လါမ့ၤ(၁၀)သီ, ၂၀၂၄နံၣ်
ကၠီၣ်တဲၣ်ကိတိာ်ခိၣ်ကျၢၫ်လီၫ်လံၤ သဲးဆ့ၣ်ၡ့ၣ်နၣ်၀ဲးထရၣ်(သက်ဆင်ရှာနာဝပ်ထရာ)အံၤ ဖဲအပူၤကွံာ်စှၤသီကတီၫ် လၢဖူးခဲးတၫ်လဲၤတၫ်က့ၤအပူၤ ထံၣ်လိာ်တၢၣ်ပီၣ်တဲသကိးတၫ်ဒီး မလ့ၡါကိတိာ်ခိၣ်ကျၢၫ် အၣ်၀ၣ်အံၣ်ဘရၣ်ဟ့ၣ်(အန်ဝါအီဘရာဟင်)အဂ့ၫ် တၫ်ကစီၣ်ဂံၫ်ထံးတဖၣ် တဲ၀ဲန့ၣ်လီၤ.
တၫ်တၢၣ်ပီၣ်တဲသကိးအပူၤ တၢၣ်ပီၣ်တဲသကိး၀ဲဘၣ်ဃး ကီၫ်ပယီၤထံရူၫ်ကီၫ်သဲး တၫ်ဃံးတၫ်စ့ၫ်တဖၣ် တကးဘၣ် ကၠီၣ်တဲၣ်ကလံၤထံးဟီၣ်က၀ီၤအပူၤ ပှၤပူထီၣ်တၫ်ဖိဂ့ၫ်၀ီတဖၣ်စ့ၫ်ကီးပာ်ဃုာ်အဂ့ၫ် တၫ်ကစီၣ်ဂံၫ်ထံးတဖၣ် စံး၀ဲန့ၣ်လီၤ.
ဖၠူၣ်ထဲပၣ်တံၣ်(ဖြူထိုင်းပါတီ) တဖိးသဲစးအခိၣ် သဲးဆ့ၣ်အံၤ ဖဲလါအ့ဖြ့ၣ်(၂၉)သီအနံၤန့ၣ် လဲၤတုၤ၀ဲဖဲ ဖူခဲးဒီး လါမ့ၤ(၂)သီအနံၤန့ၣ် က့ၤဟးထီၣ်၀ဲ၀ံၤ တဲ၀ဲလၢဟံးန့ၫ်တၫ်အိၣ်ဘှံးလီၤဆီဘၣ်ဆၣ် လၢအ၀ဲတၫ်ပညိၣ်နီၫ်နီၫ်အဖီခိၣ် တၫ်သံကွၫ်တဖၣ်အိၣ်ထီၣ်၀ဲန့ၣ်လီၤ.
သဲးဆ့ၣ်ဒီး မလ့ၡါကိတိာ်ခိၣ်ကျၢၫ်အၣ်၀ၣ်အံၤ တၢၣ်ပီၣ်တဲသကိး၀ဲ ကီၫ်ပယီၤပူၤတၫ်ဒုးတၫ်ယၤတဖၣ်ဒီး တၫ်သဘံၣ်သဘုၣ်တဖၣ်၀ံၤ ကၠီၣ်တဲၣ်တခီ လၢတၫ်ဘှါၡဲကီၫ်ပယီၤဂ့ၫ်၀ီအပူၤ တၫ်ကပာ်ဃုာ်ပာ်ဂီၤလၢ အကါဒိၣ်အသနၢၣ်တဖၣ်အဂီၫ် မလ့ၡါကိတိာ်ခိၣ်ကျၢၫ်(မလေးရှားဝန်းကြီးချူပ်) တဲသဆၣ်ထီၣ် သဲးဆ့ၣ်န့ၣ်လီၤ.
သဲးဆ့ၣ်အံၤ ဖဲအပူၤကွံာ် လါအ့ဖြ့ၣ်(၁၃)သီအနံၤစ့ၫ်ကီး ထံၣ်လိာ်သးဒီး ကီၫ်ပယီၤကလုာ်ဒူၣ် တၫ်ပၢၫ်ဆၢကရၢခၢၣ်စးတဖၣ်ဖဲကံၫ်မဲ(ချင်းမိုင်)အဃိ အ၀ဲထံၣ်လိာ်သးဒီး မလ့ၡါကိတိာ်ခိၣ်ကျၢၫ်စ့ၫ်ကီးန့ၣ် ကဘၣ်ထွဲဒီးကီၫ်ပယီၤဂ့ၫ်၀ီလီၤအဂ့ၫ် တၫ်တၢထီၣ်တၢလီၤတဖၣ်အိၣ်ထီၣ်၀ဲန့ၣ်လီၤ.
ဒ်သိး သဲးဆ့ၣ်ထံၣ်လိာ်သးဒီး ကလုာ်ဒူၣ်တၫ်ပၢၫ်ဆၢကရၢတဖၣ်အံၤ မ့ၫ်ဒၣ်အနီၫ်ကစၫ်တၫ်ဂ့ၫ်ဒီး တမ့ၫ်ကၠီၣ်တဲၣ်ပဒိၣ်သနူ(ထိုင်းအစိုးရမူဝါဒ)ဘၣ်အဂ့ၫ် ကၠီၣ်တဲၣ်ထံဂုၤကီၫ်ဂၤကိတိာ် ဂ့ၫ်လိာ်ဃာ်၀ဲန့ၣ်လီၤ.
မလ့ၡါကိတိာ်ခိၣ်ကျၢၫ်ဒီး သဲးဆ့ၣ် အတၫ်ထံၣ်လိာ်သးအပူၤ ကၠီၣ်တဲၣ်ပဒိၣ်ဒီး ကၠီၣ်တဲၣ်ကလံၤထံး ပှၤပူထီၣ်တၫ်ဖိ(သူပုန်)တဖၣ် အဘၢၣ်စၢၤ တၫ်မုာ်တၫ်ခုၣ် တၫ်တၢၣ်ပီၣ်တဲသကိး ကအိၣ်ထီၣ်အဂီၫ် ကနုာ်လီၤမၤဘၣ်လိာ်ဖိးဒ့ လၢတၫ်ဘၢၣ်စၢၤအဂီၫ် အၣ်၀ၣ်တဲလီၤ၀ဲအဂ့ၫ် တၫ်ကစီၣ်ဂံၫ်ထံးတဖၣ်စံး၀ဲန့ၣ်လီၤ.
ref:bangkokpost
