လါစဲးပထ့ဘၢၣ်(၅)သီ,၂၀၂၄နံၣ်
ထံကီၫ်ဒီတဘ့ၣ်အပူၤ ပှၤသးနံၣ်ပှဲၤလၢကဘၣ်ကဲသုးတဖၣ် အနီၫ်ကစၫ်တၫ်ဂ့ၫ်တၫ်ကျိၤတဖၣ် တၫ်ကမၤန့ၫ်ဘၣ်အဂီၫ် ဒုးအိၣ်ထီၣ်၀ဲ တၫ်ပၢဆှၢကမျၢၫ်တၫ်ဘၣ်ကဲသုး နီၫ်ကစၫ်တၫ်ဂ့ၫ်တၫ်ကျိၤသနူ (National Service Information Management System-NSIMS)အဂ့ၫ် တၫ်ကိးကမျၢၫ်တၫ်ဘၣ်ကဲသုး လီၫ်ခၢၣ်သးပှၤပၢၤလီၫ်ဆ့ၣ်နီၤ သုးခိၣ်ကျၢၫ်ဂီၫ်ဂ့ၫ်တ့ၣ်အီၣ်စါ(တင်အောင်စန်း)တဲ၀ဲအဂ့ၫ် သုးကီၣ်ကးတၫ်ကစီၣ်သန့တဖၣ်ပာ်ဖျါ၀ဲ ဖဲလါစဲးပထ့ဘၢၣ်(၄)သီနံၤန့ၣ်လီၤ.
သနူ၀ဲအံၤ ဘၣ်ထွဲကမျၢၫ်တၫ်ဘၣ်ကဲသုး ပှၤမၤတၫ်ဖိကရၢ ဒုးအိၣ်ထီၣ်၀ဲအမိၫ်လံၤမိၫ်ပှၫ်၀ံၤ ၀ဲၤကျိၤတဖၣ်ကပာ်ဖှိၣ်မၤသကိးဘၣ်တၫ်အဂီၫ် သုးခိၣ်ကျၢၫ်ဂီၫ်ဂ့ၫ် တ့ၣ်အီၣ်စါ တဲလီၤ၀ဲ ဖဲလါစဲးပထ့ဘၢၣ်(၃)နံၤ လီၫ်ခၢၣ်သးကမျၢၫ်တၫ်ဘၣ်ကဲသုးတၫ်အိၣ်ဖှိၣ်အပူၤန့ၣ်လီၤ.
တၫ်ပၢဆှၢရဲၣ်ကျဲၤ ကမျၢၫ်တၫ်ဘၣ်ကဲသုး နီၫ်ကစၫ်တၫ်ဂ့ၫ်တၫ်ကျိၤသနူ(NSIMS)န့ၣ် က၀ီၤဒ့ဒီးဒူသ၀ီစုာ်စုာ် ပှၤသးနံၣ်ပှဲၤလၢကဘၣ်ကဲသုး အနီၫ်ကစၫ်တၫ်ဂ့ၫ်တၫ်ကျိၤတဖၣ် ,ကဘၣ်ကဲသုးတၫ်အိၣ်သးတဖၣ် ဒီးပှၤလၢပူၤဒီးတၫ်ဘၣ်ကဲသုးတဖၣ်,ပှၤကကဲသုး တၫ်မၤနီၣ် သုတအါတလၢတဂ့ၤအဂီၫ်မၤ၀ဲအဂ့ၫ် ကီၫ်ခီသုးကီၣ်ကးကရၢဖိ လၢတပာ်ဖျါအမံၤတဂၤတဲ၀ဲလီၤ.
“တၫ်မၤနီၣ်တဖၣ် ကဘၣ်လိာ်ဖိးဒ့အဂီၫ်,သုတအိၣ်တ့ၫ်အဂီၫ်ဒီး သုတကထၢလိာ်သးအဂီၫ်, လၢခံတခါ ပှၤလၢကဲသုးသးနံၣ်ပှဲၤတဖၣ် တၫ်ကထုးထီၣ်န့ၫ်အီၤတၫ်အုၣ်ကီၤလၢ ကဲသုး၀ံၤလံအဂ့ၫ်န့ၣ်လီၤ.
တၫ်ဂ့ၫ်တၫ်ကျိၤတဖၣ်အံၤ လီၤဘၣ်လၢထံကီၫ်ဒီတဘ့ၣ် ပှၤသးနံၣ်ပှဲၤလၢကဘၣ်ကဲသုးတဖၣ်အဖီခိၣ်အဃိ မၤဃံးထီၣ်၀ဲတၫ်ဟးထီၣ်ဆူထံချၢကီၫ်ချၢအဂ့ၫ် ပှၤ၀့ၫ်တကူၣ်ဖိတဂၤတဲ၀ဲလီၤ.
တၫ်ဂ့ၫ်တၫ်ကျိၤတၫ်မၤနီၣ်တဖၣ်အံၤ တၫ်ကသမံသမိး၀ဲပှၤနီၫ်တဂၤ ဖဲကဘီယူၤသန့ဒီးကီၫ်ဆၢတြဲၤတဖၣ်၀ံၤ မ့ၫ်ပာ်ဃုာ်လၢတၫ်ဘၣ်ကဲသုးစရီပူၤန့ၣ် တမ့ၫ်ကဒုးဟးထီၣ်၀ဲဘၣ်အဂ့ၫ်တဲ၀ဲလီၤ.
လၢထံကီၫ်ဒီတဘ့ၣ်,၀့ၫ်ခဲလၢာ်အဖျၢၣ်(၇၀)ဘျဲၣ် လၢသုးကီၣ်ကးဘၣ်ပျၫ်ကွံာ်၀ဲအံၤ ကမၤပှဲၤဂံၫ်ဘါအဂီၫ် သုးကီၣ်ကးန့ၣ် ဒုးမူထီၣ်ကမျၢၫ်တၫ်ဘၣ်ကဲသုး၀ံၤ မၤပှဲၤသုးဂံၫ်ဘါလီၤ.
တၫ်ကိးကမျၢၫ်တၫ်ဘၣ်ကဲသုးအဖီခိၣ် ပှၤလၢတလဲၤတဖၣ် ကဟံးန့ၫ်၀ဲဂ့ၫ်၀ီအဂ့ၫ် သုးကီၣ်ကးဘိးဘၣ်ရၤလီၤဃာ်၀ဲအဃိ တၫ်ဘျၢအံၤအိၣ်ထီၣ်၀ံၤအလီၫ်ခံ သးစၫ်တဖၣ်ဟးထီၣ်ဆူထံဂုၤကီၫ်ဂၤ လၢကျဲအကလုာ်ကလုာ်အါထီၣ်၀ဲလီၤ.
သုးကီၣ်ကးန့ၣ် ဖဲလါဖ့ၤဘြူၤအါရံၤအသီ(၁၀)နံၤ ဘိးဘၣ်ရၤလီၤကမျၢၫ်တၫ်ဘၣ်ကဲသုးတၫ်ဘျၢ၀ံၤအလီၫ်ခံ ကရၢကရိဒုးအိၣ်ထီၣ် တၫ်ကိးကမျၢၫ်တၫ်ဘၣ်ကဲသုးကရၢ တကတီၫ်ဃီ၀ံၤ လၢကတီၫ်အံၤ ရဲၣ်ကျဲၤ၀ဲလၢကကိး၀ဲ(၅)၀ီတ၀ီ ကမျၢၫ်တၫ်ဘၣ်ကဲသုး သုးတၫ်မၤလိန့ၣ်လီၤ.
Ref: RFA
