လါအ့ဖြ့ၣ်(၂၆)သီ, ၂၀၂၄နံၣ်
ဖဲ၂၀၂၄နံၣ်, လါအ့ဖြ့ၣ် ၂၅သီအနံၤ, ဂီၤ(၄)နၣ်ရံၣ်အဆၢကတီၫ် KNLAဒီးသုးပာ်ဖှိၣ်တဖၣ် ထီၣ်ဒုးမၤန့ၫ်၀ဲ သုးကီၣ်ကးအသုးရ့ၣ်လၢအိၣ်ဆီလီၤအသးဖဲ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၅), ကီၫ်ရ့ၣ်မုၫ်တြီၫ်, ဖၣ်ပူၣ်(ဖာပွန်)ဟီၣ်က၀ီၤ (ခမရ-၄၃၄)အဂ့ၫ် ခ့ၣ်အဲၣ်ယူၣ်-မုၫ်တြီၫ်ပာ်ဖျါဃာ်၀ဲန့ၣ်လီၤ.
တၫ်ထီၣ်ဒုးမၤန့ၫ် သုးကီၣ်ကးအသုးကလၢၤအပူၤ တၫ်မၤန့ၫ်စ့ၫ်ကီး ကျိချံပှာ်သၣ်အါအါဂီၫ်ဂီၫ်ဘၣ်ဆၣ် တၫ်ပာ်ဖျါထီၣ်နီၫ်ဂံၫ်နီၫ်ဒွးလီၤတံၫ်လီၤဆဲး တအိၣ်ဒံးဘၣ်န့ၣ်လီၤ.
စးထီၣ်ဖဲလါမးၡး(၂၈)သီအနံၤန့ၣ် KNLAဒီးသုးပာ်ဖှိၣ်တဖၣ် ထီၣ်ဒုးမၤန့ၫ်၀ဲ ၀့ၫ်ဖၣ်ပူၣ်၀ံၤ ပၢဆှၢဃာ်၀ဲန့ၣ်လီၤ. ၀့ၫ်ဖၣ်ပူၣ်အံၤ မ့ၫ်ဟီၣ်က၀ီၤလၢ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၅) ဟူးဂဲၤ၀ဲတၫ်လီၫ်အသိး သုးကီၣ်ကး သုးတၫ်တိာ်ကူၣ်ခိၣ်ကျၢၤ(စစ်ဗျူဟာအခြေစိုက်)(စဗခ)အိၣ်၀ဲတခါ၀ံၤ ခလရ (၁၉)၊ ခမရ (၃၄၀)၊ ခမရ (၃၄၁) ဒီး ခမရ (၄၃၄)သုးရ့ၣ်တဖၣ်အိၣ်၀ဲန့ၣ်လီၤ.
လါမးၡးအတီၫ်ပူၤ သုးကီၣ်ကး ခးကျိဖးဒိၣ်ဒီး ဟဲခးလီၤတၫ်လၢကလံၤကျါအဃိ မိၫ်ဒၢ(၁)ဂၤပာ်ဃုာ် (၉)ဂၤသံ၀ဲအဂ့ၫ် ခ့ၣ်အဲၣ်ယူၣ်-မုၫ်တြီၫ်ပာ်ဖျါဃာ်၀ဲဖဲ လါအ့ဖ့ၣ်(၂)သီအနံၤန့ၣ်လီၤ.
လါမးၡးအတီၫ်ပူၤ တၫ်ဒုးတဖၣ်အဃိ ကီၫ်ရ့ၣ်မုၫ်တြီၫ်အပူၤ လီၫ်က၀ီၤကမျၢၫ် (၁,၆၂၄)ဂၤဘျဲၣ် ဘၣ်ဃ့ၫ်ပူၤဖျဲးသးအဂ့ၫ်စ့ၫ်ကီး ပာ်ဖျါဃာ်၀ဲန့ၣ်လီၤ.
ခံခီခံကပၤတၫ်ဒုးတဖၣ်အပူၤ သုးကီၣ်ကးတပၤ သုးခိၣ်စိ(၂)ဂၤပာ်ဃုာ် (၄၂)ဂၤသံ၀ဲ၀ံၤ (၅၅)ဂၤဘၣ်ဒိ၀ဲအသိး KNLAဒီးသုးပာ်ဖှိၣ်တပၤစ့ၫ်ကီး သံ၀ဲ(၈)ဂၤ၀ံၤ (၁၄)ဂၤဘၣ်ဒိ၀ဲအဂ့ၫ် ပာ်ဖျါဃာ်၀ဲန့ၣ်လီၤ.
