လါမ့ၤ(၂၀)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၣ်ဂံၫ်(၃), ကီၫ်ရ့ၣ်ချၢၣ်လွံၫ်ထူၣ်(ညောင်လေးပင်ခရိုင်), ကီၫ်ဆၣ်ဆီထံး(ရွှေကျင်မြို့နယ်)ဟီၣ်က၀ီၤအပူၤ သုးကီၣ်ကးအသုး ခးလီၤကျိဖးဒိၣ်အဃိ ကမျၢၫ်ဖိသံ၀ဲ(၁)ဂၤ၀ံၤ (၁)ဂၤဘၣ်ဒိ၀ဲအဂ့ၫ် ခ့ၣ်အဲၣ်ယူၣ်-လီၫ်ခၢၣ်သးဘိးဘၣ်ပာ်ဖျါဃာ်၀ဲဖဲ လါမ့ၤ(၁၉)သီအနံၤန့ၣ်လီၤ.
ဖဲလါမ့ၤ(၁၆)သီအနံၤ, ဟါ(၉း၄၅)နၣ်ရံၣ်အဆၢကတီၫ် သုးကီၣ်ကး အသုးနီၣ်ဂံၫ်(၂၀) ခးလီၤ(၈၁-မမ)ကျိဖးဒိၣ်ဆူ ကီၫ်ဆၣ်ဆီထံး(ရွှေကျင်မြို့နယ်), ယ့ၣ်ဖၠူၣ်ကၣ်သ၀ီ(ရေဖြူကန်ရွာ)ပူၤအဃိ ယ့ၣ်ဖၠူၣ်ကၣ်သ၀ီဖိလၢအမ့ၫ် အူမၠးသ့(ဦးမြတ်သိန်း), သးနံၣ်(၇၂)နံၣ် ကျိဖးဒိၣ်ဘၣ်ဒီးသံ၀ဲအဂ့ၫ် ပာ်ဖျါဃာ်၀ဲန့ၣ်လီၤ.
တနံၤဃီဖဲ ဟါ(၁၀း၃၀)ဘျဲၣ်အဆၢကတီၫ် သုးကီၣ်ကး ဆီထံးသုးတၫ်တိာ်ကူၣ်ခိၣ်သ့ၣ်ခးလီၤ(၁၂၀-မမ)ကျိဖးဒိၣ်ဆူ ကၠိတဲစူးသဝီပူၤ(ကျွန်းတဲစုရွာ)အဃိ လီၫ်က၀ီၤဖိ သးနံၣ်(၆၈)နံၣ် အူ၀့တ့ၣ်(ဦးဝင်းတင်) ကျိဖးဒိၣ်ဘၣ်အီၤ၀ံၤ ဘၣ်ဒိ၀ဲနးနးကလၢာ်န့ၣ်လီၤ.
လၢန့ၣ်အမဲာ်ညါ သုးကီၣ်ကး ခီၣ်ချ့သုး(ခမရ-၂၆၄) ခးလီၤ(၁၂၀-မမ)ကျိဖးဒိၣ်အဃိ ကျိဖးဒိၣ်လဲၤလီၤတဲာ်၀ဲဒၣ်ဖဲ ညီၣ်ပ့ၣ်ကၠံသ၀ီသီ(၂)ဖျၢၣ်ဒီး ကၠီးတါသ၀ီအကပၤ(၂)ဖျၢၣ်အဂ့ၫ် စံး၀ဲန့ၣ်လီၤ.
ဖဲအပူၤကွံာ် လါမ့ၤ(၁၄)သီအနံၤ, ဟါ(၁၀း၅၃)နၣ်ရံၣ်အဆၢကတီၫ် ၀့ၫ်ပ့စလိး(ပိန်းဇလုပ်မြို့) သုးကီၣ်ကးအသုး(ခလရ-၂၆၄)သုးရ့ၣ် ခးလီၤ(၁၂၀-မမ)ကျိဖးဒိၣ်(၂)ဖျၢၣ်ဆူ ကၠ့းကွ့သ၀ီ(ကြိတ်ကွင်းရွာ)ပူၤအဃိ နီၫ်အ့ထွ့သးနံၣ်(၃၅)နံၣ် ဘၣ်ဒိ၀ဲဆံၣ်ဒၢခိၣ်အဂ့ၫ် ကီၫ်ဆၣ်လၢၫ်ဒိၣ်ပှၤဘၣ်မူဘၣ်ဒါစံး၀ဲန့ၣ်လီၤ.
၂၀၂၄နံၣ်, စးထီၣ်လၢလါယနူၤအါရံၤဒီးတုၤလၢလါမးရှးအတီၫ်ပူၤ သုးကီၣ်ကးကလံၤကျါတၫ်ဒုးဒီးကျိဖးဒိၣ်တဖၣ်အဃိ ပှၤသံခဲလၢာ်ပာ်ဖှိၣ်(၃၉၇)ဂၤအိၣ်၀ဲ၀ံၤ (၈၈၉)ဂၤဘၣ်ဒိ၀ဲအဂ့ၫ် RFA အတၫ်မၤနီၣ်အဖီခိၣ် ပာ်ဖျါဃာ်၀ဲန့ၣ်လီၤ.
photo:KNU
