လါအ့ဖြ့ၣ်(၂၃)သီ, ၂၀၂၄နံၣ်
သုးကီၣ်ကးသုးကျိၤလၢဟဲထီၣ်ဆူရၤမတံဒီး KNLA| PDF သုးပာ်ဖှိၣ်တဖၣ်အဘၢၣ်စၢၤ တၫ်ဒုးဆူၣ်ထီၣ်၀ဲဖဲ အ့ၡါကျဲမုၫ်ဖးဒိၣ်အဂ့ၫ် တၫ်သ့ၣ်ညါဘၣ်လၢ တၫ်ပၢၫ်ဆၢကရၢသုးဂ့ၫ်၀ီပှၤဘၣ်မူဘၣ်ဒါတဖၣ်အအိၣ်န့ၣ်လီၤ.
“အ့ၡါကျဲမုၫ်အဖီခိၣ် တၫ်ခးလိာ်သးအိၣ်ထီၣ်ဒီး သုးကျိၤလၢဟဲထီၣ်န့ၣ်လီၤ. သုးကီၣ်ကးတပၤ ကလဲၤထီၣ်ဆူရၤမတံအဂီၫ် ဂုၫ်ကျဲးစၢး၀ဲလီၤ. ဟဲထီၣ်၀ဲတန့ၫ်ဘၣ်. အိၣ်ပတုာ်သးဖဲ တီနီၫ်ထံလီၤဆူ(တောနော်ရေတံခွန်)အကပၤ၀ံၤ တၫ်ဒုးကဲထီၣ်သးလီၤ. သုးကီၣ်ကးသုးကျိၤလၢကလဲၤထီၣ်ဆူရၤမတံတဖၣ်အံၤ သူ၀ဲတၫ်မူးတၫ်ဘှီးအဂ့ၫ်စ့ၫ်ကီး တၫ်ထံၣ်ဘၣ်၀ဲအဂ့ၫ်“ ဂံၫ်ခီၣ်ထံးတၫ်ကစီၣ်စံး၀ဲန့ၣ်လီၤ.
ကီးတရံးတပၤတၫ်ဒုးဆူၣ်ထီၣ်၀ဲဘၣ်ဆၣ် ၀့ၫ်ရၤမတံနီၫ်ဂံၫ်(၂)တၫ်ရ့လိာ်မုာ်လိာ်တိၤအကပၤ (ခလရ ၂၇၅)သုးလၢ ၀့ၫ်ရၤမတံခိးသုးလၢအိၣ်ခူသူၣ်တဖၣ် KNLA၊ PDFသုးပာ်ဖှိၣ်တဖၣ်လဲၤနုာ်လီၤဒုး၀ဲ၀ံၤအလီၫ်ခံ တၫ်ခးပတုာ်၀ဲဒီး KNU၊ KNAဒီး သုးကီၣ်ကးအဘၢၣ်စၢၤ တၫ်မၤက့ၤ၀ဲတၫ်ဒုးဘၣ်လိာ်ဖိးဒ့တဖၣ်အဂ့ၫ် တၫ်သ့ၣ်ညါဘၣ်လၢလီၫ်က၀ီၤဂံၫ်ခီၣ်ထံးတၫ်ကစီၣ်တဖၣ်အအိၣ်န့ၣ်လီၤ.
၀့ၫ်ရၤမတံအပူၤ တၫ်ဒုးပတုာ်ကဒီးသး၀ံၤအလီၫ်ခံ လါအ့ဖြ့ၣ်(၂၁)သီအနံၤ, သုးကီၣ်ကးဒီး KNA သုးပာ်ဖှိၣ်တဖၣ် ဟးဆှၣ်တၫ်ဖဲ၀့ၫ်ပူၤအဂ့ၫ် တၫ်မဲာ်ညါဂံၫ်ခီၣ်ထံးတၫ်ကစီၣ်တဂၤစံး၀ဲန့ၣ်လီၤ.
“စီၤခၠံးသူၣ်စ့ၫ်ကီး အကျဲလီၤမၣ်ဒ်သိးမ့အီၣ်လဲၣ်လီၤ. သုးကီၣ်ကး ကဆှၢအီၤဆူတရူးအစုပူၤအိၣ်အသိး ကၠီၣ်တဲၣ်တပၤစ့ၫ်ကီးလဲၤခီတဘူၣ်ဘၣ်. ကပာ်ဖှိၣ်ထီၣ်သးဒီး တၫ်ပၢၫ်ဆၢကရၢတဖၣ် တၫ်ဆိကမိၣ်တအိၣ်ဘၣ်အသိး ကဖီၣ်ဂၢၫ်ဃာ်၀ဲ၀့ၫ်ရၤမတံလၢအသုးတဖၣ်ဒီး ကဒီသဒၢ၀ဲအမုၫ်ကျိၤ၀ဲၤကွာ်တဖၣ်အဂ့ၫ်“ လီၫ်က၀ီၤကမျၢၫ်တဂၤစံး၀ဲန့ၣ်လီၤ.
သုးကီၣ်ကးအပှၤသုးဖိလၢ အဆှၢန့ၫ်တၫ်အီၣ်တၫ်အီဆူ နီၫ်ဂံၫ်(၂)တိၤအဖီလာ် ၀့ၫ်ရၤမတံခိး(မြဝတီမြို့စောင့်တပ်) (ခလရ-၂၇၅)သုးတဖၣ်အံၤ အိၣ်၀ဲဒၣ်ဖဲ ၀့ၫ်ရၤမတံ ဃိၣ်တဖၣ်, သီခါဖၠၣ်တၫ်လီၫ်အါတီၫ်အပူၤ ဒ်သိးကမျၢၫ်ကူကၤအသိးအဂ့ၫ် လီၫ်က၀ီၤကမျၢၫ်တနီၤစံး၀ဲန့ၣ်လီၤ.
ရၤမတံပူၤတၫ်ဒုးပတုာ်သးအဃိ ရၤမတံလီၫ်က၀ီၤကမျၢၫ်တဖၣ်လၢလဲၤဃ့ၫ်အိၣ်ကဒုသးဖဲ ကီၫ်ကၠီၣ်တဲၣ်မဲဆီးတဖၣ် က့ၤကဒါက့ၤဆူအနီၫ်ကစၫ်ဟံၣ်ဃီတဖၣ်န့ၣ်လီၤ.
ဖဲအပူၤကွံာ် လါအ့ဖြ့ၣ်(၁၉)သီဒီး (၂၀)သီအနံၤ, ၀့ၫ်ရၤမတံနီၫ်ဂံၫ်(၂)တိၤအကပၤ တၫ်ဒုးကဲထီၣ်သးအဃိ ပှၤဃ့ၫ်သုးပှၤလီၫ်အိၣ်ကမှံ(၃)ကထိဘျဲၣ် လဲၤဃ့ၫ်ဆူကီၫ်ကၠီၣ်တဲၣ်တပၤအဃိ ကၠီၣ်တဲၣ်ပှၤဘၣ်မူဘၣ်ဒါတဖၣ် တူၫ်လိာ်ရဲၣ်ကျဲၤပာ်လီၤ၀ဲ တၫ်လီၫ်(၅)တီၫ်န့ၣ်လီၤ.
ref:salweenpress
