လါအီကူး(၁၄)သီ,၂၀၂၄နံၣ်
သုးကီၣ်ကးမၤ၀ဲ ကလံၤကျါတၢ်ဒုးအဃိ လါယူၤလံအတီၢ်ပူၤ ကီၢ်ပယီၤဒီတဘ့ၣ်လီၢ်က၀ီၤကမျၢၢ် ဘူးထီၣ်(၁၀၀)ဃၣ်ဃၣ်သံတ့ၢ်၀ဲအဂ့ၢ် တၢ်ဒီၣ်တဲၥ်ကွံၥ်ကျိၥ်စ့လၢဂၥ်သွံၣ်ဂၥ်စီၤကရၢ BMC အတၢ်ဘိးဘၣ်ရၤလီၤအဖီခိၣ် တၢ်သ့ၣ်ညါဘၣ်န့ၣ်လီၤ.
ပှၤလၢသံတ့ၢ်အကျါ ပှၤဖိသၣ်(၁၀)ဂၤဘျဲၣ်စ့ၢ်ကီး ပၥ်ဃုၥ်၀ဲအဂ့ၢ် တၢ်ဒီၣ်တဲၥ်ကွံၥ်ကျိၥ်စ့လၢဂၥ်သွံၣ်ဂၥ်စီၤကရၢ စံး၀ဲန့ၣ်လီၤ.
ကီၢ်ပယီၤဒီတဘ့ၣ်အပူၤ သုးကီၣ်ကးမၤတ့ၢ်၀ဲ ကလံၤကျါတၢ်ဒုးခဲလၢၥ်(၂၂၄)ဘျီ၀ံၤ မ့မ့ၢ်လၢ မါတလ့ကီၢ်ခီ,ယိၤဒိၣ်ကီၢ်စဲၣ်(ကလံၤစိး), ရၢၢ်ခၢၣ်ကီၢ်စဲၣ်အပူၤတခီ အအါကတၢၢ်လီၤအဂ့ၢ် စံး၀ဲန့ၣ်လီၤ.
လါယူၤလံ(၁)လါအတီၢ်ပူၤ သုးကီၣ်ကးမၤ၀ဲကလံၤကျါတၢ်ဒုးတဖၣ် ဖဲမါတလ့ကီၢ်ခီအပူၤ(၁၁၀)ဘျီ, ယိၤဒိၣ်ကီၢ်စဲၣ်ကလံၤစိးတပၤ(၆၅)ဘျီ,ရၢၢ်ခၢၣ်ကီၢ်စဲၣ်ပူၤ(၂၅)ဘျီဒီးစကဲကီၢ်ခီ,မကွ့,ကခၠ့ၣ်,ခၠီ,ဒူးပကိး(ကိး)ပကိ,တလၢၤကီၢ်စဲၣ်ဒီးတနီသရံးကီၢ်ခီတဖၣ်အပူၤစ့ၢ်ကီး မၤ၀ဲအဂ့ၢ်စံး၀ဲန့ၣ်လီၤ.
ကလံၤကျါတၢ်ဒုးအဃိ လီၢ်က၀ီၤကမျၢၢ်(၁၂၈)ဂၤဘၣ်ဒိ၀ဲ၀ံၤ တၢ်သူၣ်ထီၣ်(၁၅)ဖျၢၣ်, တၢ်သိၣ်လိကၠိ(၉)ဖျၢၣ်စ့ၢ်ကီး ဟးဂီၤကွံၥ်၀ဲအဂ့ၢ် BMCကရၢ ပၥ်ဖျါဃၣ်၀ဲဖဲ အလံၥ်ဘိးဘၣ်ရၤလီၤအပူၤန့ၣ်လီၤ.
ယိၤဒိၣ်ကီၢ်စဲၣ်ကလံၤစိးတပၤ ကမျၢၢ်(၃၆)ဂၤ, မါတလ့တပၤ(၂၉)ဂၤ, စကဲဒီးတလၢၤကီၢ်စဲၣ်အပူၤတပၤ ကမျၢၢ်သံ၀ဲ(၉)ဂၤန့ၣ်လီၤ.
တလါအံၤ လၢအီကူးအတီၢ်ပူၤစ့ၢ်ကီး တၢ်ဒုးဆူၣ်လၢရၢၢ်ခၢၣ်, ယိၤဒိၣ်ကလံၤစိး,မါတလ့ကီၢ်ခီတဖၣ်အပူၤ သုးကီၣ်ကးလဲၤတ့ၢ်လီၤမ့ၣ်ပိၢ်တပယူၥ်ဃီ၀ံၤ လီးကဲၣ်,သ့ၣ်နံၣ်,ကိးခဲၣ်,နးဆၣ်,မၠီးအူ၀့ၢ်တဖၣ်အပူၤစ့ၢ်ကီး သုးကီၣ်ကးလဲၤပညိၣ်ဒုး၀ဲလၢကလံၤကျါအဂ့ၢ် သိၣ်မှံကရၢ(၃)ဖု ထုးထီၣ်ပၥ်ဖျါဃၣ်၀ဲန့ၣ်လီၤ.
တၢ်ပၢၢ်ဆၢသုးပၥ်ဖှိၣ် ပၢဆှၢဃၣ်၀ဲ၀့ၢ်,သ၀ီတဖၣ်အပူၤ တၢ်ဒုးတအိၣ်ဘၣ်ဒီး သုးကီၣ်ကးလဲၤတ့ၢ်လီၤမ့ၣ်ပိၢ်တဖၣ်အဃိ သိၣ်မှံကရၢ(၃)ဖုဃ့ထီၣ်ဃၣ်၀ဲဆူ တရူးဒီးထံဂုၤကီၢ်ဂၤအအိၣ်န့ၣ်လီၤ.
