လါမးရှး(၁၃)သီ, ၂၀၂၄နံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ, သုးက့နီၫ်ဂံၫ်(၆), ကီၫ်ရ့ၣ်ဒူပျာ်ယာ်, ခီၣ်ပရၣ်သုးကျိၤ ပာ်ဖျါထီၣ်၀ဲစုက၀ဲၤလၢ တၫ်ခးလီၤကဘီယူၤတဖၣ် ဖဲ social media အပူၤအဂ့ၫ် တၫ်ထံၣ်ဘၣ်၀ဲန့ၣ်လီၤ.
ခီၣ်ပရၣ်သုးကျိၤခိၣ် သုးခိၣ်ဒးဘီဒီး သုးဖိအဂၤတဖၣ် ယိးဃာ်စုက၀ဲၤခးလီၤကဘီယူၤလၢ ဘၣ်ယိးလၢဖံးဘၣ်ခိၣ်ဒီး လူၤတၫ်ကိၫ်န့ၫ်တကလုာ် တၫ်ဂီၤတဖၣ်ဟူးသါထီၣ်လၢ social mediaတဖၣ်အဖီခိၣ်န့ၣ်လီၤ.ဘၣ်ထွဲဒီးတၫ်ဂီၤတဖၣ်အဖီခိၣ် တၫ်တထံၣ်ဘၣ်၀ဲတၫ်ကစီၣ်လီၤဆီတဖၣ်ဒီး ဟူးသါထီၣ်ဒၣ်ထဲ တၫ်ဂီၤတဖၣ်န့ၣ်လီၤ.
ဖဲလၢလါဖ့ၤဘြူၤအါရံၤအတီၫ်ပူၤစ့ၫ်ကီး ဖဲကီၫ်ရ့ၣ်ဘျံး-ဒ၀ဲၫ်, သုးက့နီၫ်ဂံၫ်(၄) ဟီၣ်က၀ီၤပူၤ KNLA သုးဖိတဖၣ် ယိးဃာ်ကျိလၢတၫ်ခးလီၤကဘီယူၤတဖၣ် တၫ်ထံၣ်ဘၣ်၀ဲန့ၣ်လီၤ.တၫ်စုက၀ဲၤတဖၣ်အံၤ တၫ်မၤတၫ်ဆါတၫ်ပှ့ၤန့ၫ်ဒၣ်ထဲလၢ ပဒိၣ်တဖုဒီးတဖုအဘၢၣ်စၢၤအဂီၫ် ထံဂုၤကီၫ်ဂၤဟ့ၣ်ဃာ်တၫ်ပျဲတဖၣ်အဂ့ၫ် တၫ်တဲထီၣ်တဲလီၤတဖၣ်အိၣ်ထီၣ်၀ဲန့ၣ်လီၤ. လၢတၫ်န့ၣ်အဃိ ကီၫ်ပယီၤကလုာ်ဒူၣ် ERO တဖၣ်အအိၣ် တၫ်စုက၀ဲၤဒ်အံၤတဖၣ် န့ၫ်ဘၣ်၀ဲဒ်လဲၣ်န့ၣ် မ့ၫ်လီၤသးစဲတခါန့ၣ်လီၤ.
တယံာ်တမီၫ်ဒံးဘၣ်အဆၢကတီၫ် ရခၢၣ်သုးမုၫ်ဒိၣ် (AA) သုးခိၣ်ကျၢၫ်(၂) ဒီးကထၢၣ်ညိၣ်ထိအီၣ်စ့ၫ်ကီး တၫ်ဂီၤလၢအယိးဃာ်၀ဲ စုက၀ဲၤခးကဘီယူၤတဖၣ် ဟူးသါထီၣ်၀ဲန့ၣ်လီၤ.
မ့မ့ၫ်လၢကခၠ့ၣ်တၫ်ထူၣ်ဖျဲးသုးမုၫ်ဒိၣ် (KIA)တခီ စုက၀ဲၤခးလီၤကဘီယူၤတဖၣ်အိၣ်၀ဲဘၣ်ဆၣ် တၫ်ဂီၤတၫ်ဖီၣ်တဖၣ် ဟူးသါထီၣ် တအိၣ်၀ဲဘၣ်န့ၣ်လီၤ.
UWSA ‘’ဝ’’သုးမုၫ်ဒိၣ်တခီ န့ၫ်ပၢဘၣ်စုက၀ဲၤခးလီၤကဘီယူၤအါအါဂီၫ်ဂီၫ် တၫ်မၤနီၣ်မၤဃါ, တၫ်ဂီၤတၫ်ဖီၣ်တဖၣ် ဟူးဖျါထီၣ်၀ဲ ခဲအံၤခဲအံၤန့ၣ်လီၤ. မ့မ့ၫ်‘’ဝ’’သုးမုၫ်ဒိၣ်တခီ စုက၀ဲၤခးလီၤကဘီယူၤတဖၣ် ကီၫ်တရူးဆါလီၤန့ၫ်၀ဲအဂ့ၫ် တၫ်ပဲာ်ထံနီၤဖးတဖၣ်အိၣ်၀ဲန့ၣ်လီၤ.
photo: socialmedia
