လါအ့ဖြ့ၣ်(၃၀)သီ, ၂၀၂၄နံၣ်
သုးကီၣ်ကးသုးဒီး ကညီတၫ်ပၢၫ်ဆၢသုး(ကရင်တော်လှန်ရေးတပ်ဖွဲ့)တဖၣ်အဘၢၣ်စၢၤ သုးဂ့ၫ်၀ီတၫ်သဘံၣ်သဘုၣ်တဖၣ်အဃိ ကၠီၣ်တဲၣ်-ပယီၤ ကီၫ်ဆၢတၫ်ကူၣ်လဲၤမၤကၤ ဘၣ်လီၤ၀ဲတုၤလၢ (၄၀)မျးကယၤညါအဂ့ၫ် ကၠီၣ်တဲၣ် စဲးဖီကဟၣ်တၫ်မၤကစၫ်ကရၢ (FTI) (ထိုင်း စက်မှုလုပ်ငန်းရှင်များအသင်း) တဲ၀ဲလီၤ.
ကၠီၣ်တဲၣ်ဒီး အၣ်စံၣ်ယၣ်ထံကီၫ်လၢအဂၤတဖၣ်တကပၤ ပနံာ်လၢဆှၢနုာ်၀ဲဆူ ကီၫ်ပယီၤပူၤဒီး စဲးသိ(လောင်စာဆီ)တဖၣ် ဘၣ်ခီဂာ်၀ဲ ကျဲဖဲ ကၠီၣ်တဲၣ် တးကီၫ်ရ့ၣ်(တာ့ခ်ခရိုင်), ၀့ၫ်မဲဆီး တဆီ၀ံၤ နုာ်လီၤ၀ဲဒၣ်ဆူ ကီၫ်ပယီၤ ၀့ၫ်ရၤမတံန့ၣ်လီၤ.
ကၠီၣ်တဲၣ်-ပယီၤကီၫ်ဆၢ ထံကီၫ်ခံဘ့ၣ် တၫ်ကူၣ်လဲၤမၤကၤန့ၣ် ကိးမုၫ်နံၣ်ဒဲးအိၣ်၀ဲ (၁၀၀)ဘံၣ်လံၣ်ယၣ် ဘျဲၣ်ညါလီၤ. သုးဂ့ၫ်၀ီတၫ်သဘံၣ်သဘုၣ် မ့ၫ်ယံာ်ထီၣ်န့ၣ် လၢတၫ်ကူၣ်လဲၤမၤကၤတကပၤ တၫ်ဘၣ်ဒိဘၣ်ထံး ဟဲအိၣ်ထီၣ်၀ဲအဂ့ၫ် ကၠီၣ်တဲၣ် စဲးဖီကဟၣ်တၫ်မၤကစၫ်ကရၢ (FTI) အစုတီၤဖီလာ် ကီၫ်ဆၢတၫ်ကူၣ်လဲၤမၤကၤကရၢ ပှၤပၢၤလီၫ်ဆ့ၣ်နီၤ(နယ်စပ်ကုန်သွယ်ရေးအဖွဲ့ဥက္ကဌ) Suriyon Tuchinda တဲ၀ဲလီၤ. ဘၣ်ထွဲဒီးတၫ်ဂ့ၫ်အံၤန့ၣ် သုးကီၣ်ကးဒီး ကလုာ်ဒူၣ်ဖီၣ်စုက၀ဲၤ (တိုင်းရင်းသားလက်နက်ကိုင်)ခံကပၤလၢာ် ကဃုထံၣ်န့ၫ် တၫ်ဘှါဆှဲအကျိၤအကျဲအဂီၫ် မုၫ်လၫ်၀ဲအဂ့ၫ် Suriyon Tuchinda တဲ၀ဲလီၤ.
ကီၫ်ကၠီၣ်တဲၣ် တၫ်ကူၣ်လဲၤမၤကၤ၀ဲၤကျိၤ(ထိုင်းနိုင်ငံကူးသန်းရောင်းဝယ်ရေးဝန်ကြီးဌာန) အတၫ်ပာ်ဖျါအဖီခိၣ် အပူၤကွံာ် လါယနူၤအါရံၤဒီး ဖ့ၤဘြူၤအါရံၣ်အပူၤ ကၠီၣ်တဲၣ် ဆှၢပနံာ်ဆူကီၫ်ပယီၤ အိၣ်ဒၣ်ထဲ ၂၇.၅ ဘံၣ်လံၣ်ယၣ်အဃိ လီၤစှၤဒိၣ်န့ၫ်ဒံးအပူၤကွံာ်နံၣ် (၀.၁၉) မျးကယၤန့ၣ်လီၤ.
ဒံၣ်စဲၣ်သိ(ဒီဇယ်ဆီ)ပာ်ဃုာ် တၫ်ဆှၢနုာ်ပနံာ်လၢအဂၤတဖၣ် အါထီၣ်(၁.၄၉)မျးကယၤဘၣ်ဆၣ် မ့မ့ၫ်တၫ်ဆှၢနုာ် စဲးသိ (လောင်စာဆီ)တခီ လီၤစှၤ၀ဲ(၀.၉၃)မျးကယၤန့ၣ်လီၤ. တၫ်ဆှၢနုာ်တၫ်ဆၢထံအိၣ်၀ဲ(၅.၄၈) မျးကယၤ, ရီဘၢၣ် (ရော် ဘာ)အိၣ်၀ဲ (၁၈.၃)မျးကယၤ, အံသၣ်ဆၢ(၁၇.၈) မျးကယၤဒီး တၫ်သူၣ်တၫ်ဖျးတၫ်ပီးတၫ်လီ အိၣ်၀ဲ(၄.၉၄)မျးကယၤ အဂ့ၫ် လံာ်တၫ်ပာ်ဖျါအပူၤ ပာ်ဖျါ၀ဲလီၤ.
