လါအီကၢး(၆)သီ,၂၀၂၄နံၣ်
ယိၤဒိၣ်ကီၫ်စဲၣ်ကလံၤထံး တၫ်ဘၣ်ကွၫ်ဆၢၣ်မဲာ်တၫ်ဒုးတဖၣ်ပာ်ဃုာ် တၫ်ကွၫ်ဆၢမဲာ်လၢ ဘၣ်ပာ်တ့ၫ်သုးကလၢၤတဖၣ် န့ၣ် မ့ၫ်လၢထံဂုၤကီၫ်ဂၤတဖၣ် ဆီၣ်ထွဲမၤစၢၤ တၫ်ပၢၫ်ဆၢသုးတဖၣ် တၫ်စုက၀ဲၤ,ပတီၫ်ထီတၫ်သ့တၫ်ဘၣ်ဒီး တၫ်အီၣ် တၫ်အီတဖၣ်အဃိအဂ့ၫ် သုးကီၣ်ကးအခိၣ်ပဲာ်အၢပဲာ်သီ၀ဲလီၤ.
တတဲဖျါ၀ဲထံကီၫ်ဖဲလဲၣ်တဘ့ၣ်လီၤတံၫ်လီၤဆဲးဘၣ်ဆၣ် အၢၣ်လီၤဃာ်၀ဲလၢတရူးဒီးကၠီၣ်တဲၣ်ကီၫ်ဆၢ တၫ်စုက၀ဲၤတဖၣ်အဃိ အသုးဖိတဖၣ်ဘၣ်ဒိဆါ၀ဲန့ၣ်လီၤ.
ယိၤဒိၣ်ကီၫ်စဲၣ်ကလံၤစိး ကိကးဟီၣ်က၀ီၤဒီး ၀့ၫ်လါရှိလၢ ကိကးသုး(MNDAA)ထီၣ်ဒုးမၤန့ၫ်၀ဲအံၤ ဒြိလၢသူ၀ဲဒီး မျိာ်သၣ်ယူၤတဖၣ်န့ၣ် ကီၫ်ချၢပှၤသူၣ်သ့တဖၣ် အတၫ်မၤစၢၤအဖီခိၣ် မ့ၫ်တၫ်စုက၀ဲၤတဖၣ်လၢ တၫ်မၤထီထီၣ်ဃး အပတီၫ်အဂ့ၫ်အ၀ဲတဲ၀ဲလီၤ.MNDAAအဒုးယၤဒြိတဖၣ်န့ၣ် ကီၫ်ချၢပှၤကူၣ်သ့လၢမၤအီၣ်စ့တဖၣ် မၤစၢၤ၀ဲအဂ့ၫ် သုးကီၣ်ကးအခိၣ်တဲ၀ဲလီၤ.
တရူး-ပယီၤကီၫ်ဆၢအပူၤ တၫ်စုက၀ဲၤစဲးဖီကဟၣ်တၫ်မၤလီၫ် တၫ်သူၣ်ထီၣ်ဘှီထီၣ်အီၤဒ်သိးအံၤန့ၣ် တၫ်အိၣ်သး ပတီၫ်မုၫ်အဖီခိၣ်တမ့ၫ်တၫ်မၤ၀ဲကန့ၫ်ဘၣ်.ကျိာ်စ့ဂံၫ်ဘါဒီး တၫ်သ့တၫ်ဘၣ်ဂံၫ်ဘါ လိၣ်အါမးအဃိ စဲးဖီကဟၣ်တဖၣ် အံၤ ကလဲၤတရံးသးအဂီၫ် ကျိာ်စ့ဒီးတၫ်သ့တၫ်ဘၣ်ဂံၫ်ဘါတဖၣ်အံၤ လဲၤမၤန့ၫ်၀ဲလၢထံကီၫ် ဖဲလဲၣ်တဘ့ၣ်လဲၣ်န့ၣ် မ့ၫ်တၫ်လၢြကၢးကွၫ်ထံဆိကမိၣ်အဂ့ၫ် သုးကီၣ်ကးအခိၣ်တဲ၀ဲလီၤ.
တကးဘၣ် ထံကီၫ်ကလံၤထံးတကပၤ ပှၤပၢၫ်ဆၢတၫ်ဖိတဖၣ်စ့ၫ်ကီး ဒိးန့ၫ်တၫ်စုက၀ဲၤလၢကၠီၣ်တဲၣ်ကီၣ်ဆၢ၀ံၤ သူ၀ဲအဂ့ၫ် တဲ၀ဲလီၤ.
လၢအဂၤတကပၤ သုးကီၣ်ကးလၢ ဘၣ်တၫ်ဒုးအီၤလၢကိးကပၤအံၤ ကီၤလိာ်ကျိအကပိာ်ကပၤ ကညီဒီကလုာ် စၢဖှိၣ်ကရၢ-KNU အိၣ်ကတဲာ်ကတီၤသးလၢကစးထီၣ်တၫ်ဒုးသီအဃိ ကအုကစွါလီၤ.တၫ်ဒုးတဘျီ၀ဲအံၤန့ၣ် KNU,သုးက့နီၫ်ဂံၫ်(၁),(၃)ဒီး(၅)ကနုာ်လီၤဒုးသကိးတၫ်န့ၣ် ဒိးန့ၫ်တၫ်ကစီၣ်အဂ့ၫ်တဲ၀ဲလီၤ.
သုးကီၣ်ကးအခိၣ်န့ၣ် ဖဲလါယူၤလံ(၂၂)သီနံၤ အနီၫ်ကစၫ်ဒၣ်၀ဲဘိးဘၣ်ရၤလီၤအသးဒ် ကီၫ်ခိၣ်ပတြီၤ၀ံၤအလီၫ်ခံ သုးကီၣ်ကးလၢကရၢကရိဒုးအိၣ်ထီၣ်၀ဲအံၤ သုးအါထီၣ်၀ဲတၫ်ဆၢကတီၫ်တုၤလၢ ၂၀၂၅နံၣ်,လါယနူၤအါရံၤ (၃၁)သီနံၤန့ၣ်လီၤ.
သုးကီၣ်ကးအခိၣ် ဘိးဘၣ်ရၤလီၤအသးလၢ ကီၫ်ခိၣ်ပတြီၤ၀ံၤအလီၫ်ခံ ယံာ်(၃)နွံ ဖဲလါအီကူး(၃)သီနံၤန့ၣ် မုၫ်ထီၣ် ကလံၤစိးသုး၀ဲၤလီၫ်ခိၣ်သ့ၣ်လၢ အိၣ်ဆီလီၤအသးဖဲ၀့ၫ်လါရှိ ဘၣ်လီၤ၀ဲဒၣ်ဆူ MNDAAသုးအစုပူၤန့ၣ်လီၤ.
တၫ်မၤအသးအံၤ ပယီၤသုးမုၫ်ဒိၣ်အဂီၫ် မ့ၫ်စံၣ်စိၤနုာ် တၫ်လီၤဆံးလီၤစှၤဖးဒိၣ်တခါ၀ံၤ ပယီၤသုးတၫ်စံၣ်စိၤအပူၤ မ့ၫ်ကီၫ်ခီအဆိကတၢၫ်တခါလၢ တၫ်ပၢၫ်ဆၢသုးတဖၣ် ထီၣ်ဒုးမၤန့ၫ်၀ဲလီၤ.
