၇.၅.၂၀၂၄
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ,သုးက့နီၣ်ဂံၫ်(၅),မုၫ်တြီၫ်ကီၫ်ရ့ၣ်ဟီၣ်က၀ီၤအပူၤ စးထီၣ်လၢလါယူၤ(၁)သီဒီးတုၤ(၃၀)သီအနံၤ, (၁)လါအတီၫ်ပူၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA),သုးပာ်ဖှိၣ် ဒီးသုးကီၣ်ကးအဘၢၣ်စၢၤ တၫ်ဒုးကဲထီၣ်တ့ၫ်၀ဲ(၁၂၂)ဘျီ၀ံၤ သုးကီၣ်ကးတပၤသံ၀ဲ(၆၀)ဂၤ ဒီးဘၣ်ဒိ(၁၉)ဂၤအဂ့ၫ် ခ့ၣ်အဲၣ်ယူၣ်-မုၫ်တြီၫ်ပာ်ဖျါဃၣ်၀ဲန့ၣ်လီၤ.
မ့မ့ၫ်လၢ တၫ်ပၢၫ်ဆၢသုးပာ်ဖှိၣ်တကပၤစ့ၫ်ကီး သုးက့နီၣ်ဂံၫ်(၂)အပှၤသုးဖိ(၂)ဂၤသံ၀ဲ၀ံၤ (၃)ဂၤဘၣ်ဒိ၀ဲအဂ့ၫ်စံး၀ဲန့ၣ်လီၤ.
ဖဲလၢခံခီခံကပၤတၫ်ဒုးကဲထီၣ်သးကတီၫ် သုးကီၣ်ကးအကဘီယူၤဒုးသုး ဟဲတ့ၫ်လီၤမ့ၣ်ပိၫ်ဆူ ကမျၢၫ်ဖံးအီၣ်မၤအီၣ်လီၫ်ကျဲအပူၤ ဘူးထီၣ်(၆၀၀)ဖျၢၣ်၀ံၤ တကးဘၣ်ဟဲတ့ၫ်လီၤမ့ၣ်ပိၫ်(၇၂)ဖျၢၣ်လၢဒြိအဃိ ကမျၢၫ်ဟံၣ်(၄)ဖျၢၣ်, သီခါဖၠၣ်(၁)ဖျၢၣ်ဒီး တၫ်သိၣ်ကၠိ(၁)ဖျၢၣ်စ့ၫ်ကီး ဟးဂီၤကွံာ်၀ဲအဂ့ၫ်ပာ်ဖျါဃၣ်၀ဲန့ၣ်လီၤ.
အပူၤကွံာ်လါမ့ၤဒီတလါအတီၫ်ပူၤ မုၫ်တြီၫ်ကီၫ်ရ့ၣ်ဟီၣ်က၀ီၤပူၤ သုးကီၣ်ကးလဲၤတ့ၫ်လီၤမ့ၣ်ပိၫ်(၁)ကထိဖျၢၣ် ဆူကမျၢၫ်အိၣ်ဒူသ၀ီ, ကမျၢၫ်ဖံးအီၣ်မၤအီၣ်လီၫ်ကျဲတဖၣ်အပူၤအဃိ ကမျၢၫ်အိၣ်ဟံၣ်တၫ်သူၣ်ထီၣ်တဖၣ်,တၫ်ဖံးအီၣ်မၤအီၣ်လီၫ်ကျဲတဖၣ် ဒီးဆၣ်ဖိကီၫ်ဖိတဖၣ်စ့ၫ်ကီး ဟးဂုာ်ဟးဂီၤကွံာ်၀ဲန့ၣ်လီၤ.
လၢန့ၣ်အမဲာ်ညါ ဖဲအပူၤကွံာ် လါမ့ၤဒီတလါအတီၫ်ပူၤစ့ၫ်ကီး မုၫ်တြီၫ်ကီၫ်ရ့ၣ်အပူၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA), သုးပာ်ဖှိၣ်ဒီးသုးကီၣ်ကးအဘၢၣ်စၢၤ တၫ်ဒုးကဲထီၣ်တ့ၫ်၀ဲ(၁၀၇)ဘျီ၀ံၤ သုးကီၣ်ကးတပၤသံဒီးဘၣ်ဒိခဲလၢာ်ပာ်ဖှိၣ်(၆၀)ဂၤဃၣ်ဃၣ်န့ၣ်လီၤ.
