လါအ့ဖြ့ၣ်(၂၆)သီ, ၂၀၂၄နံၣ်
ကီၫ်ကၠီၣ်တဲၣ်ပူၤ တနံၣ်အံၤ တၫ်ကိၫ်ဆူၣ်အဃိ အစှၤကတၢၫ်ပှၤဘၣ်သံအဂၤ(၃၀)လံအဂ့ၫ် ကၠီၣ်တဲၣ်ပဒိၣ်ဟ့ၣ်ပလီၫ် ဘိးဘၣ်ပာ်ဖျါ၀ဲဖဲ လါအ့ဖြ့ၣ်(၂၄)သီနံၤန့ၣ်လီၤ. ပဒိၣ်ပှၤဘၣ်မူဘၣ်ဒါတဖၣ်စ့ၫ်ကီး မုၫ်ဆါတၫ်ကိၫ် ကဆူၣ်ထီၣ်၀ဲ သ့တုၤလၢ(၅၂)ဒံၣ်ကရံၣ် စဲစံယၢး(ဒီဂရီဆဲလ်စီးယပ်)ဆူ အဖီခိၣ်အဂ့ၫ် တဲဟ့ၣ်ပလီၫ်ဃာ်၀ဲလီၤ.
ဖဲလါယနူၤအါရံၤ(၁)သီနံၤတုၤ လါအ့ဖြ့ၣ်(၁၇)သီနံၤ တၫ်ကိၫ်ကလံၤကျိၤအဃိ ပှၤဘၣ်သံအိၣ်လံအဂၤ(၃၀)၀ံၤ ၂၀၂၃နံၣ် ဒီတနံၣ်အပူၤ တၫ်ကိၫ်ကလံၤကျိၤ(အပူလှိုင်းဖြတ်မှု)အဃိ ပှၤဘၣ်သံ(၃၇)ဂၤအဂ့ၫ် ကၠီၣ်တဲၣ်ဆူၣ်ချ့ ၀ဲၤကျိၤ ဘိးဘၣ်ပာ်ဖျါ၀ဲ ဖဲလါအ့ဖြ့ၣ်(၂၄)သီနံၤန့ၣ်လီၤ.
ကၠီၣ်တဲၣ်ဒီး အ့ရှၢၣ်မုၫ်ထီၣ်ကလံၤထံးထံကီၫ်(အရှေ့တောင်အာရှနိုင်ငံ)တဖၣ်ပူၤ လါအ့ဖြ့ၣ်န့ၣ် မ့ၫ်ဒီတနံၣ် အတၫ်ကိၫ်ဒိၣ်ကတၢၫ်၀ံၤ တနံၣ်အံၤမ့ၫ်လၢအဲၣ်နံၣ်ညိၣ်မူခိၣ်ကလံၤသီၣ်ဂီၤ(အယ်နီညိုရာသီဥတု)အဃိ တၫ်ကိၫ်ဆူၣ်ဒိၣ်ထီၣ်၀ဲအဂ့ၫ်တဲ၀ဲလီၤ. ကၠီၣ်တဲၣ်-ပယီၤကီၫ်ဆၢဒီတကျိၤ ဖဲလါအ့ဖြ့ၣ်(၂၄)သီနံၤ တၫ်ကိၫ်သဟီၣ်န့ၣ် ကိၫ်တုၤလၢ (၄၅.၉) ဒံၣ်ကရံၣ်စဲစံယၢး(ဒီဂရီဆဲလ်စီးယပ်)ညါန့ၣ်လီၤ.
ကီၫ်ပယီၤ, မကွ့ကီၫ်ခီ(မကွေးတိုင်း), ၀့ၫ်ခၠီး(ချောက်မြို့)တခီ ဖဲလါအ့ဖြ့ၣ်(၂၄)သီနံၤန့ၣ် မုၫ်ဆါတၫ်ကိၫ်သဟီၣ် (နေ့အပူချိန်) အိၣ်တုၤ (၄၆.၂)ဒံၣ်ကရံၣ် စဲစံးယၢးအဃိ ကဲထီၣ်၀ဲထံကီၫ်ဒီတဘ့ၣ် ၀့ၫ်လၢတၫ်ကိၫ်ဆူၣ်ကတၢၫ်န့ၣ်လီၤ. လၢကီၫ်ပယီၤ စးထီၣဖဲလါအ့ဖြ့ၣ်အပူၤ တၫ်ကိၫ်ဆူၣ်ထီၣ်အဃိ ပှၤသံအိၣ်ဘၣ်ဆၣ် သုးကီၣ်ကးတကပၤ တဘိးဘၣ်ပာ်ဖျါတၫ်လီၤတံၫ်လီၤဆဲးနီတမံၤဘၣ်.
ref:rfa
