လါမ့ၤ(၂၀)သီ, ၂၀၂၄နံၣ်
KNLA ဒီး တၫ်ပၢၫ်ဆၢသုးပာ်ဖှိၣ်တဖၣ် မၤန့ၫ်၀ဲကျိချံပှာ်သၣ်အါအါဂီၫ်ဂီၫ်ဖဲ ဖၣ်ပူၣ်ကျိဖးဒိၣ်တၫ်လူၫ်ခိၣ်အဂ့ၫ် တၫ်သ့ၣ်ညါဘၣ်လၢ အဘူးဒီး KNLA ဂံၫ်ခီၣ်ထံးတၫ်ကစီၣ်အအိၣ်န့ၣ်လီၤ.
ကျိချံပှာ်သၣ်လၢ KNLA ဒီးတၫ်ပၢၫ်ဆၢသုးပာ်ဖှိၣ်တဖၣ် မၤန့ၫ်ဃာ်၀ဲတဖၣ်အကျါ (၁၂၂)ကျိဖးဒိၣ်(၁)ခိၣ်ပာ်ဃုာ်၀ဲဒီး မ့မ့ၫ်စုက၀ဲၤတၫ်ပီးတၫ်လီတနီၤ တၫ်သူအီၤသုတန့ၫ်တဂ့ၤအဂီၫ် သုးကီၣ်ကးအပှၤသုးဖိတဖၣ် မၤဟးဂီၤကွံာ်ဃာ်၀ဲအဂ့ၫ် စံး၀ဲန့ၣ်လီၤ.
ဖဲလါမ့ၤ(၁၂)သီအနံၤန့ၣ် KNLA ဒီးတၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤပျီကွံာ် ဖၣ်ပူၣ်ကျိဖးဒိၣ်တၫ်လူၫ်ခိၣ်၀ံၤအလီၫ်ခံ သုးကီၣ်ကးတပၤဟဲတ့ၫ်လီၤမ့ၣ်ပိၫ်ဆူၣ်ဆူၣ်ကလၢာ်အဃိ တၫ်ပၢၫ်ဆၢသုးပာ်ဖှိၣ်တဖၣ် ဘၣ်ဂုၤက့ၤအခံတစိၤတလီၫ်အဂ့ၫ် တၫ်သ့ၣ်ညါဘၣ်န့ၣ်လီၤ.
တၫ်ပၢၫ်ဆၢသုးပာ်ဖှိၣ်တဖၣ် စးထီၣ် ထီၣ်ဒုး၀ဲဖၣ်ပူၣ်ကျိဖးဒိၣ်တၫ်လူၫ်ခိၣ်အံၤ ဖဲလါမ့ၤ(၁၀)သီအနံၤဟါအဆၢကတီၫ်အဂ့ၫ် တၫ်သ့ၣ်ညါဘၣ်န့ၣ်လီၤ.
လၢန့ၣ်အမဲာ်ညါ တၫ်ပၢၫ်ဆၢသုးပာ်ဖှိၣ်တဖၣ် မၤန့ၫ်စ့ၫ်ကီး စုက၀ဲၤတၫ်ပီးတၫ်လီတနီၤ ဖဲ၀့ၫ်ဖၣ်ပူၣ် သုးကီၣ်ကး (ခလရ-၃၄၀)သုးကလၢၤအဂ့ၫ် တၫ်သ့ၣ်ညါဘၣ်န့ၣ်လီၤ.
တၫ်ပၢၫ်ဆၢသုးပာ်ဖှိၣ်တဖၣ် ထီၣ်ဒုးမၤန့ၫ်ဃာ်၀ဲ (ခလရ-၃၄၀)သုးကလၢၤတ၀ၣ်ဃၣ်ဃၣ်၀ံၤ သုးကီၣ်ကးတပၤဟဲခးလီၤတၫ်လၢကလံၤကျါဆူၣ်ဆူၣ်ကလၢာ်အဂ့ၫ် တၫ်သ့ၣ်ညါဘၣ်န့ၣ်လီၤ.
ref:salweenpress
