လါမ့ၤ(၉)သီ, ၂၀၂၄နံၣ်
စးထီၣ်လၢ သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤအလီၫ်ခံ ကီၫ်ရ့ၣ်ချၢၣ်လွံၫ်ထူၣ်, ကီၫ်ဆၣ်(၃)ဘ့ၣ်စလၢာ်အပူၤ သုးကီၣ်ကးတပၤ မၤကမၣ်ပှၤဟီၣ်ခိၣ်ဖိခွဲးယာ်တဖၣ် အိၣ်ထီၣ်၀ဲကိးမုၫ်နံၤဃၣ်ဃၣ်န့ၣ်လီၤ.
ဖဲ ၂၀၂၄နံၣ်, လါမ့ၤ(၇)သီအနံၤ, ဟါ(၅း၃၀)နၣ်ရံၣ်အဆၢကတီၫ် သုးကီၣ်ကး အသုး(ခလရ-၂၆၄)လၢ အိၣ်ဆီလီၤအသးဖဲ၀့ၫ်ပ့စလိး (ပိန်းဇလုတ်) ခးလီၤဟီး၀့ၣ်စၣ်ဒီး မျိာ်သၣ်ယူၤ(ရှော့တိုက်ဒုံး) အဖျၢၣ်(၁၀)ဆူ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ချၢၣ်လွံၫ်ထူၣ်, ကီၫ်ဆၣ်လၢၫ်ဒိၣ်, ပဒဲကီသ၀ီ(ပဒဲကောရွာ)ပူၤအဃိ နီၫ်မိၫ်လါအဲၣ် သးနံၣ်(၁၆)နံၣ်တဂၤဘၣ်ဒိ၀ဲန့ၣ်လီၤ.
လါမ့ၤ(၈)သီအနံၤ, (၁၁)နၣ်ရံၣ်ဒီး (၁၂)နၣ်ရံၣ်အဘၢၣ်စၢၤစ့ၫ်ကီး သုးကီၣ်ကး အသုး(ခလရ-၂၆၄) ခးလီၤကဒီး (၁၅၅-မမ)ကျိဖးဒိၣ် (၅)ဖျၢၣ်, (၁၂၂-မမ) (၂)ဖျၢၣ်ဆူ ကီၫ်ဆၣ်လၢၫ်ဒိၣ်ဟီၣ်က၀ီၤပူၤအဃိ လဲၤလီၤတဲာ်၀ဲဒၣ်ဖဲ ၡါစူးသ၀ီ (ရှမ်းစုရွာ)ဒီး ငဖဲၣ်အ့သ၀ီတိၤအကပၤ(ငဖယ်အင်းရွာအနီး) န့ၣ်လီၤ.
ဒ်န့ၣ်အသိး တနံၤအံၤလါမ့ၤ(၉)သီအနံၤ, (၆)နၣ်ရံၣ်အဆၢကတီၫ် ကီၫ်ဆၣ်လၢၫ်ဒိၣ်, နိၣ်ထိးအ့ၣ်သ၀ီဖိ(သမင်အင်းကုန်းရွာသား)တဂၤ က့ၤဆူသ၀ီပူၤအဆၢကတီၫ် ယီၫ်ဘၣ်သုးကီၣ်ကး ဒိးလီၤဃာ်မ့ၣ်ပိၫ်အဃိ ဘၣ်ဒိသံကွံာ်၀ဲဒီး ကျီၫ်တဒုစ့ၫ်ကီးသံ၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
“ယီၫ်ဘၣ် ဒုၣ်ဒါဒိးလီၤမ့ၣ်ပိၫ်လီၤ. လၢအပူၤကွံာ် တၫ်စူၤခါတၫ်ဒုးကဲထီၣ်သးကတီၫ် ဒုၣ်ဒါဒိးတ့ၫ်၀ဲမ့ၣ်ပိၫ်လီၤ. ကမျၢၫ်ဖိက့ၤလၢအသ၀ီလီၤဘၣ်မ့ၣ်ပိၫ်” အဂ့ၫ် လၢၫ်ဒိၣ်ကီၫ်ဆၣ်ပှၤဘၣ်မူဘၣ်ဒါ တဲ၀ဲန့ၣ်လီၤ.
