လါအီကၢး(၆)သီ, ၂၀၂၄နံၣ်
ကီၢ်ပယီၤဒီတဘ့ၣ် စဲးဖီကဟၣ်သူသိတလၢတလီၢ်တဖၣ် ကဲထီၣ်သး၀ံၤ တၢ်ဘၣ်ပှ့ၤအီၤလၢအပှ့ၤကလံၤဒိၣ်တဖၣ်, တၢ်ဘၣ်လဲၤရဲၤလီၤခိးပှ့ၤအီၤလၢတၢ်ဆၢကတီၢ်ယံၤယံၤဒီး တကးဘၣ်လၢတၢ်လိၣ်ဘၣ်အဖီခိၣ် တၢ်ပှ့ၤအီၤလၢလၢလီၢ်လီၢ်တန့ၢ်ဘၣ်န့ၣ်လီၤ.
၀့ၢ်တကူၣ်,မါတလ့ပၥ်ဃုၥ် န့ၣ်ပၠံၣ်တီၣ်ဒီးကီၢ်ပယီၤဒီတဘ့ၣ်တၢ်လီၢ်သကူးအပူၤ ဖဲလါယူၤလံလီၢ်ခံကတၢၢ်အနွံလံၤလံၤန့ၣ် စဲးဖီကဟၣ်သူသိတဖၣ်တလၢတလီၢ်တဖၣ်ကဲထီၣ်သးအဂ့ၢ် လီၢ်က၀ီၤကမျၢၢ်တဖၣ် စံး၀ဲန့ၣ်လီၤ.
လၢ၀့ၢ်တကူၣ်စ့ၢ်ကီး တၢ်ဘၣ်လဲၤရဲၤလီၤခိးပှ့ၤအီၤလၢတၢ်ဆၢကတီၢ်ယံၤယံၤအဃိ တၢ်လဲၤပှ့ၤအီၤလၢ၀့ၢ်ချၢသိကျးတဖၣ်၀ံၤ တၢ်ဆါလီၤန့ၢ်အီၤလၢ ကၢကီၣ်သဃီၤသနူလီၤအဂ့ၢ် ၀့ၢ်တကူၣ်-ခယါ ပှၤနီၣ်သိလ့ၣ်ဖိတဂၤတဲ၀ဲန့ၣ်လီၤ.
လၢန့ၣ်ပၠံၣ်တီၣ်စ့ၢ်ကီး တၢ်ဘၣ်ပှ့ၤအီၤ 92, 95သိအကလုၥ်တဖၣ်ကီခဲ၀ဲအဃိ ပှၤမၤတၢ်ဖိဒီးခီပနံၥ်ပှၤမၤတၢ်ဖိတဖၣ် ကနုၥ်လီၤလၢတၢ်မၤလီၢ်ပူၤအဂီၢ် ကွၢ်ဆၢၣ်မဲၥ်ဘၣ် တၢ်ကီတၢ်ခဲအဂ့ၢ် ပှၤမၤတၢ်ဖိတဂၤ တဲ၀ဲန့ၣ်လီၤ.
တဘျီအံၤ စဲးဖီကဟၣ်သူသိတလၢတလီၢ်ကဲထီၣ်သးန့ၣ် မ့ၢ်သုးဟံးန့ၢ်ဆူၣ်ထံကီၢ်တၢ်စိတၢ်ကမီၤ၀ံၤအလီၢ်ခံ ကဲထီၣ်သးသၢဘျီတဘျီ၀ံၤ ဖဲလၢ၂၀၂၂နံၣ်, လါစပထ့ဘၢၣ် န့ၣ်တဘျီ, ၂၀၂၃နံၣ်, လါဒံၣ်စ့ဘၢၣ်န့ၣ်တဘျီဒီး စဲးဖီကဟၣ်သူသိတလၢတလီၢ်တဖၣ်, သိအပှ့ၤကလံၤဒိၣ်ထီၣ်တဖၣ်ကဲထီၣ်သးန့ၣ်လီၤ.
တၢ်ဆီတလဲကွံၥ် တၢ်သြီနုၥ်သိအသနူတဖၣ်အဃိ၀ံၤ တၢ်တဆါလီၤန့ၢ်ဒီၣ်လၣ်လၢလၢလီၢ်လီၢ်ဆူ ပှၤလၢသြီနုၥ်လီၤသိ importer တဖၣ်, တၢ်တီၣ်သြီနုၥ်သိလၢ ကီၢ်ဆၢတန့ၢ်ဘၣ်တဖၣ်, တၢ်လိးက့ၤကျိၥ်စ့ဆူ ခီပနံၥ်လၢဆါလီၤန့ၢ်သိတန့ၢ်ဘၣ်တဖၣ်ကဲထီၣ်အဂ့ၢ် ပှၤလၢတီၣ်ဆါရၤလီၤတဂၤ တဲ၀ဲန့ၣ်လီၤ. ကတီၢ်ခဲအံၤတခီ သိတီၣ်ကဘီတဖၣ်က့ၤနုၥ်လီၤ၀ဲလံအဂ့ၢ် တၢ်သ့ၣ်ညါဘၣ်န့ၣ်လီၤ.
လၢ၀့ၢ်တကူၣ် ရ့ၣ်နီၣ်သိ 92တလံထၢၣ် ၂,၇၇၀ကၠးဒီး 95တလံထၢၣ်န့ၣ် ၂,၈၉၅ကၠး၀ံၤ မမ့ၢ်မါတလ့တခီ ရ့ၣ်နီၣ်သိ 92တလံထၢၣ် ၂,၈၅၀ကၠး ဒီး95တလံထၢၣ်န့ၣ် အိၣ်၀ဲ ၂,၉၇၅ကၠးအဂ့ၢ် ပှၤလၢပၥ်ကီၤရၤလီၤဆါသိတၢ်ဖံးတၢ်မၤကမံးတံၥ် ပၥ်ဖျါဃၣ်၀ဲ သိအပှ့ၤကလံၤတၢ်ပနီၣ် ဖဲလါအီးကူး(၅)သီအနံၤန့ၣ်လီၤ.
Ref: DVB
