လါမ့ၤ(၁၁)သီ, ၂၀၂၄နံၣ်
၂၀၂၄နံၣ်, လါမ့ၤ(၁၁)သီအနံၤ, (၄)နၣ်ရံၣ်အဆၢကတီၫ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ဒူသထူၣ်, ကီၫ်ဆၣ်တီၣ်ပူၤ(ဘီးလင်းမြို့နယ်), ၀့ၫ်တကူၣ်-မီၣ်လမၠဲၣ်ကျဲမုၫ်ဖးဒိၣ်အဖီခိၣ် ကၠိၣ်အ့းတိၤအံၤ တၫ်ပၢၫ်ဆၢသုးပာ်ဖှိၣ်တဖၣ်လဲၤထုးအီၤလၢမ့ၣ်ပိၫ်အဃိ တိၤဟးဂီၤကွံာ်ဒီတဘိအဂ့ၫ် တၫ်သ့ၣ်ညါဘၣ်လၢသုးဂ့ၫ်၀ီ ပှၤဘၣ်မူဘၣ်ဒါတဖၣ်အအိၣ်န့ၣ်လီၤ.
“လၢတပၤ လဲၤထုးအီၤလၢမ့ၣ်ပိၫ်န့ၣ်မ့ၫ်လီၤ. အပူၤကွံာ်တၫ်လဲၤထုးအီၤကၫ်ဒၣ်တပၤလီၤ. အခဲအံၤကၫ်ကွံာ်ခံကပၤလၢာ်ဒီးတၫ်လ့ၣ်လိၤဟးထီၣ်တန့ၫ်လၢာ်ဘၣ်” အဂ့ၫ် အ၀ဲစံး၀ဲန့ၣ်လီၤ. ကျဲအကျိၤတဖၣ် မ့ၫ်သုးကီၣ်ကး တၫ်တိစၢၤမၤစၢၤကျဲတဖၣ်အဃိ တၫ်ဒီၣ်တဲာ်ကွံာ်၀ဲအဂ့ၫ် စံး၀ဲန့ၣ်လီၤ.
“ကတီၫ်ခဲအံၤ သုးကီၣ်ကးဒီး ကမျၢၫ်န့ၣ် တၫ်နီၤဖးအီၤ တသ့လၢာ်ဘၣ်. တၫ်လ့ၣ်လိၤဟးထီၣ်လၢ ကမျၢၫ်အကူအကၤလီၤ. ပှၤသုးဖိတဖၣ်, သုးတၫ်ပီးတၫ်လီ ကျိချံပှာ်သၣ်တဖၣ်(စစ်ပစ္စည်းလက်နက်ခဲယမ်းများ) တၫ်တီၣ်အီၤလၢကမျၢၫ်သိလ့ၣ်လီၤ. သိၣ်လ့ၣ်ဖးဒိၣ်တခီ တၫ်မၤဘၢအီၤ၀ံၤ တၫ်တီၣ်အီၤအဂ့ၫ် တၫ်သ့ၣ်ညါဘၣ်လီၤ. ခီဖျိလၢကမျၢၫ်သိလ့ၣ်အဃိတၫ်ကမၤအီၤတညီဘၣ် ဘၣ်ယိၣ်လၢကမၤကမၣ်ဘၣ်တၫ်” အဂ့ၫ် သုးဂ့ၫ်၀ီပှၤဘၣ်မူဘၣ်ဒါစံး၀ဲန့ၣ်လီၤ.
တၫ်ဒီၣ်တဲာ်ကွံာ်သုးကီၣ်ကး တၫ်တိစၢၤမၤစၢၤကျဲအကျိၤတဖၣ်န့ၣ် မ့ၫ်ဒ်သိး သုးကီၣ်ကး ကဆှၢထီၣ်ဆှၢလီၤ သုးတၫ်ပီးတၫ်လီကျိချံပှာ်သၣ်တဖၣ် သုတန့ၫ်အီၤအဂ့ၫ် စံး၀ဲန့ၣ်လီၤ.
ref:salweenpress
