လါမ့ၤ(၁၁)သီ, ၂၀၂၄နံၣ်
ဖဲ၂၀၂၄နံၣ်, လါမ့ၤ(၁၀)သီအနံၤ တၫ်ဒုးကဲထီၣ်သးဖဲ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ဒူပျာ်ယာ်, ကီၫ်ဆၣ်နိၣ်တကီ(ကြာအင်းဆိပ်ကြီးမြို့နယ်), ၀့ၫ်ဃိၣ်သၢဖျၢၣ်(ဘုရားသုံးဆူမြို့)ပူၤအဃိ ကီၫ်ပယီၤလီၫ်က၀ီၤကမျၢၫ်(၁၀၀)ဘျဲၣ် လဲၤဃ့ၫ်ခီဆူ ကီၫ်ကၠီၣ်တဲၣ်တပၤအဂ့ၫ် Bangkok Post တၫ်ကစီၣ်သန့ပာ်ဖျါဃာ်၀ဲန့ၣ်လီၤ.
လါမ့ၤ(၁၀)သီအနံၤ, မုၫ်ဃ့ၫ်လီၤ(၁)နၣ်ရံၣ်အဆၢကတီၫ် ကျိဖးဒိၣ်ဒီး မ့ၣ်ပိၫ်ကလုၫ်(မီးခိုး)တဖၣ် တၫ်နၫ်ဟူဘၣ်လၢ ကၠီၣ်တဲၣ်ကီၫ်ဆၢ၀ံၤ တၫ်ထံၣ်ဘၣ်၀ဲ မ့ၣ်အူလုၫ်တဖၣ်ထီၣ်၀ဲအဂ့ၫ် စံး၀ဲန့ၣ်လီၤ.
သုးကီၣ်ကး ခီၣ်ချ့သုးရ့ၣ်(ခလရ-၂၈၄) လၢအိၣ်ဆီလီၤအသး ဖဲဃိၣ်သၢဖျၢၣ်(ဘုရားသုံးဆူမြို့)အပူၤ တၫ်ဒုးတဖၣ်ကဲထီၣ်သးအဂ့ၫ် လီၫ်က၀ီၤတၫ်ကစီၣ်တဖၣ်ပာ်ဖျါဃာ်၀ဲန့ၣ်လီၤ.
တၫ်ဒုးကဲထီၣ်သးလၢ (၄၀)မံးနံးအဆၢကတီၫ်၀ံၤ ပှၤလဲၤဃ့ၫ်ခီတဖၣ်အကျါ ဖိသၣ်တဖၣ်ဒီး သူၣ်က့သးပှၫ်တဖၣ် ပာ်ဃုာ်၀ဲအဂ့ၫ် တဲ၀ဲန့ၣ်လီၤ.
ကီၫ်ကၠီၣ်တဲၣ် စၣ်ခလးဘူၣ်ရံၣ်ပၢၤကီၫ်ခိၣ်(စန်ခလဘူရီ ရဲချုပ်) ဒီးကၠီၣ်တဲၣ်သုးခိးကီၫ်ဆၢခိၣ်နၫ်တဖၣ် ပာ်ဖှိၣ်ထီၣ်၀ဲ ပၢၤကီၫ်ဒီးသုးတဖၣ်၀ံၤ တၫ်အိၣ်ခိးကွၫ်ကီၫ်ဆၢတၫ်အိၣ်သးတဖၣ်၀ံၤ ရဲၣ်ကျဲၤန့ၫ်၀ဲ ပှၤလဲၤဃ့ၫ်ခီတဖၣ် တၫ်ဘံၣ်တၫ်ဘၢတၫ်အိၣ်သးတဖၣ်န့ၣ်လီၤ.
တၫ်ခးလိာ်သးတဖၣ်ပတုာ်၀ံၤအလီၫ်ခံ ပှၤ(၄၀)ဂၤဃၣ်ဃၣ်က့ၤဃီၤ၀ဲဆူ ကီၫ်ပယီၤတပၤဘၣ်ဆၣ် တၫ်ဘံၣ်တၫ်ဘၢတအိၣ်လီၤတံၫ်လီၤဆဲးဒံးဘၣ်အဃိ ပှၤလၢအိၣ်ကဒုတစိၤတလီၫ်တဖၣ် အိၣ်ဒံး၀ဲန့ၣ်လီၤ.
