လါအီကၢး(၈),၂၀၂၄နံၣ်
အပူၤကွံာ်နံၣ်လါမ့ၤတၫ်ဃုထၢအပူၤ Move Forward ပၣ်တံၣ်လၢမၤနၢၤတၫ်ဃုထၢ တၫ်ကမၤဟးဂီၤကွံာ်အဂီၫ် ကၠီၣ်တဲၣ်အဂ့ၫ်ခီၣ်ထံးထံကီၫ်တၫ်ဘျၢစဲစး၀ဲၤဒၢးန့ၣ် ဖဲလါအီကၢး(၇)သီဟါ(၃း၃၀)န့ၣ် စံၣ်ညီၣ်ဆၢတဲာ်လီၤ၀ဲလီၤ.
ပၣ်တံၣ်ခိၣ်နၫ်တဖၣ်လၢအမ့ၫ် ပံးတၣ်ပာ်ဃုာ်ပှၤတီခိၣ်ရိၣ်မဲပၣ်တံၣ်တဖၣ်စ့ၫ်ကီး တၫ်တြီဃာ်၀ဲအနံၣ်(၁၀)လၢကမၤ ကဒီးထံရူၫ်ကီၫ်သဲးအဂီၫ်န့ၣ်လီၤ.
Move Forwardပၣ်တံၣ်လၢမၤနၢၤတၫ်ဃုထၢ တၫ်ကမၤဟးဂီၤကွံာ်အဂီၫ်ဒီးပၣ်တံၣ်ခိၣ်နၫ်တဖၣ် တၫ်ကပတုာ်ကွံာ်အီၤ လၢထံရူၫ်ကီၫ်သဲးတၫ်ကဆၢတဲာ်အဂီၫ် တၫ်ဃုထၢခီၣ်မံးရှၢၣ်န့ၣ် အပူၤကွံာ်လါမး(၂၉)သီနံၤန့ၣ် တီၣ်ထီၣ်ဃာ်၀ဲဆူဂ့ၫ်ခီၣ်ထံးထံကီၫ်တၫ်ဘျၢသဲစး၀ဲၤဒၢးန့ၣ်လီၤ.
စီၤပၤတၫ်ဘျၢလၢအမ့ၫ် အဆၢဒိၣ်(၁၁၂)လၢ Move Forwardပၣ်တံၣ် ကဘှီဘၣ်၀ဲအဂီၫ်ပၣ်တံၣ်အတၫ်ဖးတၫ်အၢၣ်လီၤဒီး ပၣ်တံၣ်တၫ်ဘျၢတဖၣ်န့ၣ် မၤကမၣ်တၫ်ဘျၢအိၣ်တအိၣ် ဂ့ၫ်ခီၫ်ထံးထံကီၫ်တၫ်ဘျၢသဲစး၀ဲၤဒၢးဆၢတဲာ်၀ဲ၀ံၤ တၫ်ကမၤဟးဂီၤကွံာ် ပၣ်တံၣ်အဂီၫ်တီၣ်ထီၣ်ဃာ်၀ဲလီၤ.
တၫ်ဘျၢအဆၢဒိၣ်(၁၁၂)အဖီခိၣ် စီၤပၤ,နီၫ်ပၤမုၣ်ဒီးပှၤလၢကထီၣ်စီၤလိၣ်စီၤပၤအလီၫ်(မ့တမ့ၫ်) စီၤလိၣ်စီၤပၤအဘူးအတံၫ်တဖၣ် တၫ်မ့ၫ်မၤလီၤသုးသ့ၣ်လၤကပီၤ,မၤတရီတပါ,မၤပျံၤမၤဖုးအီၤန့ၣ် တၫ်ဒုးလီၤဃိၣ်(၃)နံၣ်တုၤလၢ(၁၅)နံၣ်သ့၀ဲလီၤ.
တၫ်ဘျၢအဆၢဒိၣ်(၁၁၂)တၫ်ကဘှီဘၣ်အဂီၫ် Move Forwardပၣ်တံၣ်လၢဟံၣ်ဃာ်တၫ်ဃုထၢတၫ်အၢၣ်လီၤ တၫ်ကမၤ ဟးဂီၤကွံာ်အဂီၫ် တၫ်တီၣ်ဖျါထီၣ်န့ၣ် ဂ့ၫ်ခီၣ်ထံးထံကီၫ်တၫ်ဘျၢသဲစး၀ဲၤဒၢးတကပၤ ဖဲလါအ့ဖြ့ၣ်န့ၣ် တူၫ်လိာ်၀ဲ၀ံၤ တၫ် ဆၢကတီၫ်ယံာ်(၄)လါဘျဲၣ်အကတီၫ် ဖဲလါအီကၢး(၇)သီနံၤန့ၣ် တၫ်မၤဟးဂီၤကွံာ် Move Forwardပၣ်တံၣ်လီၤ.
