လါအီကူး(၁၄)သီ, ၂၀၂၄နံၣ်
ဖဲလါအီကူး(၁၂)သီအနံၤ, ဟါလီၤခီအဆၢကတီၢ် ကမျၢၢ်တၢ်ဒီသဒၢသုးပၥ်ဖှိၣ်တဖၣ် ထီၣ်ဒုးမၤန့ၢ်၀ဲ ၀့ၢ်ဃဲ၀ါ(ကိး)၀့ၢ်တကီလၢအိၣ်ဖဲ မါတလ့ကီၢ်ခီဒီးစကဲကီၢ်ခီအဘၢၣ်စၢၤအဂ့ၢ် စံး၀ဲန့ၣ်လီၤ.
၀့ၢ်ဃဲ၀ါ(ကိး)၀့ၢ်တကီကမျၢၢ်တၢ်ဒီသဒၢသုးပှၤဘၣ်မူဘၣ်ဒါတဂၤ စံး၀ဲလၢ” ဟီၣ်ခိၣ်မဲၥ်ဖံးခိၣ်န့ၣ် အ၀ဲသ့ၣ်အဂံၢ်အဘါကအိၣ်ဒၣ်(၁၀၀)ဃၣ်ဃၣ်လီၤ. ဘၣ်ဆၣ်ဒီးသုးကီၣ်ကးခီၣ်ဆၢန့ၢ်လၢကလံၤကျါဆူၣ်ဆူၣ်ကလၢၤအပူၤန့ၣ် ပထီၣ်ဒုးန့ၢ်၀ဲ ၀့ၢ်ဃဲ၀ါ(ကိး)၀့ၢ်တကီအဂ့ၢ်” န့ၣ်လီၤ.
ဖဲလၢလါအီကူး(၁၁)သီအနံၤ,ဂီၤအဆၢကတီၢ် ဒီကလုၥ်ဃူဖိးပဒိၣ်(NUG)အတၢ်ဒီသဒၢ၀ဲၤကျိၤ, သုးဟီၣ်က၀ီၤနီၣ်ဂံၢ်(၁)အစုတီၤဖီလၥ် ကမျၢၢ်တၢ်ဒီသဒၢသုးပၥ်ဖှိၣ်တဖၣ်စးထီၣ် ထီၣ်ဒုး၀ဲသုးကီၣ်ကးအသုးကလၢၤတဖၣ်လၢအိၣ်ဖဲ ၀့ၢ်ဃဲ၀ါ(ကိး)၀့ၢ်တကီအပူၤ၀ံၤ ထီၣ်ဒုးမၤန့ၢ်၀ဲဖဲ လါအီကူး(၁၂)သီအနံၤ, ဟါလီၤခီအဆၢကတီၢ်န့ၣ်လီၤ.
ကမျၢၢ်တၢ်ဒီသဒၢသုး ဒုးယၤရဲၣ်ကျဲၤပှၤဘၣ်မူဘၣ်ဒါတဂၤ စံး၀ဲလၢ”သုးကီၣ်ကးဟဲခးလီၤတၢ်လၢကလံၤကျါအဃိ ကမျၢၢ်ဟံၣ်ဃီတၢ်သူၣ်ထီၣ်တနီၤဟးဂီၤကွံၥ်၀ဲအသိး ပ၀ဲတခီပၤစ့ၢ်ကီး တၢ်ဘၣ်ဒိဘၣ်ထံးအိၣ်၀ဲအဂ့ၢ်” န့ၣ်လီၤ.
တၢ်ထီၣ်ဒုးမၤန့ၢ်၀့ၢ်ဃဲ၀ါ(ကိး)၀့ၢ်တကီတၢ်ဒုးအပူၤ တၢ်ဖီၣ်န့ၢ်သုးကီၣ်ကးအပှၤသုးဖိတဖၣ်အသိး တၢ်မၤန့ၢ်စ့ၢ်ကီးကျိချံပှၥ်သၣ်အါအါဂီၢ်ဂီၢ်၀ံၤ မ့မ့ၢ်လၢတၢ်ဂ့ၢ်တၢ်ကျိၤလီၤတံၢ်လီၤဆဲးတခီ ကဘိးဘၣ်ရၤလီၤန့ၢ်၀ဲအဂ့ၢ် အ၀ဲစံးအါထီၣ်၀ဲန့ၣ်လီၤ.
လါအီကူး(၁၁)သီအနံၤ, တၢ်စးထီၣ်ဒုး ၀့ၢ်ဃဲ၀ါ(ကိး)၀့ၢ်တကီပၢၤကီၢ်သုးကလၢၤအပူၤ ပၢၤကီၢ်လီၢ်လၤအိၣ်(၂)ဂၤပၥ်ဃုၥ် ပၢၤကီၢ်သုး(၁၆)သံ၀ဲ၀ံၤ ပၢၤကီၢ်အပှၤသုးဖိအါအါဂီၢ်ဂီၢ် ဘၣ်ဒိဘၣ်ထံး၀ဲအဂ့ၢ် ကမျၢၣ်တၢ်ဒီသဒၢသုးပၥ်ဖှိၣ်တဖၣ်တဲ၀ဲန့ၣ်လီၤ.
ပျ့ၣ်လိၥ်ကျိကၢၢ်နံၤအိၣ် ၀့ၢ်ဃဲ၀ါ(ကိး)၀့ၢ်တကီအံၤ အိၣ်၀ဲဒၣ်ဖဲ မါတလ့ကီၢ်ခီ, သဘ့းကၠ့း၀့ၢ်ဒီး စကဲကီၢ်ခီ, ထံခၠဲ၀့ၢ်အဘၢၣ်စၢၤ၀ံၤ ၀့ၢ်အပူၤပှၤနီၣ်ဂံၢ်အိၣ်၀ဲ(၈,၀၀၀)ဘျဲၣ်ဒီး လၢခိသ၀ီပူၤတခီပှၤနီၣ်ဂံၢ်အိၣ်၀ဲ(၂၇,၀၀၀)ဘျဲၣ်အဂ့ၢ် တၢ်သ့ၣ်ညါဘၣ်လၢ ၂၀၁၄နံၣ် ဖးဖီမုၢ်စရီအဖီခိၣ်န့ၣ်လီၤ.
Ref: DVB
