လါအီကူး(၂၁)သီ,၂၀၂၄နံၣ်
ကၣ်စၣ်တၢ်ဒုးကကတၢၢ်ကွံၥ် တၢ်ပတုၥ်တၢ်ခးတၢ်အၢၣ်လီၤအဂီၢ် အမဲရကၤအတၢ်ဆှၢနုၥ်အဖီခိၣ် အံၣ်စရ့ကိတိၥ်ခိၣ်ကျၢၢ် န့ၣ်တၣ်ယၣ်ဟူး အၢၣ်လီၤတူၢ်လိၥ်၀ဲအဂ့ၢ် အမဲရကၤထံဂုၤကီၢ်ဂၤကိတိၥ် ဘလ့ၣ်ကၣ်ထုးထီၣ်တဲဖျါ၀ဲန့ၣ်လီၤ.
လၢတၢ်န့ၣ်အဃိ ကတီၢ်ခဲအံၤ လိၢ်လၢဟါမးတဖၣ် ကတူၢ်လိၥ်၀ဲလီအဂ့ၢ် ဘလ့ၣ်ကၣ်စံး၀ဲန့ၣ်လီၤ. အံၣ်စရ့တၢ်ဘံၣ်တၢ်ဘၢတၢ်လိၢ်ဘၣ်အဖီခိၣ် ပှၤလၢဟါမးဖီၣ်ဃၣ်၀ဲတဖၣ် ကထူၣ်ဖျဲးထီၣ်အဂီၢ် အမဲရကၤအတၢ်ဆှၢနုၥ်အဖီခိၣ် မံးစထၢၣ်န့ၣ်တၣ်ယၣ်ဟူး မၤ၀ဲတၢ်ထံၣ်လိၥ်တၢၣ်ပီၣ်တဲသကိးတခါ ဖဲတဲအဘ့း(တဲလ်အဗစ်)အဂ့ၢ် အံၣ်စရ့ကိတိၥ်ခိၣ်ကျၢၢ်၀ဲၤဒၢးထုးထီၣ်ပၥ်ဖျါဃၣ်၀ဲန့ၣ်လီၤ.
ဖဲအပူၤကွံၥ်န့ၣ် ဘလ့ၣ်ကၣ်ဒုးသ့ၣ်ညါဃၣ်၀ဲလၢ ကၣ်စၣ်တၢ်ဒုးကပတုၥ်ကွံၥ်အဂီၢ် တၢ်အဘျီ၀ဲအံၤမ့ၢ်လီၢ်ခံကတၢၢ်တဘျီလီအဂ့ၢ်ဒီး မ့မ့ၢ်လၢအမဲရကၤတခီ ဘၣ်ထွဲဒီးတၢ်အၢၣ်လီၤအဖီခိၣ် ပညိၣ်ဃၣ်၀ဲလၢ ကဆီၣ်တခုထီၣ်တုၤလၢအကတၢၢ်န့ၣ်လီၤ.
ခါလၢကဟဲတနွံန့ၣ် တၢ်အၢၣ်လီၤအံၤကဲထီၣ်သ့အဂ့ၢ် ဘလ့ၣ်ကၣ်စံး၀ဲဘၣ်ဆၣ် မ့မ့ၢ်လၢအံၣ်စရ့ဒီးဟါမးတခီ ဘၣ်ထွဲတၢ်ဂ့ၢ်အံၤအဖီခိၣ် ထုးထီၣ်ပၥ်ဖျါထီၣ်လီၤတံၢ်လီၤဆဲးတအိၣ်ဘၣ်.
တၢ်ကဟ့ၣ်ဆီၣ်တခူထီၣ်လၢ တၢ်အၢၣ်လီၤကကဲထီၣ်လိၥ်ထီၣ်အဂီၢ် အမဲရကၤထံဂုၤကီၢ်ဂၤကိတိၥ် ကလဲၤ၀ဲဆူအံၣ်ကၠ့းဒီးကၣ်တၣ်၀ံၤတၢ်ကလဲၤထီၣ်၀ဲအံၣ်ကၠ့း,ကၣ်တၣ်ဒီးအမဲရကၤတီခိၣ်ရိၣ်မဲကဲၣ်ရိၣ်တၢ်တၢၣ်ပီၣ်တဲသကိးအဂီၢ် ခါလၢကဟဲတနွံန့ၣ် တၢ်ကပျဲလဲၤ၀ဲခၢၣ်စးကရၢအဂ့ၢ် အံၣ်စရ့ကိတိၥ်ခိၣ်ကျၢၢ် န့ၣ်တၣ်ယၣ်ဟူး ထုးထီၣ်တဲဖျါထီၣ်၀ဲန့ၣ်လီၤ.
Ref: BBC
