လါမ့ၤ(၈)သီ, ၂၀၂၄နံၣ်
ထံဂုၤကီၫ်ဂၤတၫ်ဖံးတၫ်မၤ တၫ်ကိးလံာ်တၫ်မၤအသီ(အလုပ်ခေါ်စာအသစ်)အပူၤ ဘၣ်ထွဲတၫ်ပတုာ်ကွံာ်ဃာ် ပိာ်ခွါအတၫ်လဲၤဖံးလဲၤမၤလၢ ထံဂုၤကီၫ်ဂၤတၫ်ဂ့ၫ် တၫ်ပဲာ်အၢပဲာ်သီအိၣ်ထီၣ်၀ံၤအလီၫ်ခံ ပှၤမၤတၫ်ဖိ၀ဲၤကျိၤ (အလုပ်သမား ဝန်ကြီးဌာန) တကပၤ မၤလီၤကဆှၣ်န့ၫ်၀ဲ တနီၤအဂ့ၫ် တၫ်သ့ၣ်ညါဘၣ်လီၤ.
တၫ်န့ၣ်အဃိ ပိာ်ခွါခဲလၢာ် တၫ်ကိးလံာ် တၫ်မၤအသီဒီး တၫ်ကလဲၤဖံးလဲၤမၤ လၢထံဂုၤကီၫ်ဂၤအဂီၫ် တၫ်ခွဲးတၫ်ယာ်တဖၣ် တၫ်တကးတံာ်ကွံာ်လၢၤဘၣ်ဒီး ပာ်ပနီၣ်န့ၫ်၀ဲသးနံၣ်တဖၣ်၀ံၤ မၤလီၤကဆှၣ်န့ၫ်၀ဲလီၤ.
သးနံၣ်(၁၈)နံၣ်တုၤ ၂၃နံၣ် ပိာ်ခွါတဖၣ် တၫ်ဟ့ၣ်ခွဲးလၢ ကလဲၤဖံးလဲၤမၤလၢထံဂုၤကီၫ်ဂၤ ခီဖျိတၫ်ကိးလံာ် တၫ်မၤအသီအဖီခိၣ်၀ံၤ ပိာ်ခွါသးနံၣ် (၂၃)နံၣ် တုၤ(၃၁)နံၣ်တဖၣ်တခီ တၫ်ပတုာ်ကွံာ် တၫ်ဟးထီၣ်မၤတၫ်လၢ ထံဂုၤကီၫ်ဂၤန့ၣ်လီၤ.
က့ၤမၤကဆှၣ်လီၤတၫ်ဒ်သိးအံၤန့ၣ် တထုးထီၣ်ဘိးဘၣ်ရၤလီၤလံာ်ဘၣ်. Agency တဖၣ်တဲဘၣ်ကဒါက့ၤ၀ဲမးဒီး တၫ်သ့ၣ်ညါဘၣ်လီၤ. ဖဲပတုာ်ကွံာ်၀ဲတစိၤတလီၫ်အကတီၫ်စ့ၫ်ကီး တထုးထီၣ်လံာ်ဘၣ်. ပှၤလၢသးနံၣ်အိၣ်(၃၁)နံၣ် ဆူအဖီခိၣ်တဖၣ်တခီ ကဒိးန့ၫ်ဘၣ်တၫ်ခွဲးတၫ်ယာ်ဧါန့ၣ် တၫ်မ့ၫ်သံကွၫ် ပှၤမၤတၫ်ဖိ၀ဲၤကျိၤမးဒီး တၫ်ကသ့ၣ်ညါဘၣ်အဂ့ၫ် ကီၫ်ပယီၤထံဂုၤကီၫ်ဂၤတၫ်မၤကစၫ်ကရၢ (မြန်မာနိုင်ငံပြည်ပအလုပ်အကိုင်ဝန် ဆောင်မှုလုပ်ငန်းရှင်များအဖွဲ့) ပှၤဘၣ်မူဘၣ်ဒါတဂၤတဲ၀ဲလီၤ.
