လါအီကူး(၃)သီ,၂၀၂၄နံၣ်
တၫ်ထံၣ်န့ၣ် တၤအုးလၢၫ်ပှၤဆါတဂၤလၢဒ၀ဲၫ်အဃိ ဘၣ်တၫ်အိၣ်ခိးကွၫ်ကူစါယါဘျါအီၤ ဖဲကမျၢၫ်တၫ်ဆါဟံၣ်ဖးဒိၣ် တၫ်ကူစါယါဘျါတၫ်ချၢပှၤဆါ၀ဲၤကျိၤအပူၤအဂ့ၫ် တၫ်သ့ၣ်ညါဘၣ်လၢ ဟံၣ်ဖိဃီဖိတဖၣ်အိၣ်န့ၣ်လီၤ.
ပှၤဆါအံၤ မ့ၫ်ပိာ်မုၣ်လၢသးနံၣ်အိၣ်(၅၃)နံၣ်တဂၤလီၤ. အ၀ဲန့ၣ် အိၣ်ဟးထီၣ်လၢကီၫ်မလ့ရှါကဘီယူၤသန့တဆီ ဒီးဖဲလါယူၤလံ(၇)သီနံၤန့ၣ် စံၣ်လီၤ၀ဲဖဲ၀့ၫ်တကူၣ်ကဘီယူၤသန့၀ံၤ လါယူၤလံအသီ(၁၀)အနံၤန့ၣ် လဲၤတုၤဆူ ၀့ၫ်ဒ၀ဲၫ်အဂ့ၫ် ပှၤလၢအိၣ်ဘူးဒီးပှၤဆါတဲ၀ဲလီၤ.
ပိာ်မုၣ်၀ဲန့ၣ် ဖဲလါအီကူး(၂၉)သီနံၤန့ၣ် စးထီၣ်ဆိးက့၀ံၤ ဖဲ(၄)သီနံၤတနံၤ လါစဲးပထ့ဘၢၣ်(၂)သီအနံၤန့ၣ် လဲၤကွၫ်၀ဲဖဲမဲၣ်ဒံၣ်လဲတၣ်ဆါဟံၣ်(မယ်ဒီလန်းဆေးရုံ)အကတီၫ် တၫ်ထံၣ်ဘၣ် တၤအုးလၢၫ်တၫ်ဆါပနီၣ် လၢတလီၤတံၫ်အဂ့ၫ် ပှၤအိၣ်ဘူးဒီးပှၤဆါတဲ၀ဲလီၤ.
ဖဲလါအီကူး(၁၄)သီအနံၤ တၤအုးလၢၫ်တၫ်ဆါန့ၣ် ဟီၣ်ခိၣ်ဒီဖျၢၣ်ဆူၣ်ချ့ကရၢ(WHO)ဘိးဘၣ်ရၤလီၤ၀ဲ ဒ်ထံဂုၤကီၫ်ဂၤကမျၢၫ်ဆူၣ်ချ့ဂ့ၫ်ဂီၫ်အူတၫ်အိၣ်သးအသိးန့ၣ်လီၤ.
တၤအုးလၢၫ်တၫ်ဆါန့ၣ် ဘၣ်ကူဘၣ်ဂာ်ခီဖျိလၢဆၣ်ဖိကီၫ်ဖိတဆီဒီးပှၤကညီကဒဲကဒဲတဆီ, အိၣ်၀ဲခံကလုာ်အဂ့ၫ် ဆူၣ်ချ့၀ဲၤကျိၤအတၫ်ဂ့ၫ်တၫ်ကျိၤအဖီခိၣ် တၫ်သ့ၣ်ညါဘၣ်လီၤ.
တၫ်ဆါဃာ်စးထီၣ်နုာ်လီၤ၀ံၤ(၁)သီတုၤ(၂၁)သီအတီၫ်ပူၤ တၫ်ဆါအပနီၣ်စးထီၣ်ကဲထီၣ်၀ဲလီၤ. တၫ်ဆါအပနီၣ်တဖၣ်မ့ၫ်၀ဲ မဲာ်သၣ်,ကိာ်ပူၤ,စု,ခီၣ်,ဘ့ၣ်ခိၣ် ထီၣ်ဂီၤ,ကူး,ကိာ်ယူၤဘိဆါ,ခိၣ်သၣ်ဃံဆါ,တၫ်ကိၫ်ထီၣ် (၃၈.၅)ဒံၣ်ကရံၣ်ဆူအဖီခိၣ်,ဘီး,ထူၣ်ပျၫ်ဆါ,လီၤဘှံးလီၤတီၤတၫ်ပနီၣ်တဖၣ်ကဲထီၣ်၀ဲအဂ့ၫ် ဆူၣ်ချ့၀ဲၤကျိၤ ဘိးဘၣ် ပာ်ဖျါ၀ဲလီၤ.
လၢကတီၫ်အံၤ ဒ၀ဲၫ်ကဘီယူၤသန့ ကီၫ်ပူၤပှၤဟးထီၣ်က့ၤလီၤတဖၣ် ဟဲအိၣ်ပတုာ်အလီၫ်စ့ၫ်ကီး အပူၤကွံာ်(၃)သီန့ၣ် တၫ်ထီထီၣ်ဃာ် စဲးထိၣ်တၫ်ကိၫ်တဖၣ်အဂ့ၫ် လီၫ်က၀ီၤပှၤဟးထီၣ်က့ၤလီၤတဖၣ်တဲ၀ဲလီၤ.
Ref: Dawei Watch
