လါအီကၢး(၆)သီ,၂၀၂၄နံၣ်
ထံကီၫ်ဒီတဘ့ၣ် တၫ်ပာ်ဖျါထီၣ်တၫ်ပာ်သးဆူၣ်ထီၣ်၀ံၤအလီၫ်ခံ ကီၫ်ဘ့ကလါဒ့းရှ်ကိတိာ်ခိၣ်ကျၢၫ် ရှ့းဟၣ်စံၣ်နၣ် ဟးထီၣ်ကွံာ်လၢမူဒါလီၫ်လၤ၀ံၤ ဃ့ၫ်ဖျိးကွံာ်လၢကီၫ်အဂၤလံန့ၣ်လီၤ.
ဖဲလါအီကူး(၄)သီနံၤ ပှၤပာ်ဖျါထီၣ်တၫ်ပာ်သးဒီး ပၢၤကီၫ်တဖၣ်အဘၢၣ်စၢၤ တၫ်သဘံၣ်သဘုၣ်တဖၣ်အဃိ ပၢၤကီၫ်ဒီး ပှၤခဲလၢာ်ပာ်ဖှိၣ်ဘၣ်သံ(၁၀၀)ဂၤဃၣ်ဃၣ်၀ံၤအလီၫ်ခံ ထံကီၫ်ဒီတဘ့ၣ် တၫ်ထီဒါပဒိၣ် ပာ်ဖျါထီၣ်တၫ်ပာ်သး ဘၣ်အိၣ် ထီၣ်၀ဲလီၤ.
ဖဲလါအီကူး(၅)သီနံၤ တၫ်ပာ်ဖျါထီၣ်တၫ်ပာ်သးတုၤလၢ ကိတိာ်ခိၣ်ကျၢၫ်ကဘၣ်ဟးထီၣ်အလီၫ်ခံ ကိတိာ်ခိၣ်ကျၢၫ် အဟံၣ်လၢအိၣ်ဖဲ၀့ၫ်ခိၣ်ဒၣ်ကၣ် ဘၣ်တၫ်နုာ်လီၤ၀ဲန့ၣ်လီၤ.
အလီၫ်ခံ ကီတိာ်ခိၣ်ကျၢၫ် ရှ့းဟၣ်စံၣ်နၣ် ဟးထီၣ်လၢမူဒါလီၫ်လၤအဂ့ၫ် ဘိးဘၣ်ရၤလီၤ၀ဲ၀ံၤ ဟးထီၣ်လၢဘ့ကလါဒ့းရှ် ခီဖျိလၢကဘီယူၤလံအဂ့ၫ် တၫ်ပာ်ဂၢၫ်ပာ်ကျၢၤ၀ဲလီၤ.အ၀ဲလဲၤဃ့ၫ်ဆူ ကီၫ်အ့ဒံယါအဂ့ၫ် တၫ်တယာ်ဃာ်၀ဲဘၣ်ဆၣ် တၫ်တသ့ၣ်ညါဘၣ်လီၤတံၫ်ဒံးဘၣ်.
ကိတိာ်ခိၣ်ကျၢၫ် ဃ့ၫ်ဟးထီၣ်၀ံၤအလီၫ်ခံ တၫ်ဘၢၫ်စၢၤပဒိၣ်န့ၣ် ကပၢဆှၢဃာ်တၫ်၀ံၤ တၫ်ပာ်ဖျါထီၣ်တၫ်ပာ်သး ကဂၢၫ်ထီၣ်က့ၤ၀ဲအဂီၫ် သုးရိၣ်မဲခိၣ်ကျၢၫ် Waker-Uz-Zamanဘိးဘၣ်ရၤလီၤဃာ်၀ဲလီၤ. ကိတိာ်ခိၣ်ကျၢၫ် ရှ့းဟၣ်စံၣ်နၣ်န့ၣ် ဖဲ၂၀၂၄နံၣ်န့ၣ် မၤနၢၤတၫ်ဃုထၢ၀ံၤ ကဲထီၣ်ကိတိာ်ခိၣ်ကျၢၫ်(၅)၀ီညါန့ၣ်လီၤ.
ဘၣ်ထွဲဒီးတၫ်ဟ့ၣ်လီၤပဒိၣ်ပှၤမၤတၫ်ဖိတဖၣ်လီၫ်လၤအကတီၫ် တၫ်ဟ့ၣ်တၫ်ခွဲးတၫ်ယာ်လၢ ပှၤဒုးန့ၫ်ထံကီၫ်တၫ်သဘျ့ ဟံၣ်ဖိဃီဖိတဖၣ်အဖီခိၣ် တၫ်သးတမုာ်တဖၣ်အိၣ်ထီၣ်၀ံၤ ဖဲအပူၤကွံာ် လါယူၤလံအပူၤ ကၠိဖိတဖၣ်တီခိၣ်ရိၣ်မဲ၀ဲဒီး တၫ်ပာ်ဖျါထီၣ်တၫ်ပာ်သးဘၣ်ကဲထီၣ်၀ဲတပယူာ်ဃီန့ၣ်လီၤ.
တၫ်ပာ်ဖျါထီၣ်တၫ်ပာ်သးအပူၤ ပၣ်တံၣ်လၢန့ၫ်ဃာ်ထံကီၫ်တၫ်စိတၫ်ကမီၤအံၤ သူဂံၫ်ဘါဒီး ပှၤပာ်ဖျါထီၣ်တၫ်ပာ်သး ဘၣ်သံလၢအကယၤဂၤဃၣ်ဃၣ်အဃိ သဲစး၀ဲၤဒၢးတကပၤ အိၣ်ဃူ၀ဲပှၤကၠိဖိလၢ ပာ်ဖျါထီၣ်တၫ်ပာ်သးတဖၣ်န့ၣ်လီၤ.
သုးဖိဟံၣ်ဖိဃီဖိလၢဒုးတၫ်လၢထံကီၫ်တၫ်သဘျ့အဂီၫ်တဖၣ် လၢတၫ်နီၤဖးလီၤန့ၫ်အီၤတၫ်ဖံးတၫ်မၤအပူၤ အပူၤကွံာ် တၫ်ပာ်လီၤ န့ၫ်အီၤ(၃၀)မၠးကယၤဘၣ်ဆၣ် လၢကတီၫ်အံၤ တၫ်မၤလီၤစှၤက့ၤတုၤလၢ(၅)မၠးကယၤ၀ံၤ တၫ်မၤတၫ်အလီၫ်(၉၃) မၠးကယၤစ့ၫ်ကီး ကံၫ်စီအဖီခိၣ်တၫ်ကဟ့ၣ်ဖံးဟ့ၣ်မၤအဂီၫ်ဒီး(၂)မၠးကယၤန့ၣ် ကလုာ်ဒူၣ်ဆံးတဖၣ်ဒီး ပှၤက့ၫ်ဂီၤ တလၢပှဲၤတဖၣ် တၫ်ကနီၤဟ့ၣ်ဘၣ်အဂီၫ် သဲစး၀ဲဒၢးဆၢတဲာ်လီၤ၀ဲလီၤ.
