လါမ့ၤ(၃)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ဒူပျာ်ယာ်, ၀့ၫ်ကီးတရံးအခိၣ်အဃၢၤဒူသ၀ီတဖၣ်အပူၤ လီၫ်က၀ီၤကမျၢၫ်လၢစံၣ်သုးတဖၣ် ဖဲလါအ့ဖြ့ၣ်(၂၆)သီအနံၤန့ၣ် သုးကီၣ်ကးအသုး ဒုးအိၣ်ဖှိၣ်ရိဖှိၣ်၀ဲဖဲ ကၠၣ်ပါအက၀ီၤ၀ံၤ တၫ်ကဟဲက့ၤဆူဟံၣ်အဂီၫ် ပၢပြးခိၣ်နၫ်(အုပ်ချူပ်ရေးမှူး)တဖၣ်တဲလီၤ၀ဲအဂ့ၫ် လီၫ်က၀ီၤကမျၢၫ်တဖၣ် တဲ၀ဲန့ၣ်လီၤ.
ဘၣ်ဆၣ် တၫ်ဒုးလၢကဲထီၣ်သး(၄)လါဘျဲၣ်အတီၫ်ပူၤ ၀့ၫ်ကီးတရံး, က၀ီၤဒ့(၇)ဘ့ၣ်အပူၤ ဟံၣ်(၆၀၀)ဘျဲၣ်မ့ၣ်အူအီၣ်ကွံာ်၀ဲန့ၣ်လီၤ. သုးကီၣ်ကးကလံၤသုး ခးတၫ်တဖၣ်, ကျိဖးဒိၣ်, တၫ်ဟဲဒုးလၢဒရိ (Drone)တဖၣ်အဃိ မ့ၣ်အူအီၣ်ကွံာ်၀ဲအဂ့ၫ် လီၫ်က၀ီၤကမျၢၫ်တဖၣ် တဲ၀ဲန့ၣ်လီၤ.
တကးဘၣ် ဟံၣ်တဖၣ်စ့ၫ်ကီး တၫ်ဂုၫ်ဆူၣ်ဖျိဆူၣ်ဃာ်၀ဲအဂ့ၫ် ၀့ၫ်ကီးတရံးပိာ်မုၣ်တဂၤစံး၀ဲန့ၣ်လီၤ.
“ကွဲၤဟူဖျါ, တၫ်ခုၣ်ဒၢ, လီတၫ်ဖိတၫ်လံၤတဖၣ်, ဆိၣ်လၣ်(Solar) ဒီး တၫ်ဖိတၫ်လံၤလၢဘၣ်ထွဲဒီး ဆိၣ်လၣ် တၫ်ဖိတၫ်လံၤလၢတၫ်ဆါအီၤန့ၫ်ခဲလၢာ်န့ၣ် ဟံး၀ဲလီၤ. တပၢၤ(အိုးခွက်), လီခီ(ပန်းကန်)တဖၣ်တခီ ဟံး၀ဲဒၣ်ထဲအဂ့ၤနီၫ်နီၫ်လီၤ. မ့မ့ၫ်ယသကိးတဂၤ အဟံၣ်န့ၣ် ဟံး၀ဲခဲလၢာ်လီၤ. တပၢၤ, လီခီ, တၫ်ကူတၫ်ကၤ(အဝတ်အစား)ခဲလၢာ်က့ၤစိာ်၀ဲလီၤ. အိၣ်တ့ၫ်ဒၣ်ထဲဟံၣ်အကိလီၤ. တၫ်တအိၣ်တ့ၫ်နီတမံၤဘၣ်”
တၫ်မၢကမျၢၫ်က့ၤဆူအ၀ဲသ့ၣ်အိၣ်ဆိးလီၫ်ကျဲန့ၣ် မ့ၫ်ဒၣ်တၫ်ကသူအီၤ ဒ်ပှၤကညီတၫ်ဒီသဒၢသိး၀ံၤ တၫ်ကဟံးန့ၫ်တၫ်ဒီသဒၢလီၤအဂ့ၫ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ် KNLA သိၣ်မှံၤသုးပာ်ဖှိၣ်ဘီၣ်သိၣ်၀ါသုးကျိၤ(ကျားဖြူစစ်ကြောင်း) ပှၤဘၣ်မူဘၣ်ဒါစံး၀ဲန့ၣ်လီၤ.
“တၫ်မုာ်တၫ်ခုၣ်တအိၣ်ဟီၣ်က၀ီၤတဖၣ်အပူၤ သုးကီၣ်ကးကိးက့ၤ၀ဲကမျၢၫ်တဖၣ်အံၤန့ၣ် ယထံၣ်လၢ တၫ်မၤကမၣ်တခါလီၤ. ယထံၣ်လၢအ၀ဲသ့ၣ်န့ၣ် ကသူ၀ဲကမျၢၫ်တဖၣ်ဒ်ပှၤကညီတၫ်ဒီသဒၢအသိး၀ံၤ ကဟံးန့ၫ်၀ဲတၫ်ဒီသဒၢန့ၣ်လီၤ. ဘၣ်မနုအဃိလဲၣ်န့ၣ်လီၫ်က၀ီၤအံၤ တမ့ၫ်အအိၣ်ဒီးတၫ်မုာ်တၫ်ခုၣ်စ့ၫ်ဘၣ်. လီၫ်က၀ီၤအံၤ ကျိပိာ်ဖးထီၣ်သ့ ကိးဆၢကတီၫ်လီၤအဃိ ကမျၢၫ်တဖၣ်တခီ ဆီၣ်ထံကွၫ်ထံမ့ၫ်၀ံၤမး နာ်အီၤအဂ့ၫ် ယအဲၣ်ဒိးတဲလီၤ.
