လါအီကၢး(၉)သီ,၂၀၂၄နံၣ်
လၢ၀့ၢ်တကူၣ်ကဘီယူၤသန့အပူၤ ပှၤလၢဖီၣ် PJ(တၢ်မၤ) ဒီးPV (တၢ်ဟးလိၥ်ကွဲ)အကလုၥ်ခီကီၢ်လံၥ်အုၣ်သး ပးစပိးတဖၣ် တၢ်သမံးသမိးအီၤဃံးဃံးစ့ၢ်စ့ၢ်၀ံၤ လံၥ်လဲၢ်လံၥ်အုၣ်သးတလၢတပှဲၤတဖၣ် တၢ်တပျဲလဲၤဆူကီၢ်ချၢလၢၤဘၣ်ဒီး တၢ်ပျဲက့ၤအီၤတဖၣ်အိၣ်၀ဲန့ၣ်လီၤ.
စးထီၣ်လၢလါအီကၢး(၁)သီအနံၤန့ၣ် လၢ၀့ၢ်တကူၣ်ကဘီယူၤသန့အပူၤ ပှၤသးစၢ်လၢကဟးထီၣ်ဆူကီၢ်ချၢတဖၣ် သုးကီၣ်ကးအစုတီၤဖီလၥ် ပှၤကညီတၢ်နုၥ်လီၤဟးထီၣ်၀ဲၤကျိၤပှၤဘၣ်မူဘၣ်ဒါတဖၣ် သံကွၢ်သမံသမိး၀ဲဃံးဃံးစ့ၢ်စ့ၢ်၀ံၤ ပှၤလၢလံၥ်လဲၢ်တလၢတပှဲၤတဖၣ် တၢ်တပျဲလဲၤဆူကီၢ်ချၢလၢၤဘၣ်ဒီး တၢ်ပျဲက့ၤအီၤတဖၣ်အိၣ်၀ဲအဂ့ၢ် ပှၤလၢကွၢ်ဆၢၣ်မဲၥ်ဘၣ်တဖၣ်တဲ၀ဲန့ၣ်လီၤ.
လီၤဆီဒၣ်တၢ် ပှၤလၢဖီၣ်ဃၣ်၀ဲ တၢ်ဟးလိၥ်ကွဲပးစပိး(PV လံၥ်ခီကီၢ်)တဖၣ် မ့ၢ်အလဲၤဟးလိၥ်ကွဲမ့ၢ်တမ့ၢ် သံကွၢ်၀ဲ၀ံၤ ပှၤလၢဖီၣ်ဃၣ်၀ဲ(PV လံၥ်ခီကီၢ်)တဖၣ် လဲၤဖံးလဲၤမၤတၢ်သုတကဲထီၣ်တဂ့ၤအဂီၢ် သံကွၢ်သမံးသမိး၀ဲ ဃံးဃံးစ့ၢ်စ့ၢ်လီၤအဂ့ၢ် စံး၀ဲန့ၣ်လီၤ.
လၢ၀့ၢ်တကူၣ်ကဘီယူၤသန့ ပှၤလၢတၢ်တပျဲလဲၤအီၤဆူကီၢ်ချၢဒီးတၢ်ပျဲက့ၤအီၤတဖၣ်အကျါ ပှၤလၢဖီၣ်ဃၣ်၀ဲ(PJ တၢ်မၤ)ပးစပိးတဖၣ်စ့ၢ်ကီးပၥ်ဃုၥ်၀ဲန့ၣ်လီၤ.
မ့မ့ၢ်ပှၤတနီၤလၢ ဟဲက့ၤတစိၤတလီၢ်လၢကီၢ်ချၢလၢတၢ်ပျဲဒီး လီၢ်ခံတဘျီအမ့ၢ်က့ၤဟးထီၣ်ဆူကီၢ်ချၢအဆၢကတီၢ် တၢ်ဟ့ၣ်ထီၣ်အခိတအိၣ်တဖၣ်, ဆှၢလီၤကျိၥ်စ့ဆူကီၢ်ပူၤ(၂၅)မျးကယၤတအိၣ်တဖၣ် ဒီး တၢ်ပၥ်ဖျါထီၣ်OWICခးတန့ၢ်တဖၣ် တၢ်တပျဲလၢၤအီၤဆူကီၢ်ချၢလၢၤဘၣ်န့ၣ်လီၤ.
လၢကဘီယူၤသန့တၢ်ပျဲက့ၤအီၤဒ်အံၤအဃိဘၣ်ကွၢ်ဆၢၣ်မဲၥ်ဘၣ်ဒီးကဘီယူၤလံၥ်ပျဲက့ဒီးကျိၥ်စ့တၢ်တဒိးန့ၢ်က့ၤလၢၤအဂ့ၢ် ပှၤလၢတၢ်ဘၣ်ပျဲက့ၤတဖၣ်တဲ၀ဲန့ၣ်လီၤ. ပှၤလၢတၢ်ဘၣ်ပျဲက့ၤအီၤအါတက့ၢ်န့ၣ် ပှၤလၢကလဲၤဆူ ကၠီၣ်တဲၣ်,ယပၣ်,စ့ၣ်ကပူၣ်ဒီး မုၢ်ထီၣ်ခၢၣ်သးဟီၣ်က၀ီၤ ယူၣ်အ့ၣ်အံထံကီၢ်တဖၣ်အဂ့ၢ် တၢ်သ့ၣ်ညါဘၣ်န့ၣ်လီၤ.
သုးကီၣ်ကးအံၤ ဖဲလၢလါယူၤအတီၢ်ပူၤစ့ၢ်ကီး တၢ်ကးတံၥ်ဃၣ်၀ဲ ပှၤလၢဖီၣ်ဃၣ်(PJ)လံၥ်ခီကီၢ်တဖၣ် သးသမူအယူၥ်တလၢၥ်ဒံးဘၣ်ဒီး ကဆီတလဲဆူ (PV)လံၥ်ခီကီၢ်န့ၣ်လီၤ. တကးဘၣ် ပှၤပိၥ်ခွါလၢ ကလဲၤဖံးမၤတၢ်လၢကီၢ်ချၢတဖၣ်စ့ၢ်ကီး တၢ်ပၥ်ပနီၣ်ဃၣ် အသးအနံၣ်န့ၣ်လီၤ.
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ ပှၤလဲၤဖံးမၤတၢ်လၢကီၢ်ချၢဟဲအိၣ်ထီၣ်အါထီၣ်၀ံၤ တၢ်ပၥ်ဖျါထီၣ်တၢ်ဘၣ်ကဲသုးတၢ်ဘျၢ၀ံၤအလီၢ်ခံ ပှၤသးစၢ်တဖၣ် ဟးထီၣ်ဆူကီၢ်ချၢလၢအကျိၤအကျဲဒၣ်၀ဲအါမးန့ၣ်လီၤ.
မမ့ၢ်လၢသုးကီၣ်ကးတခီ ကိးဃၣ်၀ဲ သုးတၢ်မၤလိနီၣ်ဂံၢ်(၁)တုၤ(၄)၀ံၤ တၢ်ကဘၣ်ကဲသုးအဂီၢ် ပှၤလၢသးနံၣ်ပၥ်ဃုၥ်တဖၣ် သူတဟးထီၣ်ဆူကီၢ်ချၢအဂီၢ် ကးတံၥ်ဃၣ်၀ဲလၢအကျိၤအကျဲအကလုၥ်ကလုၥ်န့ၣ်လီၤ.
Ref: DVB