ပိာ်ခွါ တၫ်ကိးလံာ်တၫ်မၤအသီဒီး တၫ်ဃုဖံးဃုမၤလၢထံဂုၤကီၫ်ဂၤ အခွဲးတဖၣ် သးနံၣ်အဖီခိၣ် တၫ်ဟ့ၣ်ခွဲးဘၣ်ဆၣ် သးနံၣ်လၢ တၫ်ဟ့ၣ်ခွဲးတဖၣ် လဲၤဖံးလဲၤမၤလၢထံဂုၤကီၫ်ဂၤ အိၣ်စှၤ၀ံၤ မ့မ့ၫ်သးနံၣ်လၢ တၫ်တဟ့ၣ်ခွဲးတဖၣ်တခီ လဲၤဖံးလဲၤမၤလၢ ထံဂုၤကီၫ်ဂၤ အိၣ်အါ၀ဲအဂ့ၫ် တၫ်သ့ၣ်ညါဘၣ်လီၤ.
Demand တၫ်ကိးလံာ်တၫ်မၤအသီဒီး ပိာ်ခွါတဖၣ် တၫ်လဲၤဖံးလဲၤမၤလၢထံဂုၤကီၫ်ဂၤ ခွဲးယာ်တဖၣ် ဖဲလါမ့ၤ(၁)သီနံၤန့ၣ် တၫ်ပတုာ်ကွံာ်တစိၤတလီၫ်အဂ့ၫ် ပှၤမၤတၫ်ဖိ၀ဲၤကျိၤ(အလုပ်သမားဝန်ကြီးဌာန) ဘိးဘၣ်ပာ်ဖျါ၀ဲ၀ံၤ ယံာ်(၇)သီမးဒီး မၤလီၤကဆှၣ်န့ၫ်၀ဲ ဒ်သိးအံၤန့ၣ်လီၤ.
ပိာ်ခွါတဖၣ် ကလဲၤဖံးလဲၤမၤလၢထံဂုၤကီၫ်ဂၤ ခီဖျိတၫ်ကိးလံာ်တၫ်မၤအသီအဖီခိၣ် ဘၣ်မနုၤအဃိ တၫ်ပတုာ်ကွံာ်ဃာ်လဲၣ်န့ၣ် ပှၤမၤတၫ်ဖိ၀ဲၤကျိၤ ထုးထီၣ်ဘိးဘၣ်ရၤလီၤ၀ဲလၢဖိးသဲစးတအိၣ်အသိး လၢက့ၤမၤကဆှၣ်လီၤ၀ဲဒ်သိးအံၤစ့ၫ်ကီး ထုးထီၣ်ဘိးဘၣ်ရၤလီၤလံာ် တအိၣ်နီတမံၤဒံးဘၣ်.
လၢကတီၫ်အံၤ ပိာ်ခွါလၢလဲၤမၤတၫ်လၢထံဂုၤကီၫ်ဂၤတဖၣ်အကျါ သးစၫ်လၢအမံၤအသၣ်အိၣ်လၢ ကမျၢၫ်တၫ်ဘၣ်ကဲသုးစရီ(ပြည်သူ့စစ်မှုထမ်းစာရင်း)ပူၤတဖၣ်ဒီး တၫ်ပာ်ပနီၣ်ဃာ်သးနံၣ်တဖၣ် ပာ်ဃုာ်အဃိ ပှၤမၤတၫ်ဖိ၀ဲၤကျိၤတကပၤ ကးတံာ်ကွံာ် ပိာ်ခွါတဖၣ် တၫ်လဲၤဖံးလဲၤမၤလၢ ထံဂုၤကီၫ်ဂၤအဂ့ၫ် ကီၫ်ပယီၤကမျၢၫ်တဖၣ်တဲ၀ဲလီၤ.
ထံဂုၤကီၫ်ဂၤထံကီၫ်တဖၣ် လၢပှၤကီၫ်ပယီၤဖိ လဲၤဖံးလဲၤမၤ အါကတၢၫ်န့ၣ် မ့ၫ်၀ဲ ကၠီၣ်တဲၣ်(ထိုင်း), မလ့ရှါ (မလ့ရှါ), ကိၣ်ရံယါ(ကိုရီးယား), ယပၣ်(ဂျပန်)ထံကီၫ်တဖၣ်၀ံၤ စ့ၣ်ကဖူၣ်(စင်္ကာပူ), ဒူၣ်ဘဲ(ဒူဘိုင်း)ဒီး ကၣ်တၣ် (ကာတာ) ထံကီၫ်တဖၣ်စ့ၫ်ကီး ပှၤလဲၤဖံးလဲၤမၤအိၣ်၀ဲန့ၣ်လီၤ.
ref:rvom
