လါအ့ဖြ့ၣ်(၂၃)သီ, ၂၀၂၄နံၣ်
ကၠီၣ်တဲၣ်-ပယီၤကီၫ်ဆၢတၫ်အိၣ်သးတဖၣ် တၫ်ကရဲၣ်ကျဲၤအဂီၫ် တၫ်ကရၢကရိဒုးအိၣ်ထီၣ် ကမံးတံာ်လီၤဆီတတီၤ၀ံၤ ကမံးတံာ်ပှၤပၢၤလီၫ်ဆ့ၣ်နီၤအလီၫ်န့ၣ် ကိတိာ်ခိၣ်ကျၢၫ် ဟ့ၣ်မူဟ့ၣ်ဒါ၀ဲ ကၠီၣ်တဲၣ်ထံဂုၤကီၫ်ဂၤကိတိာ် Parnpree Bahiddha-Nukara ဖဲလါအ့ဖြ့ၣ်(၂၂)သီနံၤအဂ့ၫ် တၫ်သ့ၣ်ညါဘၣ်လီၤ.
ကမံးတံာ်အံၤန့ၣ် ကၠီၣ်တဲၣ်ထံဂုၤကီၫ်ဂၤကိတိာ်ခိၣ်ခံ Sihasak Phuangketkeowန့ၣ် မ့ၫ်၀ဲပှၤပၢၤလီၫ်ဆ့ၣ်နီၤခံ (တၫ်ဒီသဒၢ၀ဲၤကျိၤ), ထံဂုၤကီၫ်ဂၤ၀ဲၤကျိၤဒီး ထံလီၫ်ကီၫ်ပူၤ၀ဲၤကျိၤအကိတိာ်တဖၣ်, ဒီကလုာ်ပ့ၫ်ဆှါပဒိၣ်ပပှၫ်တဖၣ်, ဒီကလုာ်တၫ်ဘံၣ်တၫ်ဘၢကီၣ်ကး, ကၠီၣ်တဲၣ်သုးဒီး ပၢၤကီၫ်ကရၢဖိတဖၣ် ဘၣ်တၫ်ဟ့ၣ်မူဟ့ၣ်ဒါအီၤလီၤ.
ကိတိာ်ခိၣ်ကျၢၫ် Srettha Thavisin အနီၫ်ကစၫ်ဒၣ်၀ဲစ့ၫ်ကီး တနံၤအံၤလါအ့ဖြ့ၣ်(၂၃)သီနံၤန့ၣ် ကဟဲလၢကၠီၣ်တဲၣ်-ပယီၤကီၫ်ဆၢ ၀့ၫ်မဲဆီးအဂ့ၫ် တၫ်သ့ၣ်ညါဘၣ်လီၤ. ကၠီၣ်တဲၣ်ထံဂုၤကီၫ်ဂၤကိတိာ် Parnpree Bahiddha-Nukaraစ့ၫ်ကီး ဖဲလါအ့ဖြ့ၣ်(၁၂)သီနံၤန့ၣ် ဟဲဆူ၀့ၫ်မဲဆီးဒံးလီၤ.
ကၠီၣ်တဲၣ်-ပယီၤကီၫ်ဆၢ ၀့ၫ်ရၤမတံ တၫ်ရ့လိာ်မုာ်လိာ်တိၤနီၫ်ဂံၫ်(၂)အကပၤ ကညီဒီကလုာ်တၫ်ထူၣ်ဖျဲးသုးမုၫ်ဒိၣ် (KNLA) သုးပာ်ဖှိၣ်ဒီး သုးကီၣ်ကးတဖၣ် ဖဲအပူၤကွံာ် လါအ့ဖြ့ၣ်အသီ(၂၀)နံၤန့ၣ် တၫ်ဒုးကဲထီၣ်၀ဲဆူၣ်ဆူၣ်န့ၣ်လီၤ. သုးကီၣ်ကးအကလံၤသုးစ့ၫ်ကီး ဟဲခးလီၤတၫ်လၢ ကဘီယူၤ အိၣ်၀ဲန့ၣ်လီၤ.
တၫ်ဒုးအဃိ ပယီၤကဘီယူၤတဖၣ် မ့ၫ်ဟဲနုာ်လီၤတလၢ ကၠီၣ်တဲၣ်တၫ်ပၢဟီၣ်က၀ီၤန့ၣ် တၫ်ကခးလီၤတဲာ်ကွံာ်အဂီၫ် ကၠီၣ်တဲၣ်ကိတိာ်ခိၣ်ကျၢၫ် ဟ့ၣ်လီၤဃာ်တၫ်ကလုၫ်၀ံၤ တၫ်ကဒီသဒၢကလံၤကျါတၫ်လီၤဘၣ်ယိာ်အဂီၫ် နဲၣ်လီၤဃာ်၀ဲဒၣ်လၢ တၫ်ကဘၣ်အိၣ်ကတဲာ်ကတီၤပာ်သးလၢ(၂၄)နၣ်ရံၣ်အဂီၫ်န့ၣ်လီၤ.
တၫ်ဒုးအဃိ ပှၤဘၣ်ကီဘၣ်ခဲဖိလၢအကထိ ဘၣ်ဟဲဃ့ၫ်အိၣ်ကဒုဆူကၠီၣ်တဲၣ်တကပၤလီၤ. ကမျၢၫ်တၫ်ဘၣ်ဒိဘၣ်ထံးအိၣ်ထီၣ်သ့၀ဲအဃိ လၢကတီၫ်အံၤ တၫ်ပၢၫ်ဆၢသုးပာ်ဖှိၣ်တကပၤ ဂုၤက့ၤအခံတစိၤတလီၫ်အဂ့ၫ် KNU တကပၤ ပာ်ဖျါဃာ်၀ဲလီၤ.
တၫ်ဒုးတၫ်ယၤတဖၣ်အဃိ ကီၫ်ပယီၤပူၤ ပှၤပာ်တ့ၫ်ဟံၣ်ဃီဃ့ၫ်ပူၤဖျဲးသးအိၣ်ထီၣ်၀ဲ (၂.၈)ကကွဲၫ်၀ံၤ ပှၤ(၁၇)ကကွဲၫ်န့ၣ် လိၣ်ဘၣ်ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤတဖၣ်အဂ့ၫ် ဘီမုၫ်စၢဖှိၣ်ကရၢ တၫ်ကရၢကရိတဖၣ် ပာ်ဖျါဃာ်၀ဲလီၤ.
ref:myanmarnow
