လါအီကူး(၁၉)သီ,၂၀၂၄နံၣ်
ကီၫ်ကၠီၣ်တဲၣ်ပူၤ Paetongtarn Shinawatraလၢ ကဲထီၣ်ကိတိာ်ခိၣ်ကျၢၫ်သီ, ထံကီၫ်မုာ်ကျိၤ၀ဲၤကွာ်လၢလီၤသတြုးအံၤ ကမၤဂုၤထီၣ်ပသီထီၣ်က့ၤ၀ဲအဂ့ၫ် ဟ့ၣ်တၫ်အၢၣ်လီၤန့ၣ်လီၤ.
အပူၤကွံာ် ကိတိာ်ခိၣ်ကျၢၫ်န့ၣ် ကၠီၣ်တဲၣ်ဂ့ၫ်ခီၣ်ထံးထံကီၫ်သဲစးတၫ်ဘျၢ သဲစး၀ဲၤဒၢးဆၢတဲာ်လၢအတၫ်ကမၣ်အိၣ်အဂ့ၫ်၀ံၤ တၫ်ထုးကွံာ်အီၤလၢလီၫ်လၤအသိး,Move Forwardပၣ်တံၣ်လၢ မၤနၢၤတၫ်ဃုထၢဘၣ်ဆၣ် ဒုးအိၣ်ထီၣ်ပဒိၣ်တန့ၫ်ဘၣ် ဘၣ်တၫ်မၤဟးဂီၤကွံာ်၀ံၤအလီၫ်ခံ ဒ်ကိတိာ်ခိၣ်ကျၢၫ်လၢအသးစၫ်ကတၢၫ်တဂၤအသိး Paetongtarn ဟံးန့ၫ်မူဒါ န့ၣ်လီၤ.
အပါ Thaksinဒီးအမုၫ်ဂၫ် Yingluck လၢသုးဟံးန့ၫ်တၫ်စိတၫ်ကမီၤဒီး ဘၣ်တၫ်ထုးကွံာ်အီၤလၢလီၫ်လၤ၀ံၤ အ၀ဲလၢShinawatraဟံၣ်ဖိဃီဖိအကျါ ကဲထီၣ်ကိတိာ်ခိၣ်ကျၢၫ်(၃)ဂၤတဂၤန့ၣ်လီၤ.ကဒုးအိၣ်ထီၣ် ပဒိၣ်သီအဂီၫ် ကၠီၣ်တဲၣ်စီၤပၤ အတၫ်ဟ့ၣ်တၫ်ပျဲကလုၫ်န့ၣ် Paetongtarn တူၫ်လိာ်ဟံးန့ၫ်၀ဲဃုာ်ဒီးမူးတၫ်ရဲၣ်တၫ်ကျဲၤ ဖဲတၫ်ဂီၤမူတၫ်ရဲၣ် တၫ်ကျဲၤ၀ဲၤလီၫ်ခိၣ်သ့ၣ်၀ဲၤဒၢး လၢတဘျီခါတူၫ်လိာ်ဆီၣ်ထွဲ ကိတိာ်ခိၣ်ကျၢၫ်လီၫ်လံၤ Thaksinန့ၣ်လီၤ.
ဘၣ်ကွၣ်ဆၢၣ်မဲာ်ဒီး ခိၣ်ဘံးတၫ်ဆါ၀ံၤအလီၫ်ခံ မုာ်ကျိၤ၀ဲၤကွာ်ဘၣ်ဒိဘၣ်ထံး တၫ်မၤဂုၤထီၣ်ပသီထီၣ်က့ၤအပူၤ ကၠီၣ်တဲၣ်ထံဖိကီၫ်ဖိခဲလၢာ် ကပာ်ဖှိၣ်မၤသကိးဃုာ်တၫ်အဂီၫ် ဆီၣ်တခူဃာ်၀ဲလီၤ.အပါ Thaksinလၢသးနံၣ်အိၣ် (၇၅)နံၣ်စ့ၫ်ကီး ဟဲထီၣ်မူးတၫ်ရဲၣ်တၫ်ကျဲၤဃုာ်ဒီး ကိတိာ်ခိၣ်ကျၢၫ်အ၀ၤ လၢတၫ်မဲာ်ညါကတၢၫ်န့ၣ်လီၤ.
