လါအီကၢး(၇)သီ,၂၀၂၄နံၣ်
နီၫ်ဂံၫ်(၈) ကီၫ်စၢဖှိၣ်ကျဲမုၫ်လၢအမ့ၫ် ၀ီၫ်ရီ-ဒ၀ဲၫ်ကျဲဒီး ၀ီၫ်ရီ-လမဲ(လမိုင်း)ကျဲတဖၣ် KNLA၊ PDFသုးပာ်ဖှိၣ်တဖၣ် ပၢဆှၢဃာ်၀ဲအဃိ သုးကီၣ်ကးန့ၣ် သူဃုာ်၀ဲထံကျဲခီဖျိလၢဂံၫ်ဘါအါအါဂီၫ်ဂီၫ်၀ံၤ ဟဲထီၣ်ဒုးတၫ်အဂ့ၫ် ယ့ဘလူအခိၣ် တဲ၀ဲလီၤ.ကျဲမုၫ်တဖၣ်အံၤ KNLA၊ PDF သုးပာ်ဖှိၣ်တဖၣ် ပၢဆှၢဃာ်၀ဲအမဲာ်ညါ သိလ့ၣ်လၢလဲၤထီၣ်က့ၤလီၤတဖၣ် သုးကီၣ်ကးအကျိချံပှာ်သၣ်ဒီးအပှၤပာ်ဃုာ်အိၣ်တအိၣ် ပှၤကိးဂၤကပူၤဖျဲးဒီးတၫ်လီၤဘၣ်ယိၣ်အဂီၫ် သမံသမိး ဟံးန့ၫ်ဃာ်တၫ်ဘံၣ်တၫ်ဘၢန့ၣ်လီၤ.
တလၢၤကီၫ်စဲၣ်,၀ီၫ်ရီကီၫ်ဆၣ်ဟီၣ်က၀ီၤ,လမဲ(လမိုင်း),မူးကနဲၣ်(မုကနယ်),ခီစၣ်(ခေါဇာ) သ၀ီဖးဒိၣ်အကပၤတဖၣ်, မလွဲကစၢၫ်(မလွဲတောင်)အဆၢလာ် (၉)တၢၣ် တၫ်လီၫ်တဖၣ် သုးကီၣ်ကးမၤအါထီၣ် သုးဂ့ၫ်၀ီတၫ်ဟူးတၫ်ဂဲၤတဖၣ်၀ံၤ မၤအါထီၣ်ဂံၫ်ဘါလၢထံကျဲတသီဘၣ်တသီအဂ့ၫ် ယ့ဘလူအခိၣ် တဲ၀ဲလီၤ.
ဖဲလါယူၤလံ(၂၈)သီနံၤ လၢ၀့ၫ်၀ီၫ်ရီ လ့ၣ်မီၣ်ခၠၣ်သ၀ီ(လိမ္မော်ခြံကျေးရွာ)ဒီးမီကန့ၣ်သီ၀ီ (မော့ကနင်ကျေးရွာ) အဘၢၣ်စၢၤ သုးကီၣ်ကးအသုးတဖၣ် ဟဲထီၣ်လၢသုးကျိၤအဃိ တၫ်ဒုးကဲထီၣ်ဒီး ကညီဒီကလုာ်တၫ်ထူၣ်ဖျဲး သုးမုၫ်ဒိၣ်-KNLA သုးပာ်ဖှိၣ်တဖၣ်န့ၣ်လီၤ.
သုးကီၣ်ကးမၤအါထီၣ်ဂံၫ်ဘါအဃိ တၫ်က့ၤအိၣ်ဆိးတန့ၫ်ဒံးဘၣ်အဂ့ၫ် တလၢၤဖဲၣ်ဒရှၢၣ်ကီၣ်ကး (MSFC) ဟီၣ်ခိၣ်ဖိ တၫ်မၤစၢၤဒီးတၫ်မၤပူၤဖျဲး၀ဲၤကျိၤခိၣ် မံးဆူးတကၠိၣ်(မိဆုတဂျို)တဲ၀ဲလီၤ.
“အခဲအံၤ ဂၢၫ်ထီၣ်တစဲးဖိလီၤ.သုးကီၣ်ကး အသုးဖိသီလၢစံၣ်လီၤတၫ်မၤလိ၀ံၤတဖၣ် ဟဲတုၤ၀ဲအိၣ်လီၤ.လၢ၀ီၫ်ရီမ့ၫ်ဂ့ၤ လၢယ့ၣ်ဖၠူၣ်မ့ၫ်ဂ့ၤ အိၣ်၀ဲလီၤ.လီၤဆီဒၣ်တၫ် လၢနီၫ်ဂံၫ်(၈)ကျဲမုၫ်ဒိၣ်န့ၣ် တၫ်ပၢၫ်ဆၢသုးတကပၤ ဂုၤက့ၤအခံအိၣ်၀ဲလီၤ. လၢကတီၫ်အံၤကမျၢၫ်တဖၣ်က့ၤတန့ၫ်ဒံးဘၣ်.သုးကီၣ်ကး မၤပှဲၤအါထီၣ်အဂံၫ်အဘါလီၤ.”
ဖဲလါယူၤလံ(၂၉)သီနံၤ မုၫ်ထူၣ်(၁၂)တခီအကတီၫ် ခံကပၤတၫ်ဒုးအပူၤ ကျိဖးဒိၣ်အချံလၢသုးကီၣ်ကးခးလီၤ၀ဲန့ၣ် လီၤတဲာ်၀ဲဖဲလ့ၣ်မီၣ်ခၠၣ်သ၀ီ(လိမ္မော်ခြံကျေးရွာ)ပူၤအဃိ ဖံသးပှၫ်တဂၤဒီးပိာ်ခွါတဂၤ ဘၣ်ဒိဘၣ်ထံး၀ဲလီၤ.
တကးဘၣ် ၀ီၫ်ရီ-ဒ၀ဲၫ်ကျဲတကပၤ တၫ်ဒုးတဖၣ်ကဲထီၣ်တလီၫ်လီၫ်၀ံၤ သိလ့ၣ်တီၣ် ပှၤလဲၤထီၣ်က့ၤလီၤ ဒီးသိလ့ၣ် တီၣ်ပနံၣ်တဖၣ် သုးကီၣ်ကးအသုးဃ့ကျိာ်စ့အိၣ်၀ဲအဂ့ၫ် လီၫ်က၀ီၤဖိတဖၣ်တဲ၀ဲလီၤ.
