လါစဲးပထ့ဘၢၣ်(၄)သီ,၂၀၂၄နံၣ်
တၫ်ဒုးဆူၣ်အဃိ လွဲၫ်ကီၫ်-ဒံၣ်မီဆိး ကျဲမုၫ်ဖးဒိၣ်ပာ်ဃုာ် ကျဲလၢဘျးစဲဘၣ်ထွဲတဖၣ် ကမျၢၫ်သုတဟးထီၣ်က့ၤလီၤတဂ့ၤအဂီၫ် ကရ့ၣ်နံၣ်ဒီကလုာ်တၫ်ဒီသဒၢသုး(KNDF)ထုးထီၣ်ဟ့ၣ်ပလီၫ်၀ဲဖဲလါစဲးပထ့ဘၢၣ်(၃)သီနံၤန့ၣ်လီၤ.
ဖဲလါအီကူး(၁)သီနံၤတုၤ (၃၁)သီနံၤ ကရ့ၣ်နံၣ်ကီၫ်စဲၣ်အပူၤ သုးဂ့ၫ်၀ီတၫ်အိၣ်သးန့ၣ် ဖဲ ကရ့ၣ်နံၣ်ဒီကလုာ်တၫ်ဒီသဒၢသုး (KNDF) ထုးထီၣ်ဘိးဘၣ်ရၤလီၤ၀ဲအကတီၫ် ထုးထီၣ်ဟ့ၣ်ပလီၫ်ဃုာ် ကမျၢၫ်တဖၣ်န့ၣ်လီၤ.
သုးကီၣ်ကးခးလီၤကျိဖးဒိၣ်ကိးမုၫ်နံၤဒဲးအဃိ ကမျၢၫ်ကပလီၫ်သးအဂီၫ် တြီဃာ်၀ဲအဂ့ၫ် ကရ့ၣ်နံၣ်ဒီကလုာ်တၫ်ဒီသဒၢ သုးမုၫ်ဒိၣ်(KNDF)လီၫ်ခၢၣ်သး တၫ်ကစီၣ်ဒီးတၫ်ဘိးဘၣ်ရၤလီၤ၀ဲၤကျိၤ ပှၤဘၣ်မူဘၣ်ဒါ တဂၤတဲ၀ဲလီၤ.
“လွဲၫ်ကီၫ်-ဒံၣ်မီဆိးကျဲမုၫ် သုးကီၣ်ကး ဟဲထီၣ်လၢသုးကျိၤလီၤ.ကျဲမုၫ်ဒီတကျိၤ ဟံၣ်တဖၣ် သုးကီၣ်ကးဒွဲၣ်အူ၀ဲအိၣ် န့ၣ်လီၤ.လၢဒံၣ်မီဆိးတကပၤ ဒူသ၀ီလၢပှၤအိၣ်အါတဖၣ်အပူၤ ခး၀ဲဒီးကျိဖးဒိၣ်အိၣ်၀ဲလီၤ.ကျဲ၀ဲန့ၣ် သုးကီၣ်ကး ဟဲထီၣ်လၢသုးကျိၤအဃိ ကမျၢၫ်သုတသူ၀ဲတဂ့ၤအဂီၫ် မ့ၫ်တၫ်ဟ့ၣ်ကူၣ်တဲဆီၣ်တခူထီၣ်၀ဲလီၤ.ကိးမုၫ်နံၤ မ့ၫ်တုၤဟါခီ အကတီၫ်န့ၣ် ခးလီၤကျိဖးဒိၣ် အစှၤကတၢၫ်(၆)ဖျၢၣ်တုၤ(၁၀)ဖျၢၣ်န့ၣ်လီၤ.ခးလီၤတၫ်လၢကမျၢၫ် အိၣ်က၀ီၤဒ့တဖၣ် အပူၤအိၣ်၀ဲလီၤအဂ့ၫ်”တဲ၀ဲလီၤ.
ဖဲလါအီကူးအပူၤ သုးကီၣ်ကးဒီးတၫ်ပၢၫ်ဆၢသုးပာ်ဖှိၣ်တဖၣ်အဘၢၣ်စၢၤ တၫ်ဒုးဆူၣ်ထီၣ်၀ံၤ သုးကီၣ်ကးအသုးဖိတဖၣ် ဒွဲၣ်အူ၀ဲပၣ်ကါ(ပန်ကန်း),ဒီပိစံၣ်(ဒေါပိုးစီ),(၆)မံးလာ်သ၀ီ ဟံၣ်အဖျၢၣ်(၄၀)ဘျဲၣ် လၢအိၣ်ဖဲလွဲၫ်ကီၫ်-ဒံၣ်မီဆိး ကျဲမုၫ်အကပၤတဖၣ်န့ၣ်လီၤ.
ဖဲလါအီကူးအကတၢၫ်တနွံအပူၤ တၫ်ဒုးတအိၣ်ဘၣ်အမဲာ်ညါ သုးကီၣ်ကးအသုးလၢအိၣ်ဆီလီၤဃာ်အသး ဖဲဖရူၫ်ဆိၣ်ဒီး၀့ၫ်ဒံၣ်မီဆိးအကပၤတဖၣ် ခးဟံၣ်ဃီတဖၣ်အဃိ ဟံၣ်ဟးဂီၤ(၃)ဖျၢၣ်၀ံၤ ဖိသၣ်(၁)ဂၤဘၣ်ဒိဘၣ်ထံးန့ၣ်လီၤ.
တၫ်ဒုးတၫ်အိၣ်သး တၫ်ပာ်ဖျါအပူၤ ဘီၣ်လခဲဒီးမဲစလီကစၢၫ်(မဲစလောင်းတောင်)အဘၢၣ်စၢၤ သုးကီၣ်ကးယ့ၣ်ကၠီၣ်သုးကလၢၤ(ရေကျော်စခန်း)န့ၣ် ဖဲလါအီကူး(၈)သီနံၤ KNDF,ဒီးPDFသုးပာ်ဖှိၣ်တဖၣ် ထီၣ်ဒုးမၤန့ၫ်၀ဲ၀ံၤ မၤန့ၫ်တၫ်စုက၀ဲၤအါမးန့ၣ်လီၤ.တကးဘၣ် သုးကီၣ်ကးအသုးရ့ၣ်နီၫ်ဂံၫ်(၂)ဒီးတၫ်မဲာ်ညါသုးကလၢၤတဖၣ်လၢအိၣ်ဆီလီၤအသး ဖဲ၀့ၫ်ဖါဆီကရ့ၣ်နံၣ်သုးပာ်ဖှိၣ်တဖၣ်ထီၣ်ဒုး၀ဲအဂ့ၫ် ပာ်ဖျါဃာ်၀ဲလီၤ.
Ref: RFA
