လါယူၤလံ(၄)သီ,၂၀၂၄နံၣ်
ကီၫ်ကၠီၣ်တဲၣ်, ကီၫ်ရ့ၣ်ခၠိၣ်ပူၣ်လံၣ်, ၀့ၫ်စံၣ်ရဲးခၠၣ်,ဖဲထိၣ်စူၣ်လး, တၫ်သူၣ်ထီၣ်ဘှီထီၣ်တၫ်မၤလီၫ်တခါအပူၤ MOUကီၫ်ပယီၤခီကီၫ်ပှၤမၤတၫ်ဖိ (၁၃၀)ဂၤ တဒိးန့ၫ်ဘၣ် တၫ်မၤအလဲလၢ တၫ်မၤကစၫ်အိၣ်ဘၣ်အဃိ ထံၣ်ဘၣ်တၫ်ကီတၫ်ခဲလီၤ.
MOUကီၫ်ပယီၤခီကီၫ်ပှၤမၤတၫ်ဖိ(၁၃၀)ဂၤအံၤန့ၣ် မၤတၫ်ဖဲTrede Win Co.,LTDဒီး SHWE LANN PHWINT CP.,LTD တၫ်သူၣ်ထီၣ်ဘှီထီၣ်တၫ်ဖံးတၫ်မၤအပူၤန့ၣ်လီၤ.
အပူၤကွံာ်တၫ်မၤကစၫ်န့ၣ် ဟ့ၣ်၀ဲတၫ်မၤအလဲဒ်ညီနုၫ်အသိးဘၣ်ဆၣ် စးထီၣ်ဖဲလါယူၤ(၁)သီတုၤလၢကတီၫ်အံၤ တၫ်တဟ့ၣ်အ၀ဲသ့ၣ်လၢၤဘၣ်အဃိ ဘၣ်ဆၢၣ်မဲာ်ဘၣ်တၫ်အိၣ်ဆိးအီၣ်အီတၫ်ဂ့ၫ်ကီအဂ့ၫ် WAG တၫ်မၤစၢၤကီၫ်ပယီၤပှၤမၤတၫ်ဖိကရၢတဲ၀ဲလီၤ.
WAG ပှၤဘၣ်မူဘၣ်ဒါ ကိၣ်မီၣ်တဲ တဲ၀ဲလၢ “ပှၤမၤတၫ်ဖိတဖၣ်အံၤ တၫ်မၤကစၫ်ဒီးပှၤကျိာ်ထံတၫ်တဖၣ် တဟ့ၣ်အီၤတၫ်မၤအလဲဘၣ်ဒီး ထုးထီၣ်ကွံာ်အီၤလၢတၫ်မၤအိၣ်၀ဲအဂ့ၫ်ဒီး ဟဲဃ့တၫ်မၤစၢၤလၢပအိၣ်န့ၣ်လီၤ.”
ကီၫ်ပယီၤခီကီၫ်ပှၤမၤတၫ်ဖိ(၁၃၀)ဂၤ အတၫ်မၤအလဲန့ၣ် နီၣ်တဂၤကဘၣ်ဒိးန့ၫ်၀ဲ ၁၆၀၀၀ဘးစုာ်စုာ်အဂ့ၫ် ကိၣ်မိၣ်တဲ တဲ၀ဲလီၤ.
တၫ်မၤကစၫ်လၢတဟ့ၣ် ပှၤမၤတၫ်ဖိတၫ်မၤလဲန့ၣ် WAG တၫ်မၤစၢၤအဖီခိၣ် ဖဲလါယူၤလံ(၂)သီနံၤန့ၣ် ဘၣ်တၫ်လဲၤတၢၣ်အီၤဆူ ခၠိၣ်ဘူၣ်လံၣ်ဆ၀ၣ်ဒံးကၣ်၀ဲၤဒၢးန့ၣ်လီၤ.စ၀ၣ်ဒံးကၣ်,တီမီဒီးWAGကရၢတဖၣ် ပာ်ဖှိၣ်ထီၣ်အသး၀ံၤနုာ်လီၤသမံသမိး၀ဲလၢတၫ်မၤလီၫ်အပူၤန့ၣ်လီၤ.
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ သုးကီၣ်ကးပၢတၫ်အစိၤ ကီၫ်ပူၤတၫ်ဖံးတၫ်မၤကၤထီၣ်အဃိ သးစၫ်အါတက့ၫ်န့ၣ် ဟးထီၣ်ဃုဖံးဃုမၤလၢထံဂုၤကီၫ်ဂၤလီၤ.
လၢဖိးသဲစး MOU သနူအဖီခိၣ် ပှၤလၢဟဲဆူကီၫ်ကၠီၣ်တဲၣ်တဖၣ် ကွၫ်ဆၢၣ်မဲာ်ဘၣ်တၫ်ဖံးတၫ်မၤတအိၣ် ဒီးတၫ်ကီတၫ်ခဲတဖၣ်၀ံၤ ပှၤလၢကဟဲတဖၣ်စ့ၫ်ကီး ကဃုသ့ၣ်ညါဘၣ် တၫ်ဖံးတၫ်မၤAngencyတဖၣ် လီၤတံၫ်လီၤဆဲး မ့ၫ်၀ံၤမးဒီးကဟဲဘၣ်၀ဲအဂ့ၫ် ပှၤမၤစၢၤကီၫ်ပယီၤခီကီၫ်ပှၤမၤတၫ်ဖိတဖၣ် တဲဆီၣ်တခူထီၣ်၀ဲလီၤ.
Ref: Western News