ရၤမတံ(မြ၀တီ)-တးကီၫ်ရ့ၣ်(တာ့ခ်ခရိုင်) ကီၫ်ဆၢတၫ်ကူၣ်လဲၤမၤကၤန့ၣ် မ့ၫ်ကၠီၣ်တဲၣ်-ပယီၤကီၫ်ဆၢ တၫ်ကူၣ်လဲၤမၤကၤ(၅)ခါအကျါ တခါလီၤ. ကၠီၣ်တဲၣ်-ပယီၤကီၫ်ဆၢ ထံကီၫ်ခံဘ့ၣ် တၫ်ကူၣ်လဲၤမၤကၤတၫ်လီၫ်အိၣ်၀ဲ (၇) တီၤဘၣ်ဆၣ် ကၠဲလး(ကျိုင်းလပ်)ဒီး မဲၫ်စဲး(မယ်စဲ့) ကီၫ်ဆၢတၫ်ကူၣ်လဲၤမၤကၤတဖၣ်တခီ လၢ(၂၀၂၀)နံၣ်လံၤလံၤ ဘၣ်တၫ်ပတုာ်ကွံာ်ဃာ်၀ဲ၀ံၤ လၢကတီၫ်အံၤ ကူၣ်လဲၤမၤကၤတၫ်လၢ ကီၫ်ဆၢတၫ်လီၫ်(၅)တီၤလၢအမ့ၫ် တၣ်ခၠံၣ်လ့း (တာချီလိတ်), ရၤမတံ, နဘူလဲၣ် (နဘူးလယ်)/ထံခံ, မီတီၣ်(မောတောင်), ကီးသီ(ကော့သောင်း) တၫ်ကူၣ်လဲၤမၤကၤတၫ်လီၫ်တဖၣ်န့ၣ်လီၤ.
ကီၫ်ပယီၤန့ၣ် လၢကီၫ်ကၠီၣ်တဲၣ်တဆီ တၫ်ကူၣ်လဲၤမၤကၤတကပၤ မလ့ရှါ(မလေးရှား)န့ၣ် ဆှၢနုာ်၀ဲ(၃၁) မျးကယၤ, လၣ်အိၣ်(လာအို) ဆှၢနုာ်၀ဲ(၂၈) မျးကယၤ, ကၣ်ဘီးဒံယါ(ကမ္ဘောဒီးယား)ဆှၢနုာ်၀ဲ(၁၇)မျးကယၤ၀ံၤ ကီၫ်ပယီၤတကပၤ တၫ်ဆှၢနုာ်ပနံာ်တခီ အိၣ်ဒၣ်ထဲ(၂၄) မျးကယၤအဂ့ၫ် ကၠီၣ်တဲၣ် စဲးဖီကဟၣ်တၫ်မၤကစၫ်ကရၢ (FTI) လံာ်တၫ်ပာ်ဖျါအပူၤ ပာ်ဖျါ၀ဲလီၤ.
ကၠီၣ်တဲၣ်-ပယီၤကီၫ်ဆၢ ၀့ၫ်ရၤမတံပူၤ သုးကီၣ်ကးဒီး ကညီဒီကလုာ်တၫ်ထူၣ်ဖျဲးသုးမုၫ်ဒိၣ် -KNLA သိၣ်မှံၤ (ကရင်အမျိုးသားလွတ်မြောက်ရေးတပ်မတော် (KNLA) မဟာမိတ်)တဖၣ် အဘၢၣ်စၢၤ ဖဲတၫ်ဒုးကဲထီၣ်အကတီၫ် ကၠီၣ်တဲၣ်ထံဂုၤကီၫ်ဂၤကိတိာ်(ထိုင်းနိုင်ငံခြားရေးဝန်ကြီး)ပာ်ဃုာ် တၫ်ဒီသဒၢကိတိာ်(ကာကွယ်ရေးဝန်ကြီး)ဒီး ခိၣ်နၫ်ဒိၣ်ထီလၢအဂၤတဖၣ်စ့ၫ်ကီး ဟဲဆူတးကီၫ်ရ့ၣ်(တာ့ခ်ခရိုင်), ၀့ၫ်မဲဆီး(မဲဆောက်မြို့)၀ံၤ တၢၣ်ပီၣ်တဲသကိး၀ဲ ကီၫ်ဆၢတၫ်ဘံၣ်တၫ်ဘၢဂ့ၫ်၀ီတၫ်အိၣ်သး(နယ်စပ်လုံခြုံရေးအခြေအနေ)ဒီး တၫ်ကူၣ်လဲၤမၤကၤပနံာ်တၫ်အိၣ်သး (ကုန်သွယ်ရေး အခြေအနေ)တဖၣ်ဒံးန့ၣ်လီၤ.
ref:burmavj
