လါမးရှး(၁၄)သီ, ၂၀၂၄နံၣ်
သုးဟံးန့ၫ်ဆူၣ်ထံကီၫ်တၫ်စိတၫ်ကမီၤ၀ံၤအလီၫ်ခံ တုၤလၢ၂၀၂၄နံၣ်, လါဖ့ၤဘြူၤအါရံၤကတီၫ်, ကီၫ်ပယီၤပူၤ ကီၫ်ဆၣ်ဘူးထီၣ်(၈၀)ဘ့ၣ်အပူၤ လီတဲစိဒီးအ့ၣ်ထၢၣ်နဲးအကျိၤတဖၣ် တၫ်ဒီၣ်တဲာ်ကွံာ်ဃာ်အီၤအဂ့ၫ် ကရၢလၢအဟူးဂဲၤတၫ်တဲဖျါထီၣ်တၫ်သဘျ့ခွဲးယာ် ထုးထီၣ်ပာ်ဖျါဃာ်၀ဲဖဲ လါးမးၡး(၁၃)သီအနံၤန့ၣ်လီၤ.
ကီၫ်ဆၣ်(၈၀)ဘ့ၣ်အပူၤ ရခၢၣ်သုးမုၫ်ဒိၣ်(AA)ဒီး သုးကီၣ်ကး အဘၢၣ်စၢၤတၫ်ဒုးဆူၣ် ရခၢၣ်ကီၫ်စဲၣ်ပူၤ ကီၫ်ဆၣ်ဘူးထီၣ်ခဲလၢာ်ဃၣ်ဃၣ်ပာ်ဃုာ်၀ဲ၀ံၤ ကမျၢၫ်တၫ်ဒီသဒၢသုးအဂံၫ်အဘါဆူၣ် စကဲကီၫ်ခီပူၤကီၫ်ဆၣ်(၂၇)ဘ့ၣ် တၫ်ဒီၣ်တဲာ်ကွံာ်ဃာ်၀ဲအဂ့ၫ် တၫ်သ့ၣ်ညါဘၣ်န့ၣ်လီၤ.
ရခၢၣ်ကီၫ်စဲၣ်, ၀့ၫ်စ့းတွ့ၣ်ပူၤ တုၤလၢလါဖ့ၤဘြူၤအါရံၤ(၁၆)သီအနံၤ တၫ်သူ၀ဲ MyTel လီတဲစိအကျိၤတဖၣ်န့ၫ်၀ဲဘၣ်ဆၣ် စးထီၣ်လၢ(၁၇)သီအနံၤန့ၣ် တၫ်ဒီၣ်တဲာ်ကွံာ်လီတဲစိပာ်ဃုာ်အ့ၣ်ထၢၣ်နဲးအကျိၤတဖၣ်အဂ့ၫ်စံး၀ဲန့ၣ်လီၤ. စကဲကီၫ်ခီ, ၀့ၫ်ကီလ့လၢ သိၣ်မှံသုးပာ်ဖှိၣ်တဖၣ်ထီၣ်ဒုးမၤန့ၫ်ဃာ်၀ဲအံၤ သုးကီၣ်ကးက့ၤထီၣ်ဒုး၀ဲလၢသုးအဂံၫ်အဘါအါအါဂီၫ်ဂီၫ်ကတီၫ် တၫ်ဒီၣ်တဲာ်ကွံာ်လီတဲစိပာ်ဃုာ်အ့ၣ်ထၢၣ်နဲးအကျိၤတဖၣ်အဂ့ၫ် ကွဲးဖျါဃာ်၀ဲန့ၣ်လီၤ.
အါတက့ၫ်တၫ်ဒီၣ်တဲာ်ဃာ် အ့ၣ်ထၢၣ်နဲးအကျိၤလၢ တၫ်ဒုးကဲထီၣ်သးတၫ်လီၫ်တဖၣ်၀ံၤ သုးကီၣ်ကးသူ၀ဲ တဲာ်(၄)တဲာ်တၫ်တိာ်ကူၣ်ကျၢၫ်လၢ ရခၢၣ်ကီၫ်စဲၣ်ပူၤအသိး အဲၣ်ဒိးပာ်ကဒၢတၫ်ကစီၣ်တၫ်ဂ့ၫ်တၫ်ကျိၤလဲၤတရံးသးဒီး တၫ်ပၢၫ်ဆၢတၫ်ဖံးတၫ်မၤတဖၣ် တၫ်ဒုးဘျးစဲအီၤသုတန့ၫ်အဂီၫ် ပညိၣ်ဆီၣ်ဘၢ၀ဲအဂ့ၫ်စံး၀ဲန့ၣ်လီၤ.
ရခၢၣ်ကီၫ်စဲၣ်ပူၤ တၫ်ဒီၣ်တဲာ်ဃာ်တၫ်ဆဲးကျိးအကျိၤတဖၣ်အဃိ လီၫ်က၀ီၤကမျၢၫ်တဖၣ် ဒ်သိးကဒိးန့ၫ်ဘၣ်တၫ်ကစီၣ်အမ့ၫ်အတီအဂီၫ် ကီခဲ၀ဲအဂ့ၫ် အသၣ်ကရၢ(အသံအဖွဲ့) ဒုးနဲၣ်ဖျါဃာ်၀ဲန့ၣ်လီၤ. တကးဘၣ် စ့တၢးတၫ်ဖံးတၫ်ဖံးတၫ်မၤလၢ တၫ်ဘၣ်မၤ၀ဲဒီးအ့ၣ်ထၢၣ်နဲးအကျိၤ တၫ်ဆှၢစ့တၫ်ဖံးတၫ်မၤ(ငွေလွှဲလုပ်ငန်း)ဒီး Online service တၫ်ဖံးတၫ်မၤ(အွန်လိုင်းဝန်ဆောင်မူ)တဖၣ်စ့ၫ်ကီး ဘူးထီၣ်အိၣ်ပတုာ်သးလံအဂ့ၫ်စံး၀ဲန့ၣ်လီၤ.
photo:athan
