လါမးရှး(၂၂)သီ, ၂၀၂၄နံၣ်
ကီၫ်ပယီၤပူၤ တၫ်ဒုးတၫ်ယၤတဖၣ်အဃိ တုၤဖဲလါမးရှး(၁၈)သီနံၤ ပှၤဃ့ၫ်သုးပှၤလီၫ်အိၣ်ကမှံဖိ အနီၫ်ဂံၫ်အိၣ်ထီၣ်တုၤ (၂.၈)ကကွဲၫ်လံန့ၣ် (UNOCHA) ပာ်ဖျါ၀ဲဖဲလါမးရှး(၂၀)သီနံၤန့ၣ်လီၤ.
တၫ်ဒုးအဃိ လၢစကဲကီၫ်ခီ(စစ်ကိုင်တိုင်း), ခလ့(ကလေး)ဒီး ကနံၣ်ကီၫ်ဆၣ်(ကနီမြို့နယ်)တဖၣ်ပူၤ ပှၤ(၂)ကလးတခီ ဟံၣ်ဃီဘၣ်ဟးဂီၤကွံာ်၀ံၤ လၢယိၤဒိၣ်ကီၫ်စဲၣ်ကလံၤထံး(ရှမ်းပြည်နယ်တောင်ပိုင်း) တကပၤ ပ့ၣ်လီကီၫ်ဆၣ်(ပင်လောင်းမြို့နယ်)အပူၤစ့ၫ်ကီး ပှၤ(၁)ကလးဂၤဘျဲၣ် ဘၣ်ဃ့ၫ်ပူၤဖျဲးသးအဂ့ၫ်တဲ၀ဲလီၤ.
လၢကညီကီၫ်စဲၣ်(ကရင်ပြည်နယ်)ဒီး တနီသရံၣ်ကီၫ်ခီ(တနင်္သာရီတိုင်း)စ့ၫ်ကီး တၫ်ဒုးဒီးကလံၤကျါတၫ်ခးလီၤတၫ်တဖၣ်အဃိ ပှၤ(၁)ကလးဘျဲၣ် ဘၣ်ပာ်တ့ၫ်ဟံၣ်ဃီ ဃ့ၫ်ပူၤဖျဲးသးအဂ့ၫ်တဲ၀ဲလီၤ. ရခၢၣ်ကီၫ်စဲၣ်ပူၤ(ရခိုင်ပြည်နယ်) ကီၫ်ဆၣ်(၁၇)ဘ့ၣ်အကျါ (၁၅)ဘ့ၣ်န့ၣ် တူၫ်ဘၣ်တၫ်ဒုးတၫ်ယၤအဂ့ၫ် ပာ်ဖျါ၀ဲလီၤ.
တၫ်ဟ့ၣ်ဟီၣ်ခိၣ်ဖိတၫ်ဒိသူၣ်ဒိသးတၫ်မၤစၢၤကရၢ(UNOCHA)အံၤ ဆီၣ်ထွဲမၤစၢၤ ပှၤဃ့ၫ်သုးပှၤလီၫ်အိၣ်ကမှံဖိတဖၣ်တပယူာ်ဃီဘၣ်ဆၣ် ဘၣ်ကွၫ်ဆၢၣ်မဲာ်ဒီး စ့ပာ်ကီၤတၫ်ဂ့ၫ်ကီအဂ့ၫ် ဖဲလါမးရှး(၂၀)သီနံၤ UNOCHA တၫ်ပာ်ဖျါပူၤ ပာ်ဖျါ၀ဲလီၤ.
တုၤဖဲလါမးရှး(၄)သီနံၤ UNOCHA အစရီတၫ်ပာ်ဖျါအဖီခိၣ် ပှၤဃ့ၫ်သုးပှၤလီၫ်အိၣ်ကမှံဖိ အနီၫ်ဂံၫ်အိၣ်ထီၣ် (၂.၇)ကကွဲၫ်ဘျဲၣ်၀ံၤ ဖဲလါမးရှး(၁၈)သီနံၤန့ၣ် အနီၫ်ဂံၫ်အိၣ်ထီၣ်တုၤ(၂.၈)ကကွဲၫ်အဃိ တချုး(၁)လါပှဲၤထီၣ် ပှၤအဂၤ(၁)ကလီၫ်ဃၣ်ဃၣ် ဘၣ်ပာ်တ့ၫ်ကွံာ်တၫ်အိၣ်တၫ်ဆိးအလီၫ်န့ၣ်လီၤ.
ဖဲလါမးရှး(၁၈)သီနံၤ UNOCHA အတၫ်ပာ်ဖျါ ဘၣ်ထွဲပှၤဃ့ၫ်သုးပှၤလီၫ်အိၣ်ကမှံဖိ အနီၫ်ဂံၫ်နီၫ်ဒွးအကျါ (၃)ကလီၫ်ဃၣ်ဃၣ်န့ၣ် မ့ၫ်လၢတချုးသုးဟံးန့ၫ်တၫ်စိတၫ်ကမီၤ ပှၤလီၫ်အိၣ်ကမှံအနီၫ်ဂံၫ်နီၫ်ဒွးန့ၣ်လီၤ.
Photo:rfa