ဖဲလါအ့ဖြ့ၣ်(၃၀)သီအနံၤန့ၣ် ကညီကီၫ်စဲၣ်, သုးကီၣ်ကး ပှၤဘၣ်မူဘၣ်ဒါတဖၣ် ဟဲထံၣ်လိာ်သးဒီး ၀့ၫ်ကီးတရံးပှၤဃ့ၫ်သုးပှၤလီၫ်တမှံၤတဖၣ်, ဟံၣ်ဖိဃီဖိလၢမ့ၣ်အူအီၣ်ကွံာ်အဟံၣ်အဃီတဖၣ်၀ံၤ တဲ၀ဲလၢ တၫ်ကမၤစၢၤဟံၣ်(၁)ဒူၣ်န့ၣ် စ့(၂)ကလီၤကၠးဒီး ဂံၫ်ခီၣ်ထံးတၫ်အီၣ်တၫ်အီတဖၣ်ဘၣ်ဆၣ် တုၤလၢလါမ့ၤ(၂)သီအနံၤန့ၣ် တၫ်တဟဲဟ့ၣ်၀ဲဒံးဘၣ်အဂ့ၫ် ၀့ၫ်ကီးတရံးကမျၢၫ်လၢ တအဲၣ်ဒိးပာ်ဖျါအမံၤတဂၤ စံး၀ဲန့ၣ်လီၤ.
“ကီးတရံးပူၤ အမံၤစရီ, တၫ်ဘၣ်ဟ့ၣ်၀ဲ ဟံၣ်တၫ်လီၫ်တၫ်ကျဲၤစရီ(အိမ်လိပ်စာစာရင်း)တဖၣ်လီၤ. တၫ်ဟ့ၣ်စရီမ့ၫ်၀ံၤမး အ၀ဲသ့ၣ်ဟံးန့ၫ်စရီလီၤတံၫ်လီၤဆဲးလီၤ. ဟံး၀ဲ၀ံၤအ၀ဲသ့ၣ် က့ၤဟ့ၣ်က့ၤလံာ်ဖှီတဲာ်(ဖြတ်ပိုင်း)လီၤ. ၀ံၤဟ့ၣ်၀ဲစ့ၫ်ကီးတၫ်ဖိတၫ်လံၤတဆံးတက့ၫ်အဂ့ၫ်နၫ်ဟူဘၣ်လီၤ. ယၤတခီယတနာ်အ၀ဲသ့ၣ် နီတစဲးဘၣ်, တဲ၀ဲစ့ၫ်ကီးတၫ်ကဟ့ၣ်စ့လီၤ ဘၣ်ဆၣ်မတၤတဂၤမး တဒိးန့ၫ်ဘၣ်၀ဲဘၣ်”
ဖဲလါအ့ဖြ့ၣ်(၃၀)သီအနံၤ, သုးကီၣ်ကး ကညီကီၫ်စဲၣ်ကိတိာ်ခိၣ်ကျၢၫ် (ကရင်ပြည်နယ်ဝန်ကြီးချုပ်) အူစီၤမၠ့းအူ (ဦးစောမြင့်ဦး) ဒီးပှၤဘၣ်မူဘၣ်ဒါတဖၣ် လဲၤကွၫ်သမံသမိး၀ဲ ၀့ၫ်ကီးတရံးကမျၢၣ်တဖၣ်ဒီး ၀့ၫ်တၫ်ဟးဂုၤဟးဂီၤတၫ်အိၣ်သးတဖၣ်၀ံၤ က့ၤဆူ၀့ၫ်ဖၣ်အၣ် မၠးပတဲၣ်သ၀ီဒီး နီၣ်ထးပၣ်သ၀ီအဘၢၣ်စၢၤ KNLA သိၣ်မှံသုးပာ်ဖှိၣ်တဖၣ် ခိးဒုးအီၤလၢကျဲတီၤအဃိ သုးကီၣ်ကးသိလ့ၣ်ကျိၤအကျါ သိလ့ၣ်(၅)ခိၣ်ဒီး ပှၤမၤတၫ်ဖိတနီၤ ဘၣ်ဒိဘၣ်ထံး၀ဲအဂ့ၫ် KNLA သိၣ်မှံၤသုးပာ်ဖှိၣ်တပၤ စံး၀ဲန့ၣ်လီၤ.
၀့ၫ်ကီးတရံးအချၢ ရၤမတံ-အ့ၡၢကျဲသီဒီး တီနီၣ်ကျဲလီၫ်လံၤအဖီခိၣ် သုးကီၣ်ကး အူအီၣ်စ့ၣ်ယးသုးကျိၤ (ဉီးအောင်ဇေယျာစစ်ကြောင်း)တဖၣ်ဒီး KNLA သိၣ်မှံၤသုးပာ်ဖှိၣ်တဖၣ်အဘၢၣ်စၢၤ တၫ်ဒုးတဖၣ်ကဲထီၣ်၀ံၤ တၫ်ဟဲမၤပှဲၤအါထီၣ်သုးအဂံၫ်အဘါဆူ ၀့ၫ်ရၤမတံတပၤ သုတန့ၫ်အဂီၫ် ခီးဒုးဒီၣ်တဲာ်ကွံာ်၀ဲအဂ့ၫ် KNLA သိၣ်မှံၤသုးပာ်ဖှိၣ်တဖၣ်ထုးထီၣ်ပာ်ဖျါဃာ်၀ဲန့ၣ်လီၤ.
ref:rfa
photo:socialmedia