Move Forwardပၣ်တံၣ်န့ၣ် အပူၤကွံာ်နံၣ် လါမ့ၤတၫ်ဃုထၢအပူၤ ထံဖိကီၫ်ဖိကမျၢၫ်(၁၄)ကကွဲၫ် ဟ့ၣ်အီၤတၫ်ဖးဒီး မၤနၢၤတၫ်ဘၣ်ဆၣ်ကဒုးအိၣ်ထီၣ်ပဒိၣ်အဂီၫ် ဘျီၣ်ဒိၣ်ခၢၣ်စးတၫ်လီၫ်အနီၫ်ဂံၫ်နီၫ်ဒွးတမၤန့ၫ်၀ဲ လၢလၢပှဲၤပှဲၤဘၣ်အဃိ ကျဲးစၢး၀ဲလၢကဒုးအိၣ်ထီၣ် ပဒိၣ်ပာ်ဖှိၣ်တဖုန့ၣ်လီၤ.
လၢပဒိၣ်ပာ်ဖှိၣ်အပူၤစ့ၫ်ကီး ပၣ်တံၣ်ခိၣ်ပံးတၣ်န့ၣ် ကျဲစၢး၀ဲလၢကကဲထီၣ်ဘၣ် ကၠီၣ်တဲၣ်ကိတိာ်ခိၣ်ကျၢၫ်ဘၣ်ဆၣ် တမၤန့ၫ်ဘျီၣ်ဒိၣ်ထးခၢၣ်စးတဖၣ်အတၫ်ဖးလၢလၢပှဲၤပှဲၤဘၣ်အဃိ တန့ၫ်ခွဲးယာ်လၢကကဲထီၣ်ဘၣ်ကိတိာ်ခိၣ်ကျၢၫ်ဘၣ်.
အလီၫ်ခံပၣ်တံၣ်ခိၣ်ပံးတၣ်န့ၣ် မံၣ်ဒံၣ်ယၣ်ခီပနံၣ်တခါလၢအမ့ၫ် iTVခီပနံၣ် အShareတဖၣ် န့ၫ်ပၢ၀ဲအဃိ တၫ်ထုးထီၣ်ကွံာ်အီၤလၢဘျီၣ်ဒိၣ်ခၢၣ်စးအလီၫ်အဂီၫ် ထံကီၫ်တၫ်ဘျၢသဲစး၀ဲၤဒၢးဆၢတဲာ်လီၤ၀ဲလီၤ.တၫ်န့ၣ်အဃိပံးတၣ်န့ၣ် ဘၣ်ပျၫ်ကွံာ်၀ဲဘျီၣ်ဒိၣ်ခၢၣ်စးအလီၫ်မ့ၫ်ဂ့ၤ ပၣ်တံၣ်ခိၣ်အလီၫ်မ့ၫ်ဂ့ၤန့ၣ်လီၤ.
လၢခံပံးတၣ်န့ၣ် ဘၣ်ထွဲအတၫ်န့ၫ်ပၢ iTVခီပနံၣ်အShareတဖၣ်န့ၣ် မၤကမၣ်တၫ်ဃုထၢတၫ်ဘျၢဒီး ထံကီၫ်သဲစးတၫ်ဘျၢတအိၣ်ဘၣ်အဃိ တၫ်ကမၣ်တအိၣ်ဘၣ်အဂ့ၫ် ထံကီၫ်တၫ်ဘျၢသဲစး၀ဲၤဒၢး ဆၢတဲာ်စံၣ်ညီကဒါက့ၤ၀ဲလီၤ.
တချူးMove Forwardပၣ်တံၣ်, ပၣ်တံၣ်လၢဟူးဂဲၤတ့ၫ်လၢအမ့ၫ် Future Forward partyအပူၤကွံာ် ၂၀၂၀နံၣ်အပူၤ ဘၣ်တၫ်မၤဟးဂီၤကွံာ်၀ံၤ ပၣ်တံၣ်ခိၣ် Thanathorn Juangroongruangkitစ့ၫ်ကီး တၫ်တြီဃာ်အီၤအနံၣ်(၁၀) လၢကမၤထံရူၫ်ကီၫ်သဲးအဂီၫ်န့ၣ်လီၤ.
တၫ်မၤဟးဂီၤပၣ်တံၣ်၀ံၤအလီၫ်ခံ ပံးတၣ်တီခိၣ်ရိၣ်မဲ၀ဲဘျီၣ်ဒိၣ်ခၢၣ်စးလၢအိၣ်တ့ၫ်တဖၣ်ဒီး ကရၢကရိဒုးအိၣ်ထီၣ် ကဒါက့ၤ Move Forwardန့ၫ်၀ံၤ မၤနၢၤတၫ်ဃုထၢဘၣ်ဆၣ် ဖဲလါအီကၢး(၇)သီန့ၤန့ၣ် ဘၣ်တၫ်မၤဟးဂီၤကွံာ်၀ဲလီၤ.
အပူၤကွံာ်(၂၀၀၇)နံၣ်, Thai Rak Thai ပၣ်တံၣ်လၢထဲးစ့ၣ် တီခိၣ်ရိၣ်မဲ၀ဲစ့ၫ်ကီး ထံကီၫ်တၫ်ဘျၢသဲစး၀ဲၤဒၢး မၤဟးဂီၤကွံာ်တ့ၫ်ဒံး၀ဲလီၤ.
Ref: Khaosod English, The Nation Thailand
