လါမ့ၤ(၈)သီ, ၂၀၂၄နံၣ်
ကီၫ်ကရ့ၣ်နံၣ်, ၀့ၫ်ဖၣ်ဆီ(ဖားဆောင်း) တလါအတီၫ်ပူၤ တၫ်ဒုးလၢအကဲထီၣ်တဖၣ်အပူၤ သုးကီၣ်ကးတပၤ သုးရ့ၣ်ခိၣ်, သုးရ့ၣ်ခိၣ်ခံပာ်ဃုာ်(၅၆)ဂၤ ဟဲဟ့ၣ်လီၤအသး၀ံၤ တၫ်မၤန့ၫ်စ့ၫ်ကီး ကျိဖးဒိၣ်, စုက၀ဲၤအလၢအပှဲၤ(၇၀)ဘျဲၣ် ဒီးကျိချံပှာ်သၣ်တဖၣ်အဂ့ၫ် ကရ့ၣ်နံၣ်ဒီကလုာ်တၫ်ဒီသဒၢသုး (KNDF) ထုးထီၣ်ပာ်ဖျါဃာ်၀ဲဖဲ လါမ့ၤ(၆)သီအနံၤန့ၣ်လီၤ.
လါအ့ဖြ့ၣ်အတီၫ်ပူၤ ကရ့ၣ်နံၣ်တၫ်ပၢၫ်သုးပာ်ဖှိၣ်တဖၣ် လဲၤမၤ၀ဲဒုးယၤရဲၣ်ကျဲၤ ဖဲသုးကီၣ်ကးခီၣ်ချ့သုးရ့ၣ်(ခလရ-၁၃၅) လၢအိၣ်ဆီလီၤအသး ဖဲ၀့ၫ်ဖၣ်ဆီဒီး တၫ်မၤပံာ်မ့ၣ်အူ၀ဲၤဒၢး, သုးကီၣ်ကး အသုးလၢအိၣ်ဆီလီၤအသးဖဲ သီခါဖၠၣ်အပူၤတဖၣ်အဃိ ခံခီယၫ်ဘးတၫ်ကွၫ်ဆၢၣ်မဲာ် တၫ်ဒုးတဖၣ်အိၣ်ထီၣ်၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
၀့ၫ်ဖၣ်ဆီတၫ်ဒုးအပူၤ သုးကီၣ်ကး အသုးတဖၣ် တၫ်ဘၣ်ဒိဘၣ်ထံးအါအဃိ တၫ်ကဟဲမၤစၢၤအဂီၫ် သုးကီၣ်ကး အသုးအဂံၫ်အဘါ(၁၀၀)ဘျဲၣ်အိၣ် (ခီၣ်ချ့သုးရ့ၣ်-ခမရ ၅၁၆, ခမရ ၅၁၅, ခလရ ၁, ခလရ ၁၃၅) လၢဟဲထီၣ်၀ဲဖဲ ဘီလခဲ(ဘောလခဲ)တပၤကတီၫ် ဖဲလါအ့ဖြ့ၣ်(၁၁)သီအနံၤ, စးထီၣ်လၢဂီၤအဆၢကတီၫ်ဒီး တုၤဟါလီၤခီကတီၫ် တၫ်လဲၤဒီၣ်တဲာ်ဒုး(ဖြတ်တောက်တိုက်ခိုက်)အီၤအဃိ သုးကီၣ်ကး အပှၤသုးဖိ(၅၀)ဂၤဘျဲၣ်သံ၀ဲ၀ံၤ သုးရ့ၣ်ခိၣ်, သုးရ့ၣ်ခိၣ်ခံပာ်ဃုာ် (၅၆)ဂၤ ဟဲဟ့ၣ်လီၤအသးဃုာ်ဒီး စုက၀ဲၤတဖၣ်အဂ့ၫ် KNDF စံး၀ဲန့ၣ်လီၤ.
တကးဒံးဘၣ် စးထီၣ်ဖဲလါအ့ဖြ့ၣ်(၃)သီအနံၤန့ၣ် KNDF ဒီး သုးပာ်ဖှိၣ်တဖၣ် လဲၤထီၣ်ဒုး၀ဲ ၀့ၫ်မိဘၠဲအိၣ်သူလီၤ(မိုးဗြဲမြို့အခြေစိုက်) (ခမရ ၄၂၂)အဂ့ၫ် သုးကီၣ်ကး အသုးလၢအိၣ်ဆီလီၤအသးဖဲ လွဲၫ်ကီၫ်, ဒံမီဆိၣ်, ဖဲၣ်ခိၣ်တဖၣ်စ့ၫ်ကီး ခးစၢၤ၀ဲလၢကျိဖးဒိၣ်တပယုာ်ဒီး သုးကီၣ်ကးအကဘီယူၤ က့ၤခးလီၤတၫ်လၢ (၄၂၂)သုးရ့ၣ်အပူၤအိၣ်၀ဲအဂ့ၫ် ပာ်ဖျါဃာ်၀ဲန့ၣ်လီၤ.
လၢန့ၣ်အမဲာ်ညါ သုးကီၣ်ကးတပၤ ဟဲထီၣ်သုးကျိၤ၀ံၤ ဂုာ်ကျဲးစၢးဟံးက့ၤ၀ဲတၫ်လီၫ်တနီၤဘၣ်ဆၣ် တၫ်ပၢၫ်ဆၢသုးတဖၣ် ဒုးက့ၤအီၤအဃိ တၫ်လီၫ်လၢအရ့ဒိၣ်တဖၣ် ဘၣ်ပျၫ်ကဒါက့ၤအီၤ တအိၣ်၀ဲဘၣ်အဂ့ၫ် KNDF ဒုးသ့ၣ်ညါဃာ်၀ဲန့ၣ်လီၤ.
လါအ့ဖြ့ၣ်အတီၫ်ပူၤ သုးကီၣ်ကးတပၤ ဟဲတ့ၫ်လီၤမ့ၣ်ပိၫ်လၢကလံၤကျါအဃိ ဖိသၣ်တဖၣ်ပာ်ဃုာ် လီၫ်က၀ီၤကမျၢၣ်(၁၀)ဂၤသံ၀ဲ၀ံၤ တစှၤန့ၣ်(၃၀)ဂၤဘၣ်ဒိ၀ဲဒီး သုးကီၣ်ကး ဖီၣ်န့ၫ်ဆူၣ်မၤသံကွံာ်အီၤအဃိ လီၫ်က၀ီၤကမျၢၫ်(၅)ဂၤ သံ၀ဲအဂ့ၫ်စ့ၫ်ကီး ပာ်ဖျါဃာ်၀ဲန့ၣ်လီၤ.
photo:KNDF
