လါမးရှး(၁၄)သီ, ၂၀၂၄နံၣ်
၂၀၂၄နံၣ်, လါမးၡး(၁၂)သီအနံၤ သုးကီၣ်ကးသုးအဒူၣ်ဖိထၢဖှိၣ်လၢ ဘၣ်တၫ်ဖီၣ်န့ၫ်အီၤ ဖဲ၀့ၫ်မူတၫ်ဒုးအပူၤ ပှၤနီၫ်ဂံၫ်ခဲလၢာ်(၇၁)ဂၤ ဘၣ်တၫ်ပျၫ်ကဒါက့ၤအီၤလံအဂ့ၫ် ကီၫ်ရ့ၣ်ချၢၣ်လွံၫ်ထူၣ်ပှၤတဲတၫ်ပၢပဒိၣ်စီၤဟဲဂ့ၤတဲ၀ဲန့ၣ်လီၤ.
ဖဲ ၂၀၂၃နံၣ်, လါဒံၣ်စ့ဘၢၣ်(၂)သီအနံၤ, ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၃), ချၢၣ်လွံၫ်ထူၣ်ကီၫ်ရ့ၣ်, မူကီၫ်ဆၣ်, မူ၀့ၫ် အိၣ်သူၣ်လီၤ သုးကီၣ်ကးအသုးရ့ၣ်တဖၣ်လၢအမ့ၫ် (ခမရ-၅၉၉), (ခမရ-၅၉၀)တဖၣ် ကညီဒီကလုာ်တၫ်ထူၣ်ဖျဲးသုးမုၫ်ဒိၣ်(KNLA)ဒီး သုးပာ်ဖှိၣ်တဖၣ်လဲၤနုာ်ဒုးမၤန့ၫ်၀ဲ၀ံၤ တၫ်ဖီၣ်န့ၫ်၀ဲသုးကီၣ်ကးအသုးအဒူၣ်ဖိထၢဖှိၣ်(၃၄)ဒူၣ် ဒီး ပှၤနီၫ်ဂံၫ်ခဲလၢာ်(၇၁)ဂၤန့ၣ်လီၤ.
“သုးအဒူၣ်ဖိထၢဖှိၣ်လၢတၫ်ဖီၣ်န့ၫ်အီၤ တၫ်ဒုးပူၤတဖၣ် တၫ်ပၢဆှၢဃာ်အီၤ(၃)လါကတီၫ်ဂ့ၤဂ့ၤဒီး အ၀ဲသ့ၣ်အတၫ်ဘၣ်သးအဖီခိၣ်ဃ့က့ၤ၀ဲအဃိ တၫ်ပျၫ်ကဒါက့ၤအီၤအဂ့ၫ်“ ချၢၣ်လွံၫ်ထူၣ်ပှၤဘၣ်မူဘၣ်ဒါ တဲ၀ဲန့ၣ်လီၤ.
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၫ်ထူၣ်ကီၫ်ရ့ၣ်, သုးက့နီၫ်ဂံၫ်(၃)ဟီၣ်က၀ီၤပူၤ သုးကီၣ်ကးအပှၤသုးဖိလၢတၫ်ဖီၣ်န့ၫ်အီၤအိၣ်(၂၀)ဃၣ်ဃၣ်ဒီး မ့မ့ၫ်လၢသုးအဒူၣ်ဖိထၢဖှိၣ်တခီ အိၣ်၀ဲ(၃၄)ဒူၣ်ဒီး ပှၤနီၫ်ဂံၫ်အိၣ်၀ဲ(၇၁)ဂၤအဂ့ၫ် တၫ်သ့ၣ်ညါဘၣ်န့ၣ်လီၤ.
ဖဲအပူၤကွံာ် ၂၀၂၄နံၣ်, လါဖ့ၤဘြူၤအါရံၤ(၂၅)သီအနံၤ, (၁၁)နၣ်ရံၣ်အဆၢကတီၫ် ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, ချၢၣ်လွံၫ်ထူၣ်ကီၫ်ရ့ၣ်, လၢၫ်ဒိၣ်ကီၫ်ဆၣ်ပူၤ သုးကီၣ်ကးတီအူကလံၤသုး ဟဲခးလီၤတၫ်လၢ ထံမိၫ်ဂံၫ်ထၣ်ပၢၤကီၫ်သုးကလၢၤအပူၤအဃိ သုးကီၣ်ကးအပှၤသုးဖိလၢ ဘၣ်တၫ်ဖီၣ်န့ၫ်အီၤလၢတၫ်ဒုးအပူၤဒီး တၫ်ဒုးလီၤဃာ်ဃိၣ်ပူၤ (၁)ဂၤသံ၀ဲ ဒီး (၁၄)ဂၤဘၣ်ဒိ၀ဲန့ၣ်လီၤ.
