်အိၣ်ကမှံဖိတဖၣ် လၢအိၣ်ရၤလီၤအသးအံၤ တၫ်မ့ၫ်ပာ်ပနီၣ်န့ၫ်အီၤ တၫ်အိၣ်ကဒုလီၫ်တတီၤန့ၣ် ကအိၣ်ဆိးအီၣ်အီအဂီၫ် ကဘၣ်လိာ်ဖိးဒ့၀ဲအဂ့ၫ် ပှၤမၤစၢၤပှၤလီၢ်အိၣ်ကမှံဖိတဖၣ် တဲ၀ဲလီၤ.
ပှၤမၤစၢၤ ပှၤဃ့ၫ်သုးပှၤလီၫ်အိၣ်ကမှံဖိတဂၤတဲ၀ဲလၢ”ပှၤလီၫ်အိၣ်ကမှံဖိတဖၣ် အတၫ်လိၣ်ဘၣ်အိၣ်အါမးလီၤ. ဃ့ၫ်သုးဘၣ်ဆၣ် တအိၣ်သကိးဃုာ်တပူၤဃီဘၣ်.အ၀ဲသ့ၣ်အိၣ်ရၤလီၤအသးလီၤ.လၢတၫ်အိၣ်ရၤလီၤသးဒ်သိးအံၤန့ၣ် တၫ်ကီတၫ်ခဲအိၣ်အါမးလီၤ.တၫ်မ့ၫ်ပာ်ပနီၣ်န့ၫ်အီၤ တၫ်အိၣ်ကဒုလီၫ်တတီၤန့ၣ် ပှၤမၤစၢၤတၫ်တဖၣ် ကအိၣ်ထီၣ်လီၤ. အ၀ဲသ့ၣ်အဂီၫ် ပှၤမၤစၢၤတၫ်တဖၣ် မ့ၫ်ဟ့ၣ်၀ဲ ဟုသး,သိချါ,ဆူၣ်ချ့တၢ်ကဟုကယာ်အဂီၫ် ကသံၣ်သရၣ်,သရၣ်မုၣ် မုာ်သးမၤကလီတဖၣ်မ့ၫ်အိၣ်န့ၣ် ကကဲထီၣ်တၣ်ဘၣ်ဘျူးဖးဒိၣ်အဂ့ၫ်”တဲ၀ဲလီၤ.
KNUဘိးဘၣ်ပာ်ဖျါဃၣ်၀ဲလၢ စးထီၣ် ဖဲ၂၀၂၁နံၣ် လါဖ့ၤဘြူၤအါရံၤ(၁)နံၤတုၤ ၂၀၂၄နံၣ်, (၃)နံၣ်ဘျဲၣ်အတီၢ်ပူၤ လီၫ်က၀ီၤကမျၢၫ် (၁၂)ကလီၫ်ဘျဲၣ်န့ၣ် ဘၣ်ပာ်တ့ၫ်ဟံၣ်ဃီ ဃ့ၫ်ပူၤဖျဲးသးန့ၣ်လီၤ.
Ref: DVB
