လါစပထ့ဘၢၣ်(၄)သီ,၂၀၂၄နံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ကီၢ်ရ့ၣ်ချၢၣ်လွံၢ်ထူၣ်, ဆီထံးကီၢ်ဆၣ်ဟီၣ်က၀ီၤအပူၤ သုးကီၣ်ကးဖီၣ်န့ၢ်ဆူၣ် ကမျၢၢ်(၂)ဂၤအသိး ဟံးန့ၢ်ဆူၣ်၀ဲကမျၢၢ်(၂)ဂၤန့ၣ် အကျီၢ်(၂)ဒု တကးဘၣ်ကမျၢၢ်(၁)ဂၤယီၢ်ဘၣ်၀ဲ သုးကီၣ်ကးဒိးလီၤမ့ၣ်ပိၢ်အဃိဘၣ်ဒိ၀ဲအဂ့ၢ် ခ့ၣ်အဲၣ်ယူၣ်-လီၢ်ခၢၣ်သးပၥ်ဖျါဃၣ်၀ဲန့ၣ်လီၤ.
လါအီကူး(၂၇)သီအနံၤ, သုးကီၣ်ကးအသုး(ခမရ-၃၅၁)လၢ အိၣ်ဆီလီၤပၥ်သးဖဲ လဲၢ်ပး(လည်ပတ်)သ၀ီအံၤ ဖီၣ်န့ၢ်ဆူၣ်၀ဲ ပရဲစံၣ်သ၀ီဖိ စီၤကီၢ်လၤသူဒီး ယ့ၣ်လဲသ၀ီဖိ အူသါထိလ့လၢ အကွၢ်၀ဲကျီၢ်ပနၢ်၀ံၤ က့ၤဖီၣ်န့ၢ်ဆူၣ်၀ဲစ့ၢ်ကီး ကမျၢၢ်(၂)ဂၤန့ၣ် အကျီၢ်(၂)ဒုအဂ့ၢ် စံး၀ဲန့ၣ်လီၤ.
လါအီကူး(၂၉)သီအနံၤ, ဟါ(၁၀)နၣ်ရံၣ်အဆၢကတီၢ် သုးကီၣ်ကးအသုး(ခမရ-၄၃၉)သုးရ့ၣ် ခးလီၤ(၁၂၀-မမ)ကျိဖးဒိၣ်အဃိ လဲၤလီၤတဲၥ်ပိၥ်ဖးထီၣ်၀ဲဒၣ်ဖဲ ပီးစလိးသ၀ီအပူၤ၀ံၤ အူမၠ့းငွ့ၣ်သးနံၣ်(၆၄)နံၣ်တဂၤ ဘၣ်ဒိသံ၀ဲန့ၣ်လီၤ.
တနံၤဃီဖဲ မုၢ်ထူၣ်(၁း၃၀)နၣ်ရံၣ်အဆၢကတီၢ် ကၠိကိညီၣ်ခၠ့ၣ်ထီးသ၀ီဖိ မီၣ်ပၠ့းဖၠိထဲးလၢ သးနံၣ်(၁၈)နံၣ်အိၣ်တဂၤ စ့ၢ်ကီး ယီၢ်ဘၣ်၀ဲ သုးကီၣ်ကးဒိးလီၤဃၣ်မ့ၣ်ပိၢ်၀ံၤ အခီၣ်ဒ့ကိၥ်ခံခီပၤစလၢၤ ဘၣ်ဒိ၀ဲန့ၣ်လီၤ.
တကးဘၣ် ဖဲလါစပထ့ဘၢၣ်(၁)သီအနံၤစ့ၢ်ကီး သုးကီၣ်ကးအသုး(ခမရ-၃၀၆)ဖၠူသုးရ့ၣ်အံၤ ဃံးန့ၢ်ဆူၣ်၀ဲကမျၢၢ်န့ၢ်ပၢဘၣ် ဟုသး,ဟီၣ်စီတဖၣ်ဒီး တၢ်ဖိတၢ်လံၤအဂုၤအဂၤတဖၣ်န့ၣ်လီၤ.
လၢန့ၣ်အမဲၥ်ညါ KNLAဒီးသုးကီၣ်ကးအဘၢၣ်စၢၤ တၢ်ဘၣ်သဂၢၢ်ခးလိၥ်သးအပူၤ ယွၣ်ကၠံအ့သ၀ီဖိ မီၣ်မၠိထွ့ သးနံၣ်(၄၀)နံၣ်ဘၣ်ဒိ၀ဲအဂ့ၢ် ပၥ်ဖျါဃၣ်၀ဲန့ၣ်လီၤ. ခီဖျိလၢတၢ်ဒုးကဲထီၣ်သးအဃိ ယွၣ်ကၠံအ့သ၀ီ, နိးကလီၢ်သ၀ီဒီး တီၣ်စူးသ၀ီဖိတဖၣ် ဘၣ်ဃ့ၢ်ပူၤဖျဲးသးန့ၣ်လီၤ.
