လါမ့ၤ(၂၀)သီ, ၂၀၂၄နံၣ်
ကီၫ်စဲၣ်ရခၢၣ်, တၫ်ထီၣ်ဒုးမၤန့ၫ် ၀့ၫ်ဘူသံတီၣ်(ဘူးသီးတောင်မြို့)တၫ်ဒုးအပူၤ တၫ်စံးအၢစံးသီလၢ တၫ်ပညိၣ်ဒုး၀ဲ ပှၤရိၣ်ဟ့ၣ်ကၠၣ်(ရိုဟင်ဂျာ)ဖိတဖၣ် အဖီခိၣ် AAဂ့ၫ်လိာ်၀ဲလီၤ. ၀့ၫ်ဘူသံတီၣ်အပူၤ သုးကီၣ်ကး အသုးကလၢၤတဖၣ် တၫ်ထီၣ်ဒုး မၤန့ၫ်ကွံာ်လံအဂ့ၫ် AA ဘိးဘၣ်ရၤလီၤ၀ံၤအလီၫ်ခံ တၫ်နီဟးထီၣ်ကွံာ် ပှၤရိၣ်ဟ့ၣ်ကၠၣ်ဖိတဖၣ်, အဟံၣ်ဃီတဖၣ် ဘၣ်တၫ်ဒွဲၣ်အူအီၣ်ကွံာ်အဂ့ၫ် ပှၤဟူးဂဲၤလၢ ရိၣ်ဟ့ၣ်ကၠၣ်ဂ့ၫ်၀ီတဖၣ်တဲ၀ဲလီၤ.
၀့ၫ်ဘူသံတီၣ်အပူၤ သုးကီၣ်ကးအသုးကလၢၤခဲလၢာ် ထီၣ်ဒုးမၤန့ၫ်ကွံာ်၀ဲခဲလၢာ်လံ အဂ့ၫ် AA ဘိးဘၣ်ရၤလီၤ၀ဲဖဲ လါမ့ၤ(၁၈)သီနံၤန့ၣ်လီၤ. ဘူသံတီၣ်ပာ်ဃုာ် ကီၫ်စဲၣ်ရခၢၣ်ပူၤ ဘၣ်ထွဲဒီးတၫ်ဒုးတၫ်အိၣ်သးတဖၣ်တခီ သုးကီၣ်ကးတကပၤ တၫ်တထံၣ်လၢ ဘိးဘၣ်ပာ်ဖျါ တၫ်နီတမံၤဒံးဘၣ်.
ဘူသံတီၣ်ဒီး အကပိာ်ကပၤတၫ်ဒုးကဲထီၣ်တဖၣ်အပူၤ ပှၤရိၣ်ဟ့ၣ်ကၠၣ်ဖိတဖၣ် AA ပညိၣ်ဒုးဃီၤအီၤအဂ့ၫ် ပှၤဟူးဂဲၤလၢပှၤရိၣ်ဟ့ၣ်ကၠၣ်ဖိဂ့ၫ်၀ီတနီၤ အတၫ်စံးအၢစံးသီ ဟဲအိၣ်ထီၣ်၀ဲန့ၣ် တမ့ၫ်ဘၣ်အဂ့ၫ် AA ပှၤတဲတၫ်ပၢ(ပြောခွင့်ရ) ခဲၤသူးခး (ခိုင်သုခ) တဲ၀ဲလီၤ.
ခမရ(၃၅၃)သုးရ့ၣ် လၢအိၣ်ဆီလီၤအသးဖဲ ဘူသံတီၣ်, AAထီၣ်ဒုးမၤပျီကွံာ်၀ဲအကတီၫ် ခယူးခၠီ(ခရုချောင်း) မူၤစလ့ၣ်သ၀ီ(မွတ်ဆလင်ကျေးရွာ) ဖိသၣ်ပာ်ဃုာ် မူၤစလ့ၣ်(မွတ်ဆလင်) ပိာ်မုၣ်, ပိာ်ခွါ ခဲလၢာ်(၃၅)ဂၤ လၢ(၃)သီအတီၫ်ပူၤ သုးကီၣ်ကးအသုးဖီၣ်ဃာ်ဒီး တဒုးအီၣ်၀ဲ တၫ်အီၣ်တၫ်အီတဖၣ်, ဘၣ်တၫ်မၤထူၣ်ဖျဲး ထီၣ်ကွံာ်၀ဲအဂ့ၫ် AA တကပၤ ပာ်ဖျါ၀ဲလၢတၫ်အုၣ်ကီၤတဖၣ်လီၤ.
ရခၢၣ်သုးမုၫ်ဒိၣ် AA တကပၤ လၢရခၢၣ်ကီၫ်စဲၣ်ပူၤ ကလုာ်(လူမျိုး), တၫ်ဘူၣ်တၫ်ဘါ တၫ်စူၣ်တၫ်နာ်(ဘာသာ)န့ၣ် တနီၤဖး၀ဲအဒူၣ်အဆၢဘၣ်အမဲာ်ညါ ကဒီသဒၢန့ၫ်၀ဲခဲလၢာ်အဂ့ၫ် AA သုးရိၣ်မဲခိၣ်ကျၢၫ် (စစ်ဦးစီးချုပ်) ထိမၠးနဲၣ် (ထွန်းမြတ်နိုင်) တဲ၀ဲဒၣ်လၢ အ “X” ပှၤတ၀ၢပှာ်ဘျးစဲလံာ်ကဘျံးပၤအပူၤ ဖဲလါမ့ၤ(၁၈)သီနံၤန့ၣ်လီၤ.
ကီၫ်တရူး(တရူတ်နိုင်ငံ) အတၫ်နုာ်လီၤကျဲၤဃူကျဲၤဖိးအဖီခိၣ် သုးကီၣ်ကးဒီး AA အဘၢၣ်စၢၤ ဖဲအပူၤကွံာ် လါမ့ၤ(၁၅)သီနံၤန့ၣ် ထံၣ်လိာ်တဲသကိးတၫ်ဖဲ တရူးကီၫ်(တရုတ်နိုင်ငံ), ၀့ၫ်ကူၣ်မ့(ကူမင်းမြို့)ဘၣ်ဆၣ် တဒိးန့ၫ်တၫ်အစၢနီတမံၤဘၣ်အသိး, ကီၫ်စဲၣ်ရခၢၣ်ပူၤ တၫ်လီၫ်အါတက့ၫ်န့ၣ် တၫ်ဒုးဆူၣ်ထီၣ် တပယူာ်ဃီန့ၣ်လီၤ.
ref:voa
