လါအီကူး(၁၉)သီ,၂၀၂၄နံၣ်
တၢ်ကမၤတၢ်ဆီတလဲ ကီၢ်ပံၤယီၤသုးမုၢ်ဒိၣ်အဂီၢ် တၢ်ကဟ့ၣ်တၢ်ဆီၣ်သနံးတုၤလီၤတီၤလီၤအဂ့ၢ် ဖဲလၢထံၣ်လိၥ်သးဒီး ဒီကလုၥ်တၢ်ဃူတၢ်ဖိးတၢ်ဟ့ၣ်ကူၣ်ကီၣ်ကး(NUCC), ဒီကလုၥ်ဃူဖိးပဒိၣ်(NUG)ပၥ်ဃုၥ် တၢ်ပၢၢ်ဆၢဂံၢ်ဘါကရူၢ်တဖၣ်အဆၢကတီၢ် အၢၣ်လီၤတူၢ်လိၥ်၀ဲအဂ့ၢ် အမဲရကၤထုးထီၣ်ပၥ်ဖျါဃၣ်၀ဲန့ၣ်လီၤ.
တၢ်ကဟ့ၣ်အါထီၣ်ဘၣ် ပှၤဟီၣ်ခိၣ်ဖိတၢ်ဒိသူၣ်ဒိသးတၢ်ဆီၣ်ထွဲမၤစၢၤတဖၣ်လိၤလိၤကန့ၢ်အဂီၢ် အမဲရကၤကမၤ၀ဲဒီး တကးဘၣ်တၢ်ပၢၢ်ဆၢဂံၢ်ဘါကရူၢ်တဖၣ်အတၢ်ပၢဆှၢဟီၣ်က၀ီၤတဖၣ်အပူၤ ကမျၢၢ်တၢ်ပၢဆှၢရဲၣ်ကျဲၤတၢ်ဖံးတၢ်မၤတဖၣ် ကဂ့ၤထီၣ်အဂီၢ်ကမၤစၢၤ၀ဲန့ၣ်လီၤ.
ဖဲလါအီကူး(၁၅)သီအနံၤ, တၢ်ထံၣ်လိၥ်အပူၤ အမဲရကၤထံဂုၤကီၢ်ဂၤပှၤဟ့ၣ်ကူၣ်တၢ် တွၣ်ဆူၣ်လံၣ်ဘၣ်(တွမ်ဆူလီဗန်), ကီၢ်အမဲရကၤ အထံဂုၤကီၢ်ဂၤတၢ်ဂုၢ်ထီၣ်ပသီထီၣ်တၢ်ဆီၣ်ထွဲမၤစၢၤ ကရၢ(USAID)ခိၣ်ခံ မံၣ်ရှဲရှံၣ်ဖၣ်(မီရှဲလ် ရှီဖ်ဖာ)တဖၣ် ပၥ်ဃုၥ်တဲသကိး၀ဲဒၣ်န့ၣ်လီၤ.
မ့မ့ၢ်လၢကီၢ်ပံၤယီၤတပၤတခီ NUGကီၢ်ခိၣ်ပတြီၤ ဒူၣ်၀ၣ်လရှံလး, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ် ပဒိၣ်စီၤတၢ်ဒိၣ်မူ, ထံဂုၤကီၢ်ဂၤ ဒီးပှၤကတိၤတၢ်ပၢ ပဒိၣ်စီၤတီနံ, ကရ့ၣ်နံၣ်ဒီကလုၥ်တၢ်လဲၤထီၣ်လဲၤထီပၣ်တံၣ် (KNPP), ခၠီသုးမုၢ်ဒိၣ်(CNF), ဒီကလုၥ်တၢ်ဃူတၢ်ဖိးတၢ်ဟ့ၣ်ကူၣ်ကီၣ်ကး(NUCC)ပှၤဘၣ်မူဘၣ်ဒါတဖၣ် တၢၣ်ပီၣ်တဲသကိး၀ဲန့ၣ်လီၤ.
အမဲရကၤထံဂုၤကီၢ်ဂၤပှၤဟ့ၣ်ကူၣ်တၢ်တခီ တဲလီၤ၀ဲလၢ တတူၢ်လိၥ်၀ဲ တၢ်ကရၢကရိဖဲလဲၣ်တဖုဂ့ၤ အတၢ်မၤပျီၢ်မၤဂီၤတဖၣ်၀ံၤ ကပၥ်ဖှိၣ်မၤသကိး၀ဲဒၣ်ဒီး အၣ်စံၣ်ယၣ်ပၥ်ဃုၥ် ထံဂုၤကီၢ်ဂၤတဖၣ်အဂ့ၢ်စံး၀ဲန့ၣ်လီၤ.
တၢ်တၢၣ်ပီၣ်တဲသကိးအံၤ ဖဲလၢတရူးထံဂုၤကီၢ်ဂၤကိတိၥ် မံးစထၢၣ်၀ၣ်ယံးအတၢ်ဟဲန့ၣ်ပၠံၣ်တီၣ်၀ံၤအဆၢကတီၢ် ကဲထီၣ်၀ဲအဂ့ၢ် ထံရူၢ်ကီၢ်သဲးပှၤဃိထံသ့ၣ်ညါတဖၣ် ပဲၥ်ထံနီၤဖးဃၣ်၀ဲန့ၣ်လီၤ.
