လါအီကူး(၂၁)သီ,၂၀၂၄နံၣ်
ကီၫ်ကၠီၣ်တဲၣ်ပူၤ တၫ်ထံၣ်န့ၫ်တၤအုးလၢၫ်တၫ်ဆါဃာ် အကလုာ်လီၤဆီ(၈)ကလုာ်၀ံၤ မ့ၫ်ဒၣ်အပတီၫ်လၢကပုာ်လီၤအဂ့ၫ် တၫ်ဘၣ်ကူဘၣ်ဂာ်တဖၣ် ပၢဆှၢဃာ်၀ဲန့ၫ်အဂ့ၫ် ထံကီၫ်ကသံၣ်စဲအ့ၣ်၀ဲၤကျိၤ ပာ်ဂၢၫ်ပာ်ကျၢၤဃာ်၀ဲလီၤ.
ကီၫ်ကၠီၣ်တဲၣ်ပူၤ ပှၤလၢတၤအုးလၢၫ်တၫ်ဆါဘၣ်ကူဘၣ်ဂာ်အီၤ(၁၉၁)ဂၤ တၫ်သမံသမိးကွၫ်အီၤအပူၤ ပှၤလၢတၫ်ဆါဃာ် Clade 2အကလုာ် ဘၣ်ကူဘၣ်ဂာ်အီၤအိၣ်၀ဲ(၈)ဂၤညါ၀ံၤ အါတက့ၫ်ဒုမ့ၫ်၀ဲ Clade 1တဖၣ်လီၤအဂ့ၫ် ကသံၣ်စဲအ့ၣ်၀ဲၤကျိၤတဲဃာ်၀ဲလီၤ.
ကီၫ်ကၠီၣ်တဲၣ်အပူၤ Clade 2ရၤလီၤအသးအံၤ ပျိာ်လဲအသးဆူ Clade 1b အကလုာ်အသိး,ဘၣ်ကူဘၣ်ဂာ်ဆူတဂၤဒီးတဂၤ သ့ညီညီဖိဖဲစှၤနၣ်ရံၣ်အတီၫ်ပူၤအဂ့ၫ် ကသံၣ်စဲအ့ၣ် ဒၣ်ရဲးထၢၣ်ထဲ၀ဲလီၤ.
ဘၣ်ဆၣ်သနာ်က့ M Poxတၫ်ဆါဃာ်ကလုာ်လီၤဆီလၢ ဘၣ်တၫ်ထံၣ်န့ၫ်အီၤလၢကတီၫ်အံၤတဖၣ် တဆူၣ်ဒ်သိးဒီးအၣ်ဖရံးကၣ်ကီၫ်မိၫ်ပှၫ်ပူၤဘၣ်အဂ့ၫ်,တၫ်မ့ၫ်ထိၣ်သတြီၤကွၫ်ဒီး နီၫ်ခိတခါအနီၫ်ခိဂံၫ်တြီဆၢန့ၣ် ကကဲထီၣ်၀ဲတၫ်ပနီၣ် လၢအကပုာ်တကလုာ်လီၤအဂ့ၫ် ကၠီၣ်တဲၣ်ကသံၣ်စဲအ့ၣ်တဲဃာ်၀ဲလီၤ.
ကီၫ်ကၠီၣ်တဲၣ် တၫ်ပၢဆှၢတၫ်ဆါဃာ်အတၫ်ရၤလီၤအသး၀ဲၤကျိၤန့ၣ် အိၣ်ခိးကွၫ်၀ဲ ထံကီၫ်ပူၤတၤအုးလၢၫ်တၫ်ဆါ တၫ်ဘၣ်ကူဘၣ်ဂာ်တဖၣ်၀ံၤ တၫ်လီၫ်လၢတၫ်ဆါဘၣ်ကူဘၣ်ဂာ်ကဲထီၣ်သ့တၫ်လီၫ်တဖၣ် မၤတၫ်သမံသမိးအိၣ်၀ဲန့ၣ်လီၤ.
ဒ်န့ၣ်အသိး ဒီကလုာ်ဆူၣ်ချ့အ့ၣ်စတံၣ်ကၠူး(အမျိုးသားကျန်းမာရေးအင်စတီကျု)န့ၣ် ကီၫ်ရ့ၣ်ဟီၣ်က၀ီၤ(၂၄)ခါအပူၤ တၫ်အိးထီၣ်ဃၣ်တၫ်သမံသမိး M Poxတၫ်ဆါဃာ် တၫ်မၤကွၫ်ဒၢး(၆၂)ခါ၀ံၤ (၂၄)နၣ်ရံၣ်အတီၫ်ပူၤ တၫ်မၤကွၫ်ဒၢးဟ့ၣ်တၫ်အစၢန့ၫ်အဃိ တၤအုးလၢၫ်တၫ်ဆါ တၫ်ဘၣ်ကူဘၣ်ဂာ်လၢကဲထီၣ်သ့တဖၣ် တၫ်ကတြီဆၢအီၤအဂီၫ် အိၣ်ကတီၤသးလံအဂ့ၫ် ဘိးဘၣ်ရၤလီၤ၀ဲလီၤ.
Ref: Border Echo
