လါစပထ့ဘၢၣ်(၃)သီ,၂၀၂၄နံၣ်
ကီၢ်ကၠီၣ်တဲၣ်, လၢ၀့ၢ်မဲဆီး ခီ၀ဲသူမွဲကျိနံၤတဆီဒီး ဆူကီၢ်ပယီၤတပၤ ပှၤလၢတွံၢ်န့ၢ်တၢ်ဆဲးကျိးပျံၤဒီးလီမ့ၣ်အူပျံၤတဂၤ ကၠီၣ်တဲၣ်ပၢၤကီၢ်သုးတဖၣ် ဖီၣ်န့ၢ်၀ဲဖဲသူမွဲနံၤန့ၣ်လီၤ.
Jongrak Leelaလၢသးနံၣ်အိၣ်(၃၀)နံၣ်လၢ ကၠီၣ်တဲၣ်ပၢၤကီၢ်သုးဒီးကၠီၣ်တဲၣ်သုးမုၢ်ဒိၣ်ဖီၣ်ဃၣ်၀ဲအံၤန့ၣ် အိၣ်၀ဲဒၣ်ဖဲကၠီၣ်တဲၣ်-ပယီၤကီၢ်ဆၢအကပၤ မဲးကစၣ်(မဲ့ကဆာ)ကီၢ်ဆၣ်, ဘးမဲးက့းမဲၣ်(ဘန်မဲ့ကစ်မိုင်)သ၀ီ၀ံၤ အ၀ဲပၥ်ဃုၥ်တၢ်ဆဲးကျိးလီမ့ၣ်အူပျံၤတဖၣ်ဒီး တၢ်ဆဲးကျိးလီမ့ၣ်အူတၢ်ပီးတၢ်လီတဖၣ်စ့ၢ်ကီး တၢ်မၤန့ၢ်၀ဲန့ၣ်လီၤ.
ကၠီၣ်တဲၣ်ပၢၤကီၢ်သုးမၤန့ၢ်၀ဲ တၢ်ပီးတၢ်လီတဖၣ်အကျါ ထးပီၤဘိအထီ (၁၆)ခါ,တၢ်ဆဲးကျိးလီမ့ၣ်အူပျံၤ, (Water Rocket), စဲးထုးထီၣ်ကလံၤ(၁)ဖျၢၣ်ဒီး တၢ်ပီးတၢ်လီအဂုၤအဂၤတဖၣ် စ့ၢ်ကီးပၥ်ဃုၥ်၀ဲန့ၣ်လီၤ.
ပှၤလၢ ကၠီၣ်တဲၣ်ပၢၤကီၢ်ဒီးသုးတဖၣ်ဖီၣ်ဃၣ်၀ဲန့ၣ် တၢ်ဆှၢထီၣ်အီၤဆူ မဲဆီး၀့ၢ်ပၢၤကီၢ်သုးကလၢၤ၀ံၤ တၢ်ကလိၥ်ကွီၢ်အီၤလၢ သဲစးတၢ်ဘျၢကန့ၢ်အဂီၢ် တၢ်မၤ၀ဲတၢ်သမံသမိးတဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
တၢ်ကစီၣ်တဖၣ်ဟးထီၣ်လၢ ကၠီၣ်တဲၣ်-ပယီၤကီၢ်ဆၢ ၀့ၢ်ရၤမတံ, လၢရွ့ၣ်ကိကိၣ်အပူၤ တၢ်မၤတဖိးသဲစးအိၣ်လဲတၢ်လိၥ်ခိၣ်လိၥ်ကွဲတဖၣ်၀ံၤအလီၢ်ခံ ကၠီၣ်တဲၣ်ပဒိၣ်ပၥ်ပတုၥ်ကွံၥ်တၢ်ဟ့ၣ်အ့ၣ်ထၣ်နဲးတၢ်ဆဲးကျိးတၢ်ဖံးတၢ်မၤတဖၣ်ဆူ ၀့ၢ်ရၤမတံဒီးရွ့ၣ်ကိကိၣ်တပၤန့ၣ်လီၤ.
လၢန့ၣ်အမဲၥ်ညါ ကၠီၣ်တဲၣ်ပၢၤကီၢ်ဒီးသုးတဖၣ် ပၥ်လီၤဃၣ်၀ဲတၢ်ဘံၣ်တၢ်ဘၢအါအါဂီၢ်ဂီၢ် ဖဲကီၢ်ဆၢဟီၣ်က၀ီၤဒီတကျိၤ၀ံၤ အ့ၣ်ထၣ်နဲးဒီးလီမ့ၣ်အူတၢ်ဆဲးကျိးပျံၤတၢ်ပီးတၢ်လီလၢ တၢ်ကသူန့ၢ်အီၤဖဲကၠါဖၠးတၢ်ဖံးတၢ်မၤအပူၤတဖၣ်စ့ၢ်ကီး သမံသမိး၀ဲန့ၣ်လီၤ.
Ref: Burma VJ
