လါအ့ဖြ့ၣ်(၂၃)သီ, ၂၀၂၄နံၣ်
သုးကီၣ်ကးအသုးကျိၤလၢဟဲထီၣ်ဆူ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၆), ကီၫ်ရ့ၣ်ဒူပျာ်ယာ်, ရၤမတံအံၤ တၫ်ပၢၫ်ဆၢသုးပာ်ဖှိၣ်တဖၣ်ခိးခးအီၤအဃိ သုးကီၣ်ကးတပၤသံ၀ဲ(၆)ဂၤ၀ံၤ, တၫ်မၤန့ၫ်စ့ၫ်ကီး သိလ့ၣ်ထး(၁)ခိၣ်, သုးသိလ့ၣ်(၂)ခိၣ်ဒီး ကျိချံပှာ်သၣ်တဖၣ်အဂ့ၫ် ခ့ၣ်အဲၣ်ယူၣ်လီၫ်ခၢၣ်သး ထုးထီၣ်ပာ်ဖျါဃာ်၀ဲန့ၣ်လီၤ.
လါအ့ဖြ့ၣ်(၂၁)သီအနံၤ, သုးကီၣ်ကးအသုးကျိၤလၢအိၣ်ဟးထီၣ်ဖဲကီးတရံး ဆူ၀့ၫ်ရၤမတံအံၤ တၫ်ခိးခးအီၤလၢကျဲတီၤအဃိ သုးကီၣ်ကးတပၤ သုးခိၣ်စိ(၁)ဂၤ, သုးခိၣ်ဖိ(၁)ဂၤပာ်ဃုာ် ခဲလၢာ်(၆)ဂၤသံ၀ဲအဂ့ၫ်, တၫ်မၤန့ၫ်စ့ၫ်ကီး သိလ့ၣ်ထး(၁)ခိၣ်, သုးသိလ့ၣ်လၢတၫ်ထီဃာ်ကျိစဲး(၂)ခိၣ်, (၀.၅-ပွိုင့်ဖွိုက်)(၁)ခိၣ်ပာ်ဃုာ် ကျိဆံး(၁၁)ခိၣ်ဒီး ကျိချံပှာ်သၣ်အကလုာ်ကလုာ်အဂ့ၫ် ခ့ၣ်အဲၣ်ယူၣ်လီၫ်ခၢၣ်သးပာ်ဖျါဃာ်၀ဲန့ၣ်လီၤ.
ဒ်န့ၣ်အသိး လါအ့ဖြ့ၣ်(၂၀)သီအနံၤ, သုးကီၣ်ကးအသုး(ခလရ-၂၇၅)လၢလဲၤအိၣ်ခူသူၣ်ဖဲ ရၤမတံ-ကၠီၣ်တဲၣ်တၫ်ရ့လိာ်မုာ်လိာ်တိၤနီၫ်ဂံၫ်(၂)အဖီလာ်တဖၣ် KNLAဒီး PDFသုးပာ်ဖှိၣ်တဖၣ် လဲၤနုာ်လီၤဒုး၀ဲအဃိ သုးကီၣ်ကးတပၤသံ၀ဲ တစှၤန့ၫ်(၃၀)ဂၤ, သုးတြိၤ(၄၄)သုးတြိၤခိၣ် သုးခိၣ်ဒိၣ်စိ စိမ့ထဲးပာ်ဃုာ်အပှၤသုးဖိအါန့ၫ်(၃၀)ဂၤဘၣ်ဒိ၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
သုးကီၣ်ကးတပၤ ဒ်သိးကမၤန့ၫ်က့ၤ ၀့ၫ်ရၤမတံအဂီၫ် တၫ်ကမၤဖျါထီၣ် “အီၣ်စ့ၣ်ယး“ ထံကီၫ်ပတီၫ်သုးဂ့ၫ်၀ီ(နိုင်ငံတော်အဆင့်စစ်ဆင်ရေး)တခါ၀ံၤ မၤပှဲၤအါထီၣ်၀ဲ ပှၤကညီဂံၫ်ဘါ, စုက၀ဲၤဂံၫ်ဘါဒီး ဟဲထီၣ်၀ဲ၀ံၤ ခးကျိဖးဒိၣ်မ့ၫ်ဂ့ၤ, ကလံၤကျါတၫ်ဟဲခးလီၤစၢၤတၫ်လၢကဘီယူၤတဖၣ်မ့ၫ်ဂ့ၤ အိၣ်ထီၣ်၀ဲကိးမုၫ်နံၤအဂ့ၫ် KNU ထုးထီၣ်ပာ်ဖျါဃာ်၀ဲန့ၣ်လီၤ.
