လါအီကူး(၁၆)သီ,၂၀၂၄နံၣ်
ကညီကီၫ်စဲၣ်,၀့ၫ်ရၤမတံပူၤ စဲးသိကျးပာ်ဃုာ်ကျးတနီၤ တတူာ်လိာ်ဟံးန့ၫ်စ့ပယီၤကၠးဘၣ်ဒီး သူ၀ဲကၠီၣ်တဲၣ်ဘးအဃိ လီၫ်က၀ီၤဖိတဖၣ်ကွၫ်ဆၢၣ်မဲာ်ဘၣ် တၫ်ကီတၫ်ခဲအဂ့ၫ် တၫ်သ့ၣ်ညါဘၣ်လီၤ.
အပူၤကွံာ် တၫ်ဂံၫ်ဒွး၀ဲလၢကၠီၣ်တဲၣ်ဘၣ်၀ံၤ တၫ်ဟ့ၣ်လၢပယီၤစ့ကၠးန့ၫ်ဘၣ်ဆၣ် လၢကတီၫ်အံၤ တၫ်ဘၣ်ဟ့ၣ်လၢကၠီၣ်တဲၣ်ဘးအဃိ တတူၫ်လိာ်၀ဲပယီၤကၠးလၢၤဘၣ်.
“စးထီၣ်ကဲထီၣ်သးဖဲစှၤသီအတီၫ်ပူၤလီၤ.တရူးကျးတကးလၢၤဘၣ်အမဲာ်ညါ ပယီၤကျးတဖၣ်စ့ၫ်ကီးကဲထီၣ်၀ဲလီၤ. လၢစဲးသိကျးန့ၣ် တၫ်ပှ့ၤသိမ့ၫ်အိၣ်တုၤလၢ (၅)ကလးကၠးဘျဲၣ်န့ၣ် တၫ်ဘၣ်ဟ့ၣ်လၢကၠီၣ်တဲၣ်ဘးအဂ့ၫ်တဲ၀ဲလီၤ. ၀့ၫ်ရၤမတံပူၤအပူၤကွံာ်အါတက့ၫ်န့ၣ် တၫ်ဆါ၀ဲဒၣ်လၢပယီၤကၠးန့ၣ်လီၤ.အခဲအံၤတတူၫ်လိာ်ပယီၤကၠး ဒီးတူၫ်လိာ်၀ဲထဲ ကၠီၣ်တဲၣ်ဘးန့ၣ် ကဲထီၣ်တၫ်ကီတၫ်ခဲအဂ့ၫ် “ပှၤ၀့ၫ်ရၤမတံဖိတဂၤတဲ၀ဲလီၤ.
ကတီၫ်အံၤ ကၠီၣ်တဲၣ်စ့ဘးအလုၫ်အပှ့ၤန့ၣ်(၁)ဘးအိၣ်၀ဲ ,ကီၫ်ပယီၤစ့(၁၆၆)ကၠးဃၣ်ဃၣ်၀ံၤ ကီၫ်ပယီၤ(၁)ကလီၫ်န့ၣ် အိၣ်ဒၣ်ထဲ ကၠီၣ်တဲၣ်စ့ဘး(၆၀၀)ဃၣ်ဃၣ်လီၤတကးဘၣ် တၫ်ဘၣ်ပှ့ၤ စ့ဘးအလုၫ်အပှ့ၤဒီးတၫ်ဘၣ်က့ၤဆါလီၤ ကဒါက့ၤအလုၫ်အပှ့ၤ လီၤဆီလိာ်သး၀ံၤ တၫ်ပှ့ၤဘၣ်ကီခဲ၀ဲလီၤ.
စ့ကၠးအလုၫ်အပှ့ၤလီၤဒ်သိးအံၤအဃိ ဖဲကမျၢၫ်တဖၣ်ဘၣ်ကီဘၣ်ခဲအကတီၫ် ပနံာ်တၫ်ဖိတၫ်လံၤတၫ်ဆါတၫ်ပှ့ၤအဂီၫ် တတူၫ်လိာ်ပယီၤစ့ဘၣ်ဒီး တူၫ်လိာ်ထဲထံဂုၤကီၫ်ဂၤစ့တဖၣ်န့ၣ် တကြၢးကဲထီၣ်ဘၣ်အမဲာ်ညါ တၫ်ဘျၢတကပၤစ့ၫ်ကီးတဖိးမံဒီးသဲစးဘၣ်အဃိ ပှၤလၢမူဒါအိၣ်တဖၣ် ကဟံးန့ၫ်ဂ့ၫ်၀ီတုၤလီၤတီၤလီၤအဂီၫ် လီၫ်က၀ီၤဖိတဖၣ်တဲ၀ဲလီၤ.
ပှၤတီၣ်ဆှၢစဲးသိဆူ ၀့ၫ်ရၤမတံန့ၣ် မ့ၫ်ဒၣ်ကၠီၣ်တဲၣ်ဒီး လၢတဖိးသဲစးအပူၤ တီၣ်သွီနုာ်၀ဲအိၣ်န့ၣ်လီၤ. ပနံာ်လၢအဂၤတဖၣ်စ့ၫ်ကီး အိၣ်ဟဲလၢကၠီၣ်တဲၣ်လီၤအဃိ ဘၣ်ပာ်ဂံၫ်ပာ်ဘါကၠီၣ်တဲၣ်လီၤ.
ကတီၫ်ခဲအံၤ ကၠီၣ်တဲၣ်စ့ဘးအပှ့ၤဒိၣ်ထီၣ်ဒီး ကီၫ်ပယီၤစ့ကၠးအလုၫ်အပှ့ၤလီၤအဃိ ပှၤမၤတၫ်ဖိတဖၣ် ထံၣ်ဘၣ်တၫ်ကီတၫ်ခဲလီၤ.
