လါအ့ဖြ့ၣ်(၂၆)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ချၢၣ်လွံၫ်ထူၣ်, ကီၫ်ဆၣ်မူဟီၣ်က၀ီၤအပူၤ သုးကီၣ်ကးအသုးဖိတဖၣ်လဲၤနုာ်လီၤသုးကျိၤအဆၢကတီၫ် ဒိးလီၤဃာ်၀ဲမ့ၣ်ပိၫ်တဖၣ်အဃိ လီၫ်က၀ီၤကမျၢၫ်လၢဘၣ်ဃ့ၫ်သုးတဖၣ် ယီၫ်ဘၣ်၀ဲဒီး (၆)ဂၤဘၣ်ဒိ၀ဲအဂ့ၫ် ခ့ၣ်အဲၣ်ယူၣ်-လီၫ်ခၢၣ်သးပာ်ဖျါဃာ်၀ဲဖဲမဟါအနံၤန့ၣ်လီၤ.
၂၀၂၄နံၣ်, လါအ့ဖြ့ၣ်(၈)သီအနံၤ စီၤတံသ၀ီဖိ(စောတီးရွာသား) အူ၀့နၢၤ(ဦးဝင်းနိုင်)သးနံၣ်(၅၆)နံၣ်အံၤ က့ၤဃု၀ဲအကျီၫ်ဒီးပနၫ်တၫ်လီၫ်အပူၤ ယီၫ်ဘၣ်၀ဲမ့ၣ်ပိၫ်အဃိ ဘၣ်ဒိ၀ဲန့ၣ်လီၤ.
၂၀၂၄နံၣ်, လါအ့ဖြ့ၣ်(၁၁)အနံၤ, ယ့ၣ်လဲ(ပယီၤ)သ၀ီဖိ အူစီၣ်မ့ထွ့(ဦးဇော်မင်းထွေး) သးနံၣ်(၄၈)နံၣ်အံၤ စံၣ်သုးဒီးက့ၤဟံးတၫ်ဖိတၫ်လံၤလၢသ၀ီပူၤကတီၫ် ယီၫ်ဘၣ်မ့ၣ်ပိၫ်ဒီးဘၣ်ဒိ၀ဲအဂ့ၫ် ပာ်ဖျါဃာ်၀ဲန့ၣ်လီၤ.
၂၀၂၄နံၣ်, လါအ့ဖြ့ၣ်(၁၂)သီအနံၤ, နိၣ်ကူၣ်သ၀ီဖိ(နောင်ကုန်းရွာသား) စီၤဒိဒိၣ်ထူ(စောဒိုးဒိုထူး) သးနံၣ်(၁၉)နံၣ်စ့ၫ်ကီး အိၣ်လၢစံၣ်သုးတၫ်လီၫ်ဒီး က့ၤဟံးတၫ်ဖိတၫ်လံၤဆူအသ၀ီပူၤကတီၫ် ယီၫ်ဘၣ်မ့ၣ်ပိၫ်ဖဲယ့ၣ်လဲသ၀ီ(ရေလဲရွာ)ခိၣ်ထီးအဃိ ဘၣ်ဒိ၀ဲန့ၣ်လီၤ.
၂၀၂၄နံၣ်, လါအ့ဖြ့ၣ်(၁၄)သီအနံၤ, အညၣ်စူး(အညာစု)သ၀ီဖိ အူအ့မၠ့း(ဦးအေးမြင့်) သးနံၣ်(၅၄)နံၣ်စ့ၫ်ကီး က့ၤဃီၤဆူအဟံၣ်ကတီၫ် ယီၫ်ဘၣ်သုးကီၣ်ကး ဒိးလီၤဃာ်မ့ၣ်ပိၫ်အဃိ ဘၣ်ဒိ၀ဲန့ၣ်လီၤ.
၂၀၂၄နံၣ်, လါအ့ဖြ့ၣ်(၂၄)သီအနံၤ, နိၣ်ကလီသ၀ီဖိ(နိုကလောရွာသား) စီၤဆၢန့ၫ်ကီၫ် သးနံၣ်(၂၇)နံၣ်အံၤ တၫ်လဲၤဟံးဟူသးဖဲ ယ့ၣ်လဲသ၀ီ(ရေလဲရွာ)ကျဲကတီၫ် ယီၫ်ဘၣ်မ့ၣ်ပိၫ်ဒီးဘၣ်ဒိ၀ဲအသိး ယ့ၣ်လဲ(ကညီ)သ၀ီဖိစီၤတၫ်ဆံး(စောတာစီ) သးနံၣ်(၃၈)နံၣ်စ့ၫ်ကီး လဲၤဟံးတၫ်အီၣ်တၫ်အီလၢ အဒဲအဆၢကတီၫ် ယီၫ်ဘၣ်မ့ၣ်ပိၫ်ဖဲကျဲတီၤအဃိ ဘၣ်ဒိဘၣ်ထံး၀ဲန့ၣ်လီၤ.
ဒ်န့ၣ်အသိး ဖဲ၂၀၂၄နံၣ်, လါအ့ဖြ့ၣ်(၂၂)သီအနံၤ, ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ကီၫ်ရ့ၣ်ချၢၣ်လွံၫ်ထူၣ်, ကီၫ်ဆၣ်လၢၫ်ဒိၣ်ဟီၣ်က၀ီၤအပူၤစ့ၫ်ကီး သုးကီၣ်ကး ကဘီယူၤဒုးသုး ဟဲတ့ၫ်လီၤမ့ၣ်ပိၫ်(ဂျက်ဖိုက်တာ), ဟဲခးလီၤတၫ်လၢ Helicopter ခဲလၢာ်ပာ်ဖှိၣ်(၆)ဘျီအဃိ လီၫ်က၀ီၤကမျၢၫ်(၂)ဂၤသံ၀ဲ၀ံၤ (၉)ဂၤဘၣ်ဒိ၀ဲအဂ့ၫ် ခ့ၣ်အဲၣ်ယူၣ်-လီၫ်ခၢၣ်သးပာ်ဖျါဃာ်၀ဲ ဖဲလါအ့ဖြ့ၣ်(၂၄)သီအနံၤန့ၣ်လီၤ.
