လါယူၤလံ(၃၁)သီ,၂၀၂၄နံၣ်
ကိၣ်လၣ်ဟီၣ်က၀ီၤလၢ အံၣ်စရ့ဒုးန့ၫ်ပၢဃာ် ဖဲတယံာ်ဒံးဘၣ်အတီၫ်ပူၤ ဘၣ်တၫ်ဒုးအီၤ၀ံၤအလီၫ်ခံ ဟံးစဘိၣ်လၣ်ကရၢ လၢ အိၣ်ဆီလီၤဃာ်အသး ဖဲလဲးဘနိၣ်တဖၣ် ကဒုးဆၢက့ၤ၀ဲအဂ့ၫ် အံၣ်စရ့ကိတိာ်ခိၣ်ကျၢၫ် န့ၣ်တၣ်ယၣ်ဟူ ဟ့ၣ်တၫ်အၢၣ်လီၤတဲလီၤ၀ဲလီၤ.
ကိၣ်လၣ်(ဂိုလန်)ဟီၣ်က၀ီၤပူၤ ထဲဖျၢၣ်ထူပျီတခါအပူၤ မျိာ်သၣ်လီၤတဲာ်ပိၫ်ဖးအဃိ အါတက့ၫ်ဖိသၣ်ပာ်ဃုာ် ပှၤ(၁၂) ဂၤဘၣ်သံ၀ံၤ တၫ်အံၤမ့ၫ် ဟံးစဘိၣ်လၣ်အတၫ်မၤအဂ့ၫ် အံၣ်စရ့တဲ၀ဲလီၤ.
အပူၤကွံာ်တၫ်မၤ၀ဲ အံၣ်စရ့ပဒိၣ် တၫ်အိၣ်ဖှိၣ်အပူၤ တၫ်ကဒုးဆၢက့ၤ ဟံးစဘိၣ်လၣ်ကရၢအဂီၫ် ကျိၤကျဲလၢတၫ်ကဒုးဆၢဒီးတၫ်ဆၢတဲာ် တၫ်ဆၢကတီၫ်အဂီၫ် ကိတိာ်ခိၣ်ကျၢၫ် န့ၣ်တၣ်ယၣ်ဟူဒီးတၫ်ဒီသဒၢကိတိာ် ကဲလး(ဂဲလ်လန့်)တဖၣ် တၫ်ဟ့ၣ်လီၤအီၤတၫ်ပျဲလံန့ၣ်လီၤ.
န့ၣ်တၣ်ယၣ်ဟူန့ၣ် လဲၤကွၫ်သမံသမိး၀ဲတၫ်ကဲထီၣ်အသး၀ံၤအလီၫ်ခံ ပှၤလၢဘၣ်သံတဖၣ်အဂီၫ် အသးတမုာ်ဘၣ်အဂ့ၫ်ဒီး တၫ်ဂ့ၫ်အံၤတမ့ၫ်လၢတၫ်ကကွၫ်ကပာ်ကွံာ်ဘၣ်အမဲာ်ညါ ပတၫ်ခီၣ်ဆၢန့ၣ် ကဆူၣ်န့ၫ်၀ဲအဂ့ၫ် တဲ၀ဲလီၤ.
ဟံးစဘိၣ်လၣ်တခီ တၫ်ဒုးတဘျီအံၤ တမ့ၫ်အ၀ဲသ့ၣ်မၤဘၣ်န့ၣ် ဂ့ၫ်လိာ်ဃး၀ဲလီၤ.ဘၣ်ဆၣ်သနာ်က့ တၫ်ကဒီသဒၢ အံၣ်စရ့တၫ်ဒုးဆၢအဂီၫ် ရၤလီၤဃာ်မျိာ်သၣ်တဖၣ်အဂ့ၫ် အ့ၣ်ဖံၣ်တၫ်ကစီၫ်သန့ပာ်ဖျါ၀ဲလီၤ.
ဟံးစဘိၣ်လၣ်တကပၤ အတၫ်အိၣ်ဆၢထၢၣ်န့ၣ် တမ့ၫ်လၢကဆီတလဲဘၣ်အဂ့ၫ်, တၫ်ဒုးကကဲထီၣ်ဒီး အံၣ်စရ့န့ၣ် တသးလီ၀ဲဘၣ်ဆၣ် တၫ်ဒုးမ့ၫ်ကဲထီၣ်န့ၣ် ကဒုး၀ဲအဂ့ၫ် ဟံးစဘိၣ်လၣ်ဘၣ်မူဘၣ်ဒါတဖၣ်တဲဃာ်၀ဲလီၤ.
လၢကတီၫ်အံၤ အံၣ်စရ့ဒီးဟံးစဘိၣ်လၣ်အဘၢၣ်စၢၤ လၢကၣ်စၣ်တၫ်ဒုးစးထီၣ်လံၤလံၤ တၫ်ခးလိာ်သးကဒဲကဒဲ အိၣ်အါထီၣ်၀ံၤ မုၫ်ထီၣ်တၫ်ခၢၣ်သးဟီၣ်က၀ီၤ တၫ်ဒုးလၢခံတခါကကဲထီၣ်ဘၣ်ဖုးန့ၣ် တၫ်ဘၣ်ယိာ်ဘၣ်ဘှီ အိၣ်၀ဲ န့ၣ်လီၤ.
